హైదరాబాద్ లోని చౌమహల్లా ప్యాలెస్ను 5 రోజులపాటు మూసివేయనున్నారు. ఎనిమిదో నిజాం ముకరంజా బహదూర్ టర్కీలోని ఇస్తాంబుల్ లో తుదిశ్వాస విడిచిన విషయం తెలిసిందే. ఆయన అంత్యక్రియలను హైదరాబాద్ లో నిర్వహించేందుకు ఏర్పాట్లు చేస్తున్నారు. దీనికి సంబంధించి మక్కా మసీదు ఆవరణలో సన్నాహాలు ప్రారంభమయ్యాయి. చౌమహల్లా ప్యాలెస్ లో ఐదు రోజుల పాటు నిజాం నవాబుల బంధువులు, స్నేహితుల సందర్శనార్థం పార్థివదేహాన్ని ఉంచనున్నారు. ఈ నేపథ్యంలో సందర్శకులను అనుమతించబోమని నిర్వాహకులు స్పష్టం చేశారు. చౌమహల్లా ప్యాలెస్ నిజాం నవాబు నివాస భవనం. దీనిని 1750లో నిర్మించారు. నాలుగు మహళ్ల సముదాయమే ఈ చౌమహల్లా ప్యాలెస్.
