కాగజ్ నగర్, వెలుగు : సిర్పూర్ఎమ్మెల్యే కోనేరు కోనప్ప దౌర్జన్యాలను ప్రశ్నిస్తే అక్రమ కేసులు బనాయించి వేధిస్తున్నారని బీఎస్పీ అధ్యక్షుడు డా.ఆర్ఎస్ ప్రవీణ్ కుమార్ అన్నారు. మంగళవారం కాగజ్నగర్లోని పార్టీ ఆఫీసులో బీఆర్ఎస్ నేత రాజ్ కుమార్ యాదవ్ పార్టీలో చేరిన సందర్భంగా ఏర్పాటు చేసిన సమావేశంలో ఆయన మాట్లాడారు. జిల్లా ఎస్పీ సురేశ్కుమార్సహా అధికారులందరూ ఉత్సవ విగ్రహాలుగా మారి, కోనప్ప చేతిలో బందీ అయ్యారని ఆరోపించారు.
15 ఏండ్లు ఎమ్మెల్యేగా ఉండి కనీసం రోడ్లు కూడా వేయలేని ఎమ్మెల్యే ఏం ముఖం పెట్టుకుని పల్లెల్లో తిరుగుతున్నారని ప్రశ్నించారు. ఈ సందర్భంగా బీఆర్ఎస్, బీజేపీలకు చెందిన పలువురు బీఎస్పీలో చేరారు. బెంగాలీ క్యాంప్ నెంబర్ 7 లో ఎన్నికల ప్రచారం నిర్వహించారు. బీఎస్పీ రాష్ట్ర కార్యనిర్వాహక కమిటీ కార్యదర్శి అర్షద్ హుస్సేన్,రాష్ట్ర కార్యదర్శి సిడెం గణపతి, జిల్లా ఇంఛార్జి సోయం చిన్నయ్య పాల్గొన్నారు.
ప్రవీణ్ కుమార్ వాహనాన్ని ఢీకొట్టిన లారీ
కాగజ్ నగర్ సమీపంలోని పెడవాగు దగ్గర ఓ కార్యక్రమంలో పాల్గొని వస్తున్న ప్రవీణ్ కుమార్ వాహనానికి ప్రమాదం జరిగింది. ఆయన కారును ఓ లారీ వెనుక నుంచి ఢీ కొట్టింది. దీంతో కారు డ్యామేజీ అయ్యింది. ప్రవీణ్ కుమార్ సహా మిగిలిన వారంతా సురక్షితంగా ఉండడంతో ఊపిరి పీల్చుకున్నారు.
