వైసీపీ అధినేత, మాజీ సీఎం వైఎస్ జగన్పై సీఎం చంద్రబాబు తీవ్ర విమర్శలు చేశారు. సీఎంగా, పార్టీ నాయకుడిగా, కొడుకుగా, అన్నగా.. చివరికి ఓ పౌరుడిగా కూడా జగన్ విఫలమయ్యారని ఘాటు వ్యాఖ్యలు చేశారు. రక్తబంధాలకు కూడా విలువ ఇవ్వని వ్యక్తి ప్రజలకు ఏం విలువ ఇస్తారని ప్రశ్నించారు. రాష్ట్రంలో కొందరు చేస్తున్న అరాచకాల వల్ల ఏపీ ప్రతిష్ఠ దెబ్బతింటోందని, పెట్టుబడులు పెట్టేందుకు పారిశ్రామికవేత్తలు వెనుకడుగు వేసే పరిస్థితులు ఏర్పడుతున్నాయని ఆరోపించారు.
రాష్ట్రాన్ని అభివృద్ధి పథంలో నెంబర్-1గా నిలపాలన్నదే తమ లక్ష్యమని చంద్రబాబు స్పష్టం చేశారు. అయితే ఇలాంటి వ్యక్తులు అడ్డుపడితే అభివృద్ధి కుంటుపడుతుందని ఆగ్రహం వ్యక్తం చేశారు. పారిశ్రామికవేత్తల్లో నమ్మకం కల్పించేందుకు ఎస్క్రో ఖాతా ద్వారా పారిశ్రామిక ప్రోత్సాహకాలు అందిస్తున్నామని వెల్లడించారు. రాష్ట్రానికి పెట్టుబడులు రావాలంటే ప్రశాంతమైన వాతావరణం, ప్రభుత్వంపై విశ్వాసం ఉండాలని పేర్కొన్నారు.
గత ఐదేళ్లలో ప్రజలు భయంతో గడిపారు
2019-24 మధ్య రాష్ట్ర ప్రజలు నిద్రలేని రాత్రులు గడిపారని చంద్రబాబు అన్నారు. కనీసం రోడ్లపైకి రావడానికి కూడా భయపడే పరిస్థితులు ఉండేవని విమర్శించారు. ప్రస్తుతం అలాంటి పరిస్థితులు ఎక్కడా లేవని, ప్రజలంతా ప్రశాంతంగా ఉన్నారని పేర్కొన్నారు. ఒక్క నిమిషం ఏమరుపాటుగా ఉన్నా వైఎస్సార్‌సీపీకి చెందిన కొందరు వ్యక్తులు నిలువునా ముంచేస్తారని ఆరోపించారు.
గతంలో జగన్‌ను రాష్ట్రానికి రానీయకుండా అమెరికాలోనే ఉంచాలని ఆయన తండ్రి వైఎస్ రాజశేఖర్ రెడ్డి భావించారని చంద్రబాబు వ్యాఖ్యానించారు. అయితే ఈ వ్యాఖ్యలకు సంబంధించిన మరిన్ని వివరాలను ఆయన వెల్లడించలేదు.
అసెంబ్లీకి రావడం లేదని విమర్శలు
ప్రజల సమస్యలపై చర్చించేందుకు అసెంబ్లీకి రావాలని జగన్‌ను కోరుతున్నా ఆయన రావడం లేదని చంద్రబాబు విమర్శించారు. నేర చరిత్ర ఉన్న వ్యక్తులను ఎన్నుకోవడం వల్ల సమాజానికి భద్రత ఉంటుందా అనే విషయాన్ని ప్రజలు ఆలోచించాలని సూచించారు. ఎవరి చరిత్ర ఏమిటో అర్థం చేసుకుని వ్యవహరించాలని కోరారు.
కూటమి ప్రభుత్వం ప్రజాహితం కోసం రాజ్యాంగబద్ధంగా పనిచేస్తోందని చంద్రబాబు తెలిపారు. రాజకీయ నాయకులందరి చరిత్ర ప్రజలకు తెలిసిన విషయమేనని, ఎవరు మంచి చేశారో గుర్తించి వారికి మద్దతు ఇవ్వడం ద్వారా ప్రజాస్వామ్యాన్ని గెలిపించాలని పిలుపునిచ్చారు.
