హైదరాబాద్, వెలుగు: రాష్ట్ర ఖజానాను నింపేందుకు తెలంగాణ యువతను సీఎం కేసీఆర్ మద్యానికి బానిసలు చేస్తున్నారని సీడబ్ల్యూసీ సభ్యురాలు అల్కా లాంబా అన్నారు. రూ.36 వేల కోట్లకు పైగా మద్యాన్ని అమ్మి.. ప్రజలను దోచుకుంటున్నారని మండిపడ్డారు. కొన్ని వేల మంది వ్యాపారుల నుంచి లైసెన్స్ ఫీజుల రూపంలో రూ.వేల కోట్లు ఆర్జించారన్నారు. శుక్రవారం ఆమె గాంధీ భవన్లో మీడియాతో మాట్లాడారు. యువతకు కావాల్సింది మద్యం కాదని, ఉద్యోగాలని అన్నారు. కాంగ్రెస్ అధికారంలోకి వచ్చాక యువతకు ఉపాధి కల్పిస్తామని హామీ ఇచ్చారు. తెలంగాణ కేంద్రంగా కరోనా టైమ్‌లో లిక్కర్ స్కాంజరిగిందని, కేసీఆర్ కూతురు కవిత, ఢిల్లీ సీఎం కేజ్రీవాల్ ఈ స్కాంలో ఉన్నారని ఆరోపించారు. బీజేపీ, బీఆర్ఎస్ మధ్య ఒప్పందం జరిగినందు కవితను అరెస్ట్ చేయట్లేదని ఆరోపించారు. బీఆర్ఎస్ లీడర్లు జైలుకెళ్లడం ఖాయమన్నారు.
