హైదరాబాద్, వెలుగు: కంపెనీలు పెద్ద ఎత్తున జెనరేటివ్ఏఐని వాడుతున్నా.. అది ఇస్తున్న కంటెంట్నాణ్యత, పక్షపాతం, కచ్చితత్వాన్ని పరిశీలించడం లేదని హైదరాబాద్ సంస్థ క్వాలిజీల్‌, హెచ్ఎఫ్ఎస్ రీసెర్చ్‌ సంయుక్తంగా నిర్వహించిన అధ్యయనం వెల్లడించింది.
దీని ప్రకారం.. అమెరికాలోని 57 శాతం సంస్థలు జనరేటివ్‌ ఏఐ వాడుతున్నాయి. 36 శాతం సంస్థల్లో స్వయంగా నిర్ణయాలు తీసుకునే ఏఐ వ్యవస్థలు ఉన్నాయి. కేవలం 15 శాతం సంస్థలకే ఏఐ పరీక్షల కోసం ప్రత్యేక విధానాలు ఉన్నాయి. మరో 52 శాతం సంస్థలు సాధారణ సాఫ్ట్వేర్‌ పరీక్షల పద్ధతులనే ఉపయోగిస్తున్నాయి.
ఏఐ నాణ్యతకు ప్రత్యేకంగా బాధ్యత వహించే విభాగం 37 శాతం సంస్థల్లో లేదు. 88 శాతం సంస్థలు ఏఐ ఖచ్చితత్వాన్ని పరీక్షిస్తున్నప్పటికీ, పక్షపాతం, సమానత్వం వంటి అంశాలను పరిశీలిస్తున్నవి 47 శాతమే. ఏఐ నిర్ణయాలకు కారణాలు వివరించగలిగే సామర్థ్యం 37 శాతం కంపెనీలకు మాత్రమే ఉందని రిపోర్ట్ పేర్కొంది.
