మన కళ్లు ఒక్కోసారి మనల్నే మోసం చేస్తుంటాయి. దానికి కారణం.. ఆప్టికల్ ఇల్యూజన్. ఇలాంటి భ్రమను కలిగించే ఫొటోలు ఇప్పటికే చాలా ఉన్నాయి. కానీ.. ఈ మధ్య ట్విట్టర్లో హల్చల్ చేసిన ఈ ఫొటో నెటిజన్లను తికమక పెడుతోంది. గ్రే స్కేల్లో ఉండే ఈ ఫొటోలో మెట్ల మీద ఒక పిల్లి కనిపిస్తుంది. కానీ.. ఆ పిల్లి మెట్లు ఎక్కుతోందా? దిగుతోందా? అనేది మాత్రం ఎవరూ తేల్చలేకపోతున్నారు. కనిపించీ, కనిపించనట్టుగా ఉన్న ఈ మోనోక్రోమ్ ఇమేజ్ చూస్తుంటే పిల్లి పైకి వెళ్తున్నట్టు ఉందని చాలామంది వాదించారు.
మరికొందరు మాత్రం అది కిందకి దిగుతోందని వాదించారు. వాస్తవానికి ఆ ఫొటోలో మెట్లకు అంచులో ఉన్న డిజైన్ వల్ల అది రెండు రకాలుగా కనిపిస్తోంది. మెట్టు పై భాగంలో డిజైన్ ఉంది అనుకునే వాళ్లకు ఎక్కుతున్నట్టు, ముందు భాగంలో డిజైన్ ఉంది అనుకునేవాళ్లకు దిగుతున్నట్టు కనిపిస్తుంది. అంటే ఎలా ఊహించుకుంటే అలా కనిపిస్తుంది. వాస్తవానికి ఈ ఫొటోను 2015లో పోస్ట్ చేశారు. అప్పటి నుంచి ఇప్పటివరకు ఇది ఎంతోమందిని గందరగోళానికి గురిచేస్తూనే ఉంది. ఈ మధ్య మళ్లీ వైరల్ అవుతోంది.