వనపర్తి, వెలుగు: నిష్పక్షపాతంగా, పారదర్శకంగా ఎలక్షన్ డ్యూటీ చేయాలని కలెక్టర్ తేజస్ నందలాల్ పవార్ సూచించారు. సోమవారం కలెక్టరేట్లోని ప్రజావాణి హాల్లో టెలీ కాన్ఫరెన్స్ ద్వారా కోడ్ ఆఫ్ కండక్ట్, ఎంప్లాయీస్ రోల్పై దిశానిర్దేశం చేశారు. ఇంజినీరింగ్ విభాగం ద్వారా కొత్తగా పనులు ప్రారంభించవద్దని, ఇప్పటి వరకు శాంక్షన్ అయిన పనుల వివరాలను అందించాలని సూచించారు.
గవర్నమెంట్ వెహికల్స్ ప్రజాప్రతినిధులు వాడవద్దని, ఈ విషయం తన దృష్టికి వస్తే సంబంధిత అధికారిపై చర్యలు తప్పవని హెచ్చరించారు. పోలింగ్ స్టేషన్లలో ఓటర్లకు, వికలాంగులకు, వయోవృద్దులకు సౌలతులు కల్పించాలన్నారు. ఎస్పీ రక్షితకృష్ణమూర్తి మాట్లాడుతూ ఎలక్షన్ కోడ్ రెండు నెలల పాటు ఉంటుందని, పోలీస్, రెవెన్యూ సిబ్బంది కో-ఆర్డినేషన్తో పని చేయాలని కోరారు.
నియమాలు పాటించాలి..
జిల్లాలోని ప్రింటింగ్ ప్రెస్, ఫ్లెక్సీ ప్రింటింగ్ ఓనర్లు ఎన్నికల కమిషన్ మార్గదర్శకాలకు లోబడి పనిచేయాలని జిల్లా అడిషనల్ కలెక్టర్ నగేశ్ ఆదేశించారు. ఎన్నికల కరపత్రాలు, పోస్టర్లు, ఫ్లెక్సీలు, ఇతర మెటీరియల్ ప్రింటింగ్ చేసేటప్పుడు తప్పనిసరిగా ప్రింటర్, ప్రచురణకర్త పేర్లు, సెల్ నంబర్లు ముద్రించాలని చెప్పారు. నిబంధనలు ఉల్లంఘిస్తే చర్యలు తీసుకుంటామన్నారు. అడిషనల్ కలెక్టర్ సంచిత్ గంగ్వార్, డీడబ్ల్యూవో లక్ష్మిబాయి పాల్గొన్నారు.
