మునుగోడు, వెలుగు: మునుగోడు ఉప ఎన్నికలో టీఆర్ఎస్ పార్టీకి బేషరతుగా మద్దతు ప్రకటిస్తున్నామని సీపీఐ రాష్ట్ర సహాయ కార్యదర్శి పల్లా వెంకటరెడ్డి తెలిపారు. శనివారం మునుగోడులో మంత్రి జగదీశ్రెడ్డి అధ్యక్షతన జరిగిన సీఎం కేసీఆర్‘మునుగోడు ప్రజా దీవెన’ సభలో పల్లా వెంకటరెడ్డి పాల్గొన్నారు. ఈ సందర్భంగా ఆయన మాట్లాడుతూ మునుగోడు ఉపఎన్నికలో బీజేపీ గెలిచే ప్రసక్తే లేదని, రాష్ట్రంలో కాంగ్రెస్ పార్టీ బలహీనపడుతోందన్నారు. దేశంలో మత విద్వేషాలు రెచ్చగొట్టేందుకు ప్రయత్నిస్తున్న బీజేపీని ఓడించే శక్తి రాష్ట్రంలో టీఆర్ఎస్కు మాత్రమే ఉందన్నారు. గత ఎన్నికల్లో సీపీఐ మద్దతుతో ఎమ్మెల్యేగా గెలిచిన రాజగోపాల్ రెడ్డి నియోజకవర్గంలో సమస్యలు గాలికి వదిలేశారని ఆరోపించారు. తెలంగాణ ఉద్యమంలో టీఆర్ఎస్ను బలపర్చామని, హుజూర్నగర్, నాగార్జునసాగర్ ఉప ఎన్నికల్లోనూ ఆ పార్టీకి సపోర్ట్ చేశామని ఈ సందర్భంగా ఆయన గుర్తుచేశారు. ఎన్నికలు వేరు, ప్రజా ఉద్యమాలు వేరని, ఆ కోణంలోనే టీఆర్ఎస్కు మద్దతు తెలిపేందుకు పార్టీ రాష్ట్ర కమిటీ నిర్ణయించిందన్నారు.
‘భగీరథ’తో మునుగోడు నుంచి ఫ్లోరైడ్ దూరం
అనంతరం మంత్రి జగదీశ్రెడ్డి మాట్లాడుతూ మునుగోడు ప్రాంత ప్రజలు ఫ్లోరైడ్ తో బాధపడేవారని మిషన్భగీరథతో ఈ సమస్య తీరిపోయిందని మంత్రి జగదీశ్రెడ్డి పేర్కొన్నారు. మునుగోడు ప్రాంతంలో గతంలో ఏ గ్రామంలో చూసిన కాళ్లు, నడుములు వంకరతో ప్రజలు ఇబ్బందులు పడేవారని, ఉద్యమ సమయంలో కేసీఆర్ స్వయంగా ఈ ప్రాంతాన్ని పర్యటించి వారి బాధలను చూశారన్నారు. వారి గోస తీర్చేందుకే మిషన్ భగీరథ స్కీం ద్వారా ఇంటింటికి మంచి నీరు ఇచ్చి ఈ ప్రాంతం నుంచి ఫ్లోరైడ్ తరిమికొట్టామని అన్నారు. మునుగోడు నియోజకవర్గం వెనుకబాటుకు గత పాలకులే కారణమని వారికి బుద్ధి చెప్పాలని మంత్రి పేర్కొన్నారు. ప్రజలు టీఆర్ఎస్ పార్టీకి, ముఖ్యమంత్రి కేసీఆర్ కి అండగా నిలుస్తారని మంత్రి తెలిపారు.
