వచ్చే ఏడాది జరగబోయే ఆస్కార్ అవార్డు వేడుకలో హోస్ట్ గా చేసే ప్రతిపాదనను హాస్య నటుడు క్రిస్ రాక్ తిరస్కరించారు. ఈ ఏడాది మార్చిలో జరిగిన అవార్డ్ ఫంక్షన్ లో నటుడు విల్ స్మిత్, క్రిస్ రాక్ ను వేదికపైనే చెంపదెబ్బ కొట్టాడు. అయితే తాజాగా అరిజోనాలోని ఫీనిక్స్లోని అరిజోనా ఫైనాన్షియల్ థియేటర్లో జరిగిన ఓ ఈవెంట్ లో క్రిస్ ఆస్కార్కు తిరిగి వెళ్లడాన్ని నేరం జరిగిన ప్రదేశానికి తిరిగి వెళ్లడంగా అభివర్ణించారు. చెంపదెబ్బ ఘటన తర్వాత సూపర్ బౌల్ యాడ్లో కనిపించడానికి కూడా తాను నిరాకరించానని క్రిస్ రాక్ చెప్పాడు.
ఆస్కార్స్ 2022 అవార్డుల ప్రదానం సందర్భంగా.. నటుడు విల్ స్మిత్, స్టేజ్పై మాట్లాడుతున్న సమయంలో నే అమెరికన్ కమెడియన్ క్రిస్ రాక్ చెంప చెల్లుమనిపించాడు. బెస్ట్ డాక్యుమెంటరీ ఫీచర్ కాటగిరీలో అవార్డు ఇవ్వడానికి స్టేజ్ ఎక్కిన క్రిస్.. ఏదో మాట్లాడుతూ విల్ స్మిత్ భార్య, నటి జాడా పింకెట్ స్మిత్ గుండు తల మీద జోక్ పేల్చాడు. అనారోగ్యం కారణంగా గుండు చేయించుకున్న జాడా పింకెట్ స్మిత్ పై కామెంట్ చేసేసరికి స్మిత్ చూస్తూ ఉండలేకపోయాడు. అప్పటివరకూ మామూలుగా ఉన్న వ్యక్తి కాస్తా సడెన్ గా కోపంతో రగిలిపోయాడు. వెంటనే స్టేజ్ మీదకు సీరియస్గా నడ్చుకుంటూ వెళ్లి క్రిస్ దవడ పగలకొట్టాడు. ఆ తర్వాత ఉత్తమ నటుడి అవార్డు తీసుకున్న టైంలో భావోద్వేగానికి గురై కన్నీళ్లు పెట్టుకున్న విల్ స్మిత్.. క్రిస్ పట్ల వ్యవహరించిన తీరుకు క్షమాపణలు తెలియజేశాడు.
