- బీఏస్పీ రాష్ట్ర కో ఆర్డినేటర్ ప్రవీణ్ కుమార్
దుబ్బాక, వెలుగు: పాడి పంటలతో సుభిక్షంగా బతికిన మల్లన్నసాగర్ నిర్వాసితులు నేడు చెట్టుకొకరు, పుట్టకొకరుగా దుర్భరంగా బతుకీడుస్తున్నారని బీఏస్పీ రాష్ట్ర కో ఆర్డినేటర్ప్రవీణ్ కుమార్అన్నారు. బలవంతంగా వ్యవసాయ భూములను గుంజుకున్న కేసీఆర్ ప్రభుత్వం నిర్వాసితులకు నాసిరకం ఇళ్లను నిర్మించి చేతులు దులుపుకొందని ఆరోపించారు. సిద్దిపేట జిల్లా దుబ్బాకలో మంగళవారం నిర్వహించిన బహుజన రాజ్యాధికార ప్రతిజ్ఞ సభలో ఆయన మాట్లాడారు. మల్లన్నసాగర్ ప్రాజెక్టు పేరుతో దోచుకున్నోళ్లంతా ఏసీ రూముల్లో ఉంటే నిర్వాసితులకు మాత్రం నాసిరకం ఇండ్లు దిక్కయ్యాయన్నారు.
నీళ్లు, నిధులు, నియామకాల పేరుతో అధికారంలోకి వచ్చిన కేసీఆర్ కుటుంబపాలనకు చరమగీతం పాడాలని ప్రవీణ్ కుమార్ అన్నారు. తెలంగాణ ప్రజలకు డబుల్ బెడ్రూం ఇండ్లు ఇస్తానని మోసం చేసిన టీఆర్ఎస్ ప్రభుత్వాన్ని గద్దె దించడమే లక్ష్యంగా పనిచేయాలని ఎస్సీ, ఎస్టీ, బీసీ, మైనార్టీ, అగ్రవర్ణ పేదలకు పిలుపునిచ్చారు. ప్రభుత్వ స్కూళ్లను నిర్వీర్యం చేసే కుట్రలో కేసీఆర్ ఉన్నారని, అందుకే జనాభాలో 85 శాతం ఉన్న బహుజనులను బానిసలుగా చేయడానికి బర్లు, గొర్లు, దళితబంధు పథకాలతో మభ్య పెడుతున్నారని ఆరోపించారు. నీలి కండువాలతో అసెంబ్లీకి పోతే ప్రజా దోపిడీనంతా బయటకు తీయొచ్చని పేర్కొన్నారు. కేసీఆర్ పాలనలో అగ్రవర్ణాలు సంపన్నులైతే అణగారిన వర్గాలను మాత్రం చర్లపల్లి జైలులో పెట్టి రాక్షస పాలన కొనసాగిస్తున్నారన్నారు. దుబ్బాక గడ్డకు గొప్ప చరిత్ర ఉందని, రాబోయే ఎన్నికల్లో చరిత్రను తిరగరాయాలని పిలుపునిచ్చారు.