- అదీ అటవీ భూమే.. ఎన్ఓసీ ఇవ్వకుండా అడ్డంకులు
- జీసీ లింక్తో లంకె.. అన్ని రాష్ట్రాల మధ్య సయోధ్య కుదిరితే అనుమతులు ఈజీ
హైదరాబాద్, వెలుగు: సమ్మక్కసాగర్ ప్రాజెక్టుకు చత్తీస్గఢ్ ప్రభుత్వం అడ్డుపుల్ల వేస్తున్నది. బ్యారేజీతో ఆ రాష్ట్రానికి పెద్దగా నష్టం లేకపోయినా.. ఏదో అయిపోతున్నదన్నట్టుగా పేచీ పెడుతున్నది. ప్రస్తుతం ఈ బ్యారేజీకి చత్తీస్గఢ్ నుంచి ఎన్వోసీ వస్తే తప్ప.. కేటాయింపులు, అనుమతులు వచ్చే పరిస్థితి లేదు. కానీ, ఆ రాష్ట్రం మాత్రం తమ భూభాగంలో ముంపు లేకుండా ఉంటేనే ఎన్వోసీ ఇస్తామని, బ్యారేజీ ఎత్తును తగ్గించాలని పట్టుబడుతున్నది. వాస్తవానికి సమ్మక్కసాగర్ బ్యారేజీని 87 మీటర్ల ఎత్తుతో డిజైన్ చేశారు.
కానీ, ఆ ఎత్తుతో చత్తీస్గఢ్లో కేవలం 50 ఎకరాల భూమి మునుగుతున్నది. అది కూడా అటవీ భూమే. ఆ భూమితో పెద్దగా ప్రయోజనం లేకపోయినా.. ముంపునకు గురవుతున్నది రైతుల వ్యవసాయ భూములు కాకపోయినా ఎప్పటికప్పుడు అడ్డుపుల్ల వేస్తోంది. పలుమార్లు రాష్ట్ర సర్కారు, అధికారులు చత్తీస్గఢ్ ప్రభుత్వానికి ఎన్వోసీపై విజ్ఞప్తులు చేసినా ఆ రాష్ట్రం మాత్రం పట్టించుకోవడం లేదు. ఈ బ్యారేజీని ఒక ఏడాదిలో 50 టీఎంసీల నీటిని ఎత్తిపోసుకునేలా డిజైన్ చేయగా.. వాటి అనుమతులు, కేటాయింపుల కోసం రాష్ట్ర ప్రభుత్వం తీవ్ర ప్రయత్నాలు చేస్తున్నది.
జీసీ లింక్తో లంకె..
సమ్మక్కసాగర్ బ్యారేజీకి గోదావరి కావేరి లింక్ (జీసీ లింక్) ప్రాజెక్టుతో లంకె ఏర్పడింది. కేంద్ర ప్రభుత్వం జీసీ లింక్లో భాగంగా ఇచ్చంపల్లి వద్ద బ్యారేజీని నిర్మించి నీటిని తరలిస్తామని చెబుతున్నా.. రాష్ట్ర ప్రభుత్వం మాత్రం తుపాకులగూడెం వద్ద ఇప్పటికే సిద్ధంగా ఉన్న సమ్మక్కసాగర్ బ్యారేజీని వాడుకోవాలని చెబుతున్నది. అయితే, చత్తీస్గఢ్ ప్రభుత్వం 83 మీటర్ల ఎత్తు వరకు మాత్రమే నీటిని వాడుకోవాలని కండీషన్ పెడుతున్నది. తద్వారా తమ రాష్ట్రంలో ముంపు లేకుండా చూడాలని అంటున్నది. వాస్తవానికి జీసీ లింక్లో భాగంగా 148 టీఎంసీలను కేంద్రం తమిళనాడుకు తరలించాలనుకుంటుండగా.. అందులో 50 శాతం అంటే 74 టీఎంసీల నీళ్లను ఇవ్వాలని మన రాష్ట్రం డిమాండ్ చేస్తున్నది.
డైవర్షన్ మన భూభాగం నుంచే చేస్తుండడం.. బ్యారేజీ కూడా ఇక్కడే ఉండడంతో సగం వాటా కోసం పట్టుబడుతున్నది. ఇటు ఏపీ, మహారాష్ట్ర, కర్నాటక రాష్ట్రాలూ తమకు వాటా ఇవ్వాలని డిమాండ్ చేస్తుండడంతో జీసీ లింక్ త్రిశంకు స్వర్గంలో పడినట్టయింది. ఈ నేపథ్యంలోనే జీసీ లింక్ పై అన్ని రాష్ట్రాల మధ్య సయోధ్య కుదిరితే బ్యారేజీకి ఈజీగా అనుమతులు వస్తాయని అధికారులు చెబుతున్నారు.
చత్తీస్గఢ్ నుంచి కూడా ఎన్వోసీ వస్తుందని అంటున్నారు. ప్రాజెక్టుకు అనుమతులు లభిస్తే రోజూ 6,500 క్యూసెక్కుల నీటిని ఎత్తిపోసుకునేందుకు వీలవుతుందని చెబుతున్నారు. దేవాదుల లిఫ్ట్కు ఇబ్బందులు తప్పుతాయని పేర్కొంటున్నారు. ప్రస్తుతం కేవలం 60 రోజులు మాత్రమే నీటిని లిఫ్ట్ చేసుకుంటుండగా.. అనుమతులొచ్చాక నీటిని స్టోర్ చేసుకుంటే 180 రోజుల పాటు లిఫ్ట్ చేసుకునేందుకు అవకాశం ఉంటుందని అధికార వర్గాలు అంటున్నాయి.
