- కాంగ్రెస్ వైపు రేఖానాయక్.. టికెట్ కోసం అప్లయ్
- బీజేపీ దిక్కు చెన్నమనేని రమేశ్ చూపు
- పార్టీని వీడేందుకు సిద్ధమైన మైనంపల్లి
- తుమ్మల అనుచరుల స్పెషల్ మీటింగ్
- కేడర్తో వేముల వీరేశం, జలగం భేటీ
- భవిష్యత్తు కార్యాచరణపై చర్చ
హైదరాబాద్, వెలుగు: ఎమ్మెల్యే టికెట్దక్కని బీఆర్ఎస్ నేతలు ఆ పార్టీకి గుడ్బై చెప్తున్నారు. ఇతర పార్టీల్లో చేరేందుకు అంతా రెడీ చేసుకుంటున్నారు. ఖానాపూర్ బీఆర్ఎస్ ఎమ్మెల్యే రేఖానాయక్ కాంగ్రెస్ టికెట్ కోసం అప్లయ్ చేసుకున్నారు. ఆమె భర్త శ్యామ్ నాయక్ కాంగ్రెస్లో చేరారు. మల్కాజ్గిరి ఎమ్మెల్యే మైనంపల్లి హన్మంతరావు మెదక్టికెట్తన కొడుకు రోహిత్కు ఇవ్వాల్సిందేనని బీఆర్ఎస్ హైకమాండ్కు తేల్చి చెప్పారు. మెదక్ టికెట్ఇవ్వకుంటే పార్టీని వీడేందుకు ఆయన సిద్ధమవుతున్నారు. వేములవాడ టికెట్దక్కని ఎమ్మెల్యే చెన్నమనేని రమేశ్బాబు బీజేపీ వైపు చూస్తున్నారు. మాజీ మంత్రి తుమ్మల నాగేశ్వర్రావు అనుచరులు మంగళవారం ఖమ్మంలో ప్రత్యేకంగా సమావేశమయ్యారు. పాలేరు టికెట్తుమ్మలకు ఇవ్వకపోవడంతో భవిష్యత్ కార్యాచరణపై వారు చర్చించారు. తుమ్మల నాగేశ్వర్రావు హైదరాబాద్లో ఉండటంతో ఈ మీటింగ్లో పాల్గొనలేదు. కొత్తగూడెం మాజీ ఎమ్మెల్యే జలగం వెంకట్రావు తన వర్గీయులతో సమావేశమై భవిష్యత్ కార్యాచరణపై చర్చించారు. నకిరేకల్మాజీ ఎమ్మెల్యే వేముల వీరేశం తన అనుచరులతో భేటీ అయ్యారు.
రెండు టికెట్లిస్తేనే : మైనంపల్లి
తనకు, తన కొడుక్కు ఎమ్మెల్యే టికెట్లు ఇవ్వాల్సిందేనని బీఆర్ఎస్ హైకమాండ్కు సోమవారం తిరుమలలో మల్కాజ్గిరి ఎమ్మెల్యే మైనంపల్లి హన్మంతరావు తేల్చిచెప్పారు. మంగళవారం కూడా ఆయన అక్కడే మీడియాతో మాట్లాడారు. ‘‘కేసీఆర్కు విజ్ఞప్తి చేస్తున్నా.. నా కొడుక్కు మెదక్ సీట్ ఇవ్వండి.. అక్కడ నా కొడుకు కచ్చితంగా గెలుస్తడు.. కేసీఆర్ను నేను ఏమీ అనలేదు.. ఆయన నన్ను ఏమీ అనలేదు.. నేను మల్కాజ్గిరి, నా కొడుకు మెదక్ నుంచి గెలుస్తం.. కరోనా లాంటిది వచ్చి ఎప్పుడు పోతామో తెలీదు.. బతికున్నప్పుడు జీవితానికి విలువ లేకపోతే ఎలా?” అని మైనంపల్లి అన్నారు. కరోనా కష్టకాలం నుంచి తన కొడుకు రోహిత్ మెదక్లో సమాజ సేవ చేస్తున్నాడని, అక్కడి ప్రజల మద్దతు తమకే ఉందని చెప్పారు. రోహిత్కు తన సపోర్ట్ ఉంటుందన్నారు. మంత్రి హరీశ్రావుపై తాను చేసిన వ్యాఖ్యలు వ్యక్తిగతమని, పార్టీపై, అధినేతపై ఎలాంటి వ్యాఖ్యలు చేయలేదని చెప్పారు. తాను ఎవరి విషయంలో జోక్యం చేసుకోనని, తనను ఇబ్బంది పెడితే అదే రీతిలో కచ్చితంగా బదులిస్తానన్నారు. హైదరాబాద్కు వెళ్లిన తర్వాత తన అనుచరులతో మాట్లాడి కార్యాచరణ ప్రకటిస్తానని తెలిపారు.
తాను మల్కాజ్గిరి నుంచి, తన కుమారుడు మెదక్ నుంచి పోటీ చేయడం ఖాయమన్నారు. కాగా, మైనంపల్లి చర్యలను బీఆర్ఎస్ హైకమాండ్ నిశితంగా గమనిస్తున్నది. హైదరాబాద్కు వచ్చిన తర్వాత ఆయనపై చర్యలు తీసుకునే అవకాశం ఉన్నట్లు పార్టీ వర్గాల్లో చర్చ జరుగుతున్నది. మైనంపల్లిని తప్పిస్తే మల్కాజ్గిరి నుంచి మంత్రి మల్లారెడ్డి అల్లుడు రాజశేఖర్రెడ్డి, ఎమ్మెల్సీ శంభీపూర్రాజు, మాజీ ఎమ్మెల్యే కనకారెడ్డి కోడలు, కార్పొరేటర్ చింతల విజయశాంతిరెడ్డి, మన్నె క్రిశాంక్, మాజీ కార్పొరేటర్ పరుశురాం రెడ్డిలో ఎవరికైనా ఒకరికి టికెట్ఇచ్చే అవకాశం ఉన్నట్లు ప్రచారం జరుగుతున్నది. పాలేరు టికెట్ను కందాల ఉపేందర్రెడ్డికే ఇవ్వడంతో మంగళవారం ఖమ్మంలోని వీసీ రెడ్డి ఫంక్షన్ హాల్లో మాజీ మంత్రి తుమ్మల నాగేశ్వర్రావు అనుచరులు సమావేశమయ్యారు. ఈ సమావేశంలో చర్చించిన అంశాలను హైదరాబాద్లో ఉన్న తుమ్మల దృష్టికి తీసుకెళ్లారు. కొత్తగూడెం టికెట్దక్కని జలగం వెంకట్రావు కూడా తన అనుచరులతో భేటీ అయ్యారు. తుమ్మల, జలగం కలిసి కాంగ్రెస్లో చేరనున్నట్టు వారి అనుచరులు చెప్తున్నారు.
నకిరేకల్ మాజీ ఎమ్మెల్యే వేముల వీరేశం కాంగ్రెస్లో చేరేందుకు రంగం సిద్ధం చేసుకుంటున్నారు. ఇన్నాళ్లూ ఆయన రాకను వ్యతిరేకించిన భువనగిరి ఎంపీ కోమటిరెడ్డి వెంకట్రెడ్డి ఖమ్మం మాజీ ఎంపీ పొంగులేటి శ్రీనివాస్ రెడ్డి జోక్యంతో మెత్తబడ్డారు. ఈ వారంలోనే వేముల వీరేశం కాంగ్రెస్ పార్టీలో చేరే అవకాశముందని తెలుస్తున్నది.
పెద్దపల్లి టికెట్ఆశించి భంగపడ్డ కేటీఆర్సన్నిహితుడు నల్ల మనోహర్రెడ్డి బీఆర్ఎస్ను వీడారు. రెబల్గా పోటీ చేసేందుకు ప్రయత్నాలు మొదలుపెట్టారు. ప్రస్తుతం జర్మనీలో ఉన్న వేములవాడ ఎమ్మెల్యే చెన్నమనేని రమేశ్ఈ నెల 25న స్వదేశానికి రానున్నారు. ఇప్పటికే బీఆర్ఎస్ను వీడాలని ఆయనను అనుచరులు కోరుతున్నారు. రమేశ్తో బీజేపీ కీలక నేత ఈటల రాజేందర్ ఫోన్లో మాట్లాడారు.
కాంగ్రెస్లో చేరకుండానే టికెట్కోసం రేఖానాయక్ అప్లికేషన్
కాంగ్రెస్లో చేరకుండానే ఖానాపూర్ బీఆర్ఎస్ ఎమ్మెల్యే రేఖానాయక్ మంగళవారం టికెట్ కోసం అప్లికేషన్ పెట్టుకున్నారు. రేఖానాయక్ ఖానాపూర్ నుంచి, ఆమె భర్త శ్యాంనాయక్ ఆసిఫాబాద్ నుంచి ఎమ్మెల్యే టికెట్ కోరుతూ దరఖాస్తులు గాంధీ భవన్లో సమర్పించారు. బీఆర్ఎస్ ఖానాపూర్ టికెట్తనకు ఇవ్వకపోవడం బాధ కలిగించిందని, మూడోసారి గెలిస్తే మంత్రి పదవి ఇవ్వాల్సి వస్తుందనే తనను తప్పించారని రేఖా నాయక్ ఆవేదన వ్యక్తం చేశారు. ఖానాపూర్ టికెట్ ఇచ్చిన జాన్సన్ నాయక్ ఎస్టీ కాదని.. కేవలం కేటీఆర్ ఫ్రెండ్మాత్రమేనని అన్నారు.
భర్తలు లేని మహిళలకే బీఆర్ఎస్లో మంత్రి పదవులు ఇస్తారని రేఖానాయక్ భర్త శ్యాం నాయక్ తీవ్ర వ్యాఖ్యలు చేశారు. భర్తలు ఉన్న మహిళలకు బీఆర్ఎస్లో గౌరవం లేదని అన్నారు. కాంగ్రెస్ నుంచి ఆసిఫాబాద్ టికెట్ కోసం దరఖాస్తు చేశానని, తనకు టికెట్ ఇస్తే రాష్ట్రంలో కాంగ్రెస్ను అధికారంలోకి తీసుకురావడానికి కృషి చేస్తానని ఆయన పేర్కొన్నారు.
