- బీఆర్ఎస్ దుకాణం బందైంది.. బీజేపీ తెలంగాణలో లేవది
- కాంగ్రెస్ ను భారీ మెజార్టీతో గెలిపించాలె
- మునుగోడు ఎమ్మెల్యే కోమటిరెడ్డి రాజగోపాల్రెడ్డి
- ఆదరించి గెలిపిస్తే ఐదేండ్లు సేవ చేస్త
- ఎంపీ అభ్యర్థి చామల కిరణ్కుమార్రెడ్డి
జనగామ, వెలుగు : "ప్రాజెక్టుల పేరుతో కేసీఆర్ రూ.లక్షల కోట్లు దోచుకుతిని, రాష్ట్రాన్ని అప్పుల పాలు చేసిండు. బీఆర్ఎస్ దుకాణం బందైంది. తెలంగాణలో బీజేపీ లేవదు. జనగామలో పల్లా గిల్లా జాన్తా నై. ఎంపీ ఎలక్షన్లో కాంగ్రెస్ భువనగిరి అభ్యర్థి చామల కిరణ్ కుమార్ రెడ్డిని భారీ మెజార్టీతో గెలిపించాలి" అని పార్లమెంట్ ఎన్నికల ఇన్చార్జి, మునుగోడు ఎమ్మెల్యే కోమటిరెడ్డి రాజగోపాల్రెడ్డి పిలుపునిచ్చారు. జనగామ డీసీసీ ప్రెసిడెంట్కొమ్మూరి ప్రతాప్రెడ్డి అధ్యక్షతన జిల్లా కేంద్రంలోని ప్రెస్టన్ గ్రౌండ్లో శుక్రవారం పార్టీ నియోజకవర్గ విస్తృత స్థాయి కార్యకర్తల సమావేశం నిర్వహించారు.
ఈ సందర్భంగా కోమటిరెడ్డి మాట్లాడుతూ యువ నాయకుడు, కష్టపడే తత్వం ఉన్న కాంగ్రెస్ అభ్యర్థి చామల కిరణ్ కుమార్రెడ్డికి ఓటేసి గెలిపించాలని కోరారు. ఈనెల 21న భువనగిరిలో నామినేషన్ కార్యక్రమానికి సీఎం రేవంత్రెడ్డి హాజరువుతారని, ఊరూవాడ కదిలి పెద్దఎత్తున తరలివచ్చి ఆశీర్వదించాలని కోరారు.
ఆదరించి గెలిపిస్తే సేవ చేస్త : ఎంపీ అభ్యర్థి చామల కిరణ్ కుమార్ రెడ్డి
పార్టీలో కష్టపడే ప్రతి ఒక్కరికీ అవకాశం వస్తుందని తనను గెలిపిస్తే అండగా ఉండి సేవ చేస్తానని భువనగిరి ఎంపీ అభ్యర్థి చామల కిరణ్ కుమార్రెడ్డి అన్నారు. కేంద్రంలో కాంగ్రెస్ ప్రభుత్వం ఏర్పాటు ఖాయమన్నారు. డీసీసీ ప్రెసిడెంట్ కొమ్మూరి మాట్లాడుతూ భువనగిరి ఎంపీ అభ్యర్థికి జనగామ నుంచి ఎక్కువ మెజార్టీ ఇచ్చి తీరుతామన్నారు. అనంతరం ఆయన ఆధ్వర్యంలో పలువురు కాంగ్రెస్లో చేరారు.
సమావేశంలో మాజీ ఎమ్మెల్యే నాగపురి రాజలింగం, టీపీసీసీ లీడర్ పవన్ మల్లాడి, పార్లమెంట్ పరిధి జనగామ నియోజకవర్గ కో–ఆర్డినేటర్ భవానీరెడ్డి, కొమ్మూరి ప్రశాంత్రెడ్డి, మేడ శ్రీనివాస్, బనుక శివరాజ్ యాదవ్, పార్టీ శ్రేణులు పాల్గొన్నారు.
