బెంగళూరు: బీసీలు, దళితుల రిజర్వేష్లనను కర్నాటకలో కాంగ్రెస్ ప్రభుత్వం ముస్లింలకు బదలాయించిందని ప్రధాని నరేంద్ర మోదీ చేసిన ఆరోపణలపై సీఎం సిద్దరామయ్య తీవ్రంగా స్పందించారు. మోదీ చేసిన ఆరోపణల్లో నిజంలేదని ట్వీట్ చేశారు. ‘‘బీసీలు, దళితుల రిజర్వేషన్లను మా ప్రభుత్వం ముస్లింలకు ట్రాన్స్ ఫర్ చేసిందని ప్రధాని మోదీ పచ్చి అబద్ధాలు మాట్లాడుతున్నారు. అసలు అలాంటి ఆలోచనే మా పార్టీకి లేదు. మోదీ తన ఆరోపణలను నిరూపించాలి. లేకపోతే జాతికి క్షమాపణ చెప్పాలి.
ఇప్పటి వరకూ ఏ ఇతర ప్రధాని కూడా ఆ పదవిని ఇంతగా దిగజార్చలేదు” అని సిద్దు విమర్శించారు. ఓటమి భయంతోనో, అజ్ఞానంతోనే మోదీ అలాంటి వ్యాఖ్యలు చేస్తున్నారని ఎద్దేవా చేశారు. ‘‘ఎస్సీలు, ఎస్టీల రిజర్వేషన్లను ముస్లింలకు ఇస్తామని కాంగ్రెస్ ఎక్కడైనా చెప్పిందా? కాంగ్రెస్ పాలిత రాష్ట్రాల్లో అమలు చేసిందా? అలా జరిగిందంటే ఆ వివరాలను దేశ ప్రజల ముందు ఉంచాలి” అని సిద్దు డిమాండ్ చేశారు. రాజ్యాంగబద్ధమైన రిజర్వేషన్లను పార్లమెంట్ ఆమోదం లేకుండా ఏకపక్షంగా అమలు చేయడం సాధ్యం కాదని, ఈ విషయం ప్రధానికి తెలియకపోవడం బాధాకరమని సిద్దు వ్యాఖ్యానించారు.
