నిరుద్యోగుల జీవితాలతో ఆటలొద్దు... సీఎం రేవంత్రెడ్డి

విద్యార్థుల శవాల మీద బీఆర్ఎస్ను బతికించుకోవాలని చూస్తున్నరు: సీఎం రేవంత్రెడ్డి
కేటీఆర్ , హరీశ్కు దమ్ముంటే ఓయూలో ఆమరణ నిరాహార దీక్ష చేయాలి
పదేండ్లు నిరుద్యోగులను గోస పుచ్చుకున్నరు
మేం వెంటవెంటనే ఉద్యోగాలు భర్తీ చేస్తుంటే అడ్డుకుంటున్నరు
పోటీ పరీక్షలు వాయిదా వేస్తే కోచింగ్సెంటర్లే లాభపడ్తయ్
అందుకే కిరాయి మనుషులతో ధర్నాలు చేయిస్తున్నరు
కేసీఆర్.. నీకు ముందుంది ముసళ్ల పండుగ
చేతనైతే రాష్ట్రాభివృద్ధికి సహకరించు.. లేకపోతే ఫామ్హౌస్ల పండుకొని ఏడ్వు
కాళ్లలో కట్టెపెట్టాలని చూస్తే వీపులు విమానం మోతేనని హెచ్చరిక

మహబూబ్నగర్, వెలుగు: నిరుద్యోగుల భావోద్వేగాలతో రాజకీయ లబ్ధి పొందేందుకు కేటీఆర్, హరీశ్రావు కుట్ర చేస్తున్నారని.. విద్యార్థుల శవాల మీద బీఆర్ఎస్ పార్టీని బతికించుకోవాలని చూస్తున్నారని సీఎం రేవంత్రెడ్డి మండిపడ్డారు. ‘‘డీఎస్సీని వాయిదా వేయాలని స్టూడెంట్లను రెచ్చగొడ్తున్న హరీశ్, కేటీఆర్కు దమ్ముంటే ఉస్మానియా యూనివర్సిటీ ఆర్ట్స్కాలేజీ ముందు ఆమరణ నిరాహార దీక్షకు దిగాలి. మిమ్మల్ని ఎవరూ ఆపరు.. మేమే మీకు కాపలా ఇస్తం. ఎన్ని రోజులు దీక్ష చేస్తరో చూద్దాం. మీ బావబామ్మర్దులిద్దరికీ నిజంగా నిరుద్యోగుల మీద ప్రేమ ఉంటే ఆర్ట్స్ కాలేజీ వద్దకు రండి” అని ఆయన సవాల్ విసిరారు.

పోటీ పరీక్షలు వాయిదా వేస్తే ప్రభుత్వానికి వచ్చే నష్టం లేదని, కానీ లక్షలాది మంది నిరుద్యోగుల జీవితాలు ఆగమైతాయని, కోచింగ్ సెంటర్లు లాభపడుతాయని తెలిపారు. నిరుద్యోగుల జీవితాలతో ఆటలాడొద్దన్నారు. మహబూబ్నగర్ జిల్లా కేంద్రంలో మంగళవారం సాయంత్రం ఏర్పాటు చేసిన కాంగ్రెస్ ముఖ్య కార్యకర్తల సమావేశానికి సీఎం రేవంత్ చీఫ్ గెస్ట్గా హాజరై మాట్లాడారు. ‘‘కేసీఆర్ ఎప్పుడు బలహీనపడతడో, పతనం అయితడో అప్పుడు విద్యార్థులను రెచ్చగొడ్తడు. వారిని సావగొట్టి వారి శవాల మీద పార్టీని బతికించుకోవాలనే ప్రయత్నం చేస్తడు.

ఆరు అడుగులు ఉన్న హరీశ్రావు తెలంగాణ ఉద్యమంలో 100 రూపాయలు పెట్టి పెట్రోల్ తెచ్చుకున్నడు.. కానీ, పది పైసలు పెట్టి అగ్గిపెట్టె తెచ్చుకోలే. ఈయన నాడు డ్రామా ఆడితే అది నిజమని నమ్మిన శ్రీకాంతాచారి లాంటి వందలాది మంది తెలంగాణ రాష్ట్రం కోసం ప్రాణత్యాగం చేసుకున్నరు. కానీ, కేసీఆర్ కుటుంబంలో ఒక్కరైనా బలిదానం చేసుకున్నరా?’’ అని సీఎం నిలదీశారు. ఇప్పుడు అధికారం కోల్పోయిన బీఆర్ఎస్ నేతలు మళ్లీ అలాంటి యాక్టింగ్ మొదలుపెట్టారని ఆగ్రహం వ్యక్తం చేశారు.

పదేండ్లు నిరుద్యోగులను పట్టించుకోని కేసీఆర్.. 2022లో డీఎస్సీ నోటిఫికేషన్ ఇచ్చి ఆ తర్వాత ఎందుకు ఆ పరీక్షలు నిర్వహించలేదని సీఎం రేవంత్రెడ్డి ప్రశ్నించారు. క్యాలెండర్ డేట్ ప్రకారం కాంగ్రెస్ ప్రభుత్వం డీఎస్సీ నోటిఫికేషన్ ఇచ్చి పరీక్షలు పెడుతుంటే బీఆర్ఎస్ నేతలు అడ్డుకుంటున్నారని మండిపడ్డారు. ‘‘డీఎస్సీ ఎగ్జామ్ను పోస్టుపోన్ చేయాలని మోతీలాల్అనే లంబాడీ బిడ్డను రెచ్చగొట్టి దీక్షకు కూర్చోబెట్టిన్రు. తర్వాత ఒక దళిత వ్యక్తిని కూర్చోబెట్టిన్రు.

ఇప్పుడు మరో కోచింగ్ సెంటర్ ఆయన వచ్చి దీక్షలో కూర్చున్నడు. ఎందుకు మోతీలాల్ కూర్చోవాలె? ఎందుకు జడ్స్ కూర్చోవాలె? నేను హరీశ్రావు, కేటీఆర్కు సవాల్ విసురుతున్నా. మీ ఇద్దరు దీక్షలో కూర్చోండి. మీరు సావనైనా సావాలె. పరీక్షలు వాయిదా అన్నా పడాలె. మీకు ధైర్యం ఉందా? ఉస్మానియా యూనివర్సిటీలోని ఆర్ట్స్ కాలేజీ దగ్గరికి రండి. ఆమరణ దీక్షకు కూర్చోండి” అని సీఎం రేవంత్ అన్నారు. ‘‘ఇప్పటికే నిరుద్యోగులు ఏండ్ల తరబడి హైదరాబాద్ లో ఉండి పోటీ పరీక్షలకు ప్రిపేర్ అయిన్రు. ఇంకా కోచింగ్ సెంటర్లలో వేల రూపాయలు ఫీజులు కట్టాల్సిన పని లేకుండా మా ప్రభుత్వం వెంబడి వెంబడే పరీక్షలు పెట్టి ఉద్యోగాలు ఇస్తామంటున్నది.

ఒక వేళ పరీక్ష రాసి ప్రభుత్వఉద్యోగం రానివాళ్లు, ఏదైనా ప్రైవేట్ జాబ్ చూసుకొని సెటిలయ్యే అవకాశం ఉంది. ఇందులో తప్పేముంది? మీలాగా(బీఆర్ఎస్) పరీక్షలు నిర్వహించి ఫలితాలు ఇవ్వకుండా ఉంటే పేద పిల్లలు కోచింగ్ సెంటర్ల చుట్టూ తిరిగి, ఇంటికి రాలేక, పట్నంలో ఉండలేక అన్ని రకాలుగా దెబ్బతినే ప్రమాదం లేదా?’’ అని సీఎం ప్రశ్నించారు. పోటీ పరీక్షలను పోస్టు పోన్ చేస్తే నష్టపోయేది విద్యార్థులైతే లాభపడేది కోచింగ్ సెంటర్లని అన్నారు. ‘‘2022లో నోటిఫికేషన్లు ఇచ్చిన కేసీఆర్ అప్పుడే ఎందుకు పరీక్షలు పెట్టలేదు. ఈ రెండేండ్లుగా నిరుద్యోగులు చదువుతూనే ఉన్నారు. కోచింగ్ సెంటర్ల చుట్టూ తిరుగుతూనే ఉన్నారు. వాయిదా వేస్తే కోచింగ్ సెంటర్లు నడుపుకోవచ్చని వాటి నిర్వాహకులు పైరవీలు కూడా చేస్తున్నరు. నిరుద్యోగుల బలహీనతలను వ్యాపారంగా మార్చుకోవాలని కొందరు ఆర్టిఫిషియల్ ఉద్యమాలను మన కండ్లకు కట్టినట్లు చూపించే ప్రయత్నం చేస్తున్నరు” అని మండిపడ్డారు.

గ్రూప్ 1 ఆగిపోవాలని చూస్తున్నరు

‘‘గత బీఆర్ఎస్ ప్రభుత్వం 2022లో గ్రూప్ వన్ నోటిఫికేషన్ ఇచ్చి పరీక్షలు పెడితే.. ప్రశ్నప్రతాలు లీకై జిరాక్స్ సెంటర్లు, చౌరస్తాల్లో అమ్ముకున్న పరిస్థితి. దీంతో పరీక్షలు రద్దయ్యాయి. కాంగ్రెస్ అధికారంలోకి రాగానే గ్రూప్-1 నోటిఫికేషన్ ఇచ్చి ప్రిలిమ్స్ ఎగ్జామ్స్ నిర్వహించినం. 3 లక్షల మంది పరీక్షలు రాస్తే.. 31 వేల మంది మెయిన్స్కు క్వాలిఫై అయిన్రు.

ఇప్పుడు మెయిన్స్ ఎగ్జామ్స్ పెట్టాలంటే 1:50 రేషియోలో కాకుండా 1:100 పిలవాలని బీఆర్ఎస్ అంటున్నది. 1:100 పిలువగానే కోర్టు స్టే ఇస్తదనే దొంగ ఆలోచన చేస్తున్నరు. నోటిఫికేషన్లో 1:50 ఇచ్చి, పరీక్షలు అయిపోయాక 1:100 ఎలా ఇస్తారని కోర్టు పరీక్షలు రద్దు చేస్తే పరిస్థితి మళ్లీ మొదటికొస్తది. నిరుద్యోగులు ఆలోచించాలి’’ అని సీఎం రేవంత్రెడ్డి పేర్కొన్నారు. 2011 తర్వాత 13 ఏండ్లుగా గ్రూప్ వన్ జరగలేదని, డిసెంబర్లోగా వెయ్యి మంది ఆఫీసర్లను చేయాలని తాము ప్రయత్నిస్తుంటే, ఈ దొంగలు పరీక్షలను పోస్టుపోన్ చేయాలని అనుకుంటున్నారని బీఆర్ఎస్ నేతలపై ఫైర్ అయ్యారు.

మోదీ చుట్టూ కేటీఆర్, హరీశ్ పిల్లుల్లాగా తిరుగుతున్నరు

అసెంబ్లీ ఎన్నికలు జరిగిన నెల తిరగక ముందే తమ ప్రభుత్వాన్ని పడగొడ్తామని బీజేపీ, బీఆర్ఎస్ నేతలు కామెంట్లు చేశారని, మూడు నెలలు కూడా ఉండనీయమని మాట్లాడారని సీఎం రేవంత్రెడ్డి అన్నారు. ‘‘ఇప్పుడు ఏమైంది? ఈ భూమి మీద బీఆర్ఎస్ ఉండదు. పాతాళానికి పోయింది. కాంగ్రెస్ పార్టీ కార్యకర్తలతో పెట్టుకుంటే నీ (కేసీఆర్) పార్టీకి పుట్టగతులుండవని ఆ రోజే చెప్పిన. మా పార్టీ కార్యకర్తల ఉసురుతో దుమ్ము కొట్టుకుపోతావ్. నీకు రాజకీయంగా మనుగడ లేదు.

ఇప్పటికైనా అర్థం చేసుకో. రాష్ట్రాన్ని అభివృద్ధి పథంలో నడిపించాలని మేం కష్టపడుతున్నం. తెలంగాణ ప్రజలకు నువ్వు క్షమాపణ చెప్పాలి. రాష్ట్రాన్ని అభివృద్ధి చేస్తున్న కాంగ్రెస్కు అడ్డుపడకుండా శాతనైతే సహకరించు. లేకుంటే ఫామ్హౌస్లో పడుకొని ఏడ్వు” అని కేసీఆర్పై ఫైర్ అయ్యారు. ప్రజా ప్రభుత్వం కాళ్లలో కట్టే పెట్టడానికి తండ్రీకొడుకు, మామాఅల్లుడు(కేసీఆర్, కేటీఆర్, హరీశ్రావు) చూస్తున్నారని, కాళ్లలో కట్టె పెట్టాలని చూస్తే వీపులు విమానం మోత మోగుతాయని ఆయన హెచ్చరించారు. ‘‘తన దాక వస్తేగాని తెల్వదన్నట్లుగా ఈ రోజు కేసీఆర్ దాకా వస్తేగాని తెలుస్తలేదు. నాలుగు రోజులుగా హరీశ్, కేసీఆర్ ఢిల్లీలో మోదీ చుట్టూ పిల్లుల్లాగా తిరుగుతున్నరు. ఏదో ఒకటి చేసి తమను ఎట్లయినా కాపాడండని మోదీని అడుగుతున్నరు” అని సీఎం అన్నారు.

కేసీఆర్కు ముందుంది ముసళ్ల పండుగ

‘‘తాము చెప్పినట్లు ఈ ప్రభుత్వం వింటలేదని బీఆర్ఎస్ లీడర్లు అంటున్నరు. పదేండ్లు కాంగ్రెస్ కార్యకర్తలను కొట్టి, సంపి, కేసులుపెట్టి, జైలులో పెట్టినప్పుడు కేసీఆర్కు ఈ దుఃఖం ఎక్కడికిపోయింది. అప్పుడు నీ హయాంలో రాజనీతి, ప్రజాస్వామం ఏమయ్యాయి?’’ అని కేసీఆర్ను సీఎం రేవంత్రెడ్డి నిలదీశారు. ‘‘నీలాగా దొంగ దెబ్బ తీస్తలేం. అక్రమ కేసులు పెడ్తలేం. బాజాప్త ప్రజలతో ఎన్నికై ఇక్కడికి వచ్చినం. ఆరు నెలల్లో అంతా అయిపోయిందని ఏదేదో మాట్లాడినవ్.

కేసీఆర్..! నీకు ముందుంది ముసళ్ల పండుగ. ఆ ఎమ్మెల్యే పోయిండు.. ఈ ఎమ్మెల్సీ మారిండని సన్నాయి నొక్కులు నొక్కుతున్నవ్. అప్పట్లో మా ఎమ్మెల్యేలను గద్దలాగా నువ్వు తన్నుకుపోయింది వాస్తవం కాదా?” అని ప్రశ్నించారు. సమావేశంలో మంత్రి జూపల్లి కృష్ణారావు, ఎంపీ మల్లు రవి, ఉమ్మడి పాలమూరు జిల్లా ఎమ్మెల్యేలు యెన్నం శ్రీనివాస్ రెడ్డి, జనంపల్లి అనిరుధ్రెడ్డి, జి.మధుసూదన్ రెడ్డి, వాకిటి శ్రీహరి, పర్ణికారెడ్డి, కసిరెడ్డి నారాయణ రెడ్డి, మేఘారెడ్డి, చిక్కడు వంశీకృష్ణ, వీర్లపల్లి శంకర్ తదితరులు పాల్గొన్నారు.

గత ప్రభుత్వం పదేండ్లు ఉద్యోగాలు భర్తీ చేయకుండా, పోటీ పరీక్షలు పెట్టకుండా నిరుద్యోగుల జీవితాలతో ఆడుకుంది. ఇప్పటికే నిరుద్యోగులు ఏండ్ల తరబడి హైదరాబాద్లో ఉండి పోటీ పరీక్షలకు ప్రిపేర్ అయిన్రు. ఇంకా కోచింగ్ సెంటర్లలో వేల రూపాయలు ఫీజులు కట్టాల్సిన పని లేకుండా మా ప్రభుత్వం వెంబడి వెంబడే పరీక్షలు పెట్టి ఉద్యోగాలు ఇస్తామంటుంటే కుట్ర చేస్తున్నరు. పరీక్షలు పోస్టుపోన్ చేస్తే కోచింగ్ సెంటర్లకు వంద కోట్ల ఫీజులు వస్తయ్.. అందుకే పరీక్షలు వాయిదా వేయించాలని కోచింగ్ సెంటర్ల మాఫియా కొందరు కిరాయి మనుషులను పెట్టి రోడ్లపై ధర్నాలు చేయిస్తున్నది.

- సీఎం రేవంత్రెడ్డి