న్యూఢిల్లీ : అరుణాచల్ ప్రదేశ్ తమదంటూ వాదిస్తున్న చైనా తాజాగా మరోసారి కవ్వింపులకు పాల్పడింది. ఎల్ఏసీ వెంట ఉన్న అరుణాచల్లోని 30 ప్రాంతాలకు కొత్త పేర్లు పెట్టింది. ఈమేరకు చైనా పౌర వ్యవహారాల మంత్రిత్వ శాఖ, అడ్మినిస్ట్రేటివ్ డివిజన్స్ నాలుగో లిస్ట్ రిలీజ్ చేశాయి. ఈ వివరాలను చైనా అధికారిక పత్రిక సౌత్ చైనా మార్నింగ్ పోస్ట్ ప్రచురించింది. అరుణాచల్ ప్రదేశ్ ప్రాంతాన్ని చైనా ‘జాంగ్నన్’ అంటూ వ్యవహరిస్తోంది. తాజాగా పేర్లు పెట్టుకున్న వాటిలో 11 రెసిడెన్షియల్ ఏరియాలు, 12 పర్వతాలు, నాలుగు నదులు, ఒక చెరువు, ఒక పర్వత ప్రాంత రహదారి, కొంత భూమి కూడా ఉన్నది. ఆ పేర్లు ఏంటనే దానిపై క్లారిటీ లేనప్పటికీ.. చైనా క్యారెక్టర్లు, టిబెటన్, పిన్యిశ్ భాషల్లో ఉన్నట్టు తెలుస్తున్నది.
‘స్టేట్ కేబినెట్ భేటీలో 30 ప్రదేశాలకు పేర్లు నిర్ణయించాం. నిబంధనలకు అనుగుణంగా చైనాలోని జాంగ్నన్ భూభాగంలోని ప్రాంతాలకు పేర్లు పెట్టాం. కొత్త జాబితాను రిలీజ్ చేశాం. మే 1 నుంచి ఈ పేర్లు అమల్లోకి వస్తాయి’ అంటూ పౌర వ్యవహారాల మంత్రిత్వ శాఖ వెల్లడించినట్లు ఈ కథనం పేర్కొంది. అరుణాచల్ప్రదేశ్లోని ఆరు ప్రదేశాలకు పేర్లు నిర్ణయిస్తూ 2017లో ఫస్ట్ లిస్ట్ను, 2021లో 15 ప్రదేశాలతో సెకండ్ జాబితాను, 2023లో మరో 11 ప్రదేశాలకు పేర్లు పెట్టి మూడో లిస్ట్ను చైనా విడుదల చేసింది. తాజాగా 30 ప్రదేశాలకు పేర్లు పెట్టి నాలుగో లిస్ట్ను రిలీజ్ చేసింది.
అరుణాచల్ ఎప్పటికీ మాదే: జైశంకర్
అరుణాచల్ ప్రదేశ్ ఇండియాలో అంతర్భాగమని విదేశాంగ శాఖ మంత్రి జైశంకర్ స్పష్టంచేశారు. ప్రదేశాల పేర్లు మార్చినంత మాత్రాన.. ఓనర్లు మారరని అన్నారు. ‘ఓ ఇంటికి నా పేరు పెట్టుకుంట.. అప్పుడు ఆ ఇల్లు నాదే అవుతుందా? కొన్ని ప్రాంతాలకు చైనా తన భాషలో పేర్లు పెట్టుకున్నంత మాత్రాన అవి ఆ దేశానివి కావు. ఎప్పటికీ ఆ ప్రదేశాలు ఇండియాలోనే ఉంటాయి’ అని జైశంకర్ స్పష్టం చేశారు.
