వరంగల్, వెలుగు: ఆర్టీపీసీఆర్ టెస్టులు చేయించుకున్నోళ్లకు రిపోర్ట్ మొబైల్కు రాకపోవడంతో వాళ్లు హాస్పిటళ్ల చుట్టూ తిరగాల్సి వస్తోంది. తీరా టెస్టు రిపోర్టులో కరోనా పాజిటివ్ అని తేలినా ఫాలో అప్ చేసే దిక్కు లేకుండాపోయింది. పేషెంట్లకు ఐసోలేషన్ కిట్ అందజేసి జాగ్రత్త చెప్పాల్సిన మెడికల్ ఆఫీసర్ల వద్ద పేషెంట్ల వివరాలు కూడా ఉండటం లేదు.
శాంపిల్ తీసుకొని..!
వరంగల్ ఎంజీఎంకు పేదల ఆసుపత్రిగా పేరుండటంతో ఏ సమస్య వచ్చినా చుట్టుపక్కల జిల్లాల నుంచి పేషెంట్లు ఇక్కడికే వస్తుంటారు. కరోనా టెస్టుల కోసం రోజూ వందల మంది ఎంజీఎంకే వస్తున్నారు. ఇక్కడికి సగటున 200 మంది ర్యాపిడ్ టెస్టు చేయించుకుంటుండగా.. వంద మంది వరకు ఆర్టీపీసీఆర్ టెస్టు కోసమని వస్తున్నారు. ఇక్కడ శాంపిల్స్ సేకరించే సిబ్బంది వాటిని ఆఫీసర్ల ఆదేశాల మేరకు కాకతీయ మెడికల్ కాలేజీ (కేఎంసీ) వైరాలజీకు పంపిస్తున్నారు. రిపోర్ట్ మొబైల్ కే మెసేజ్ వస్తుందని చెప్పి పేషెంట్లను ఇంటికి వెళ్లాల్సిందిగా సూచిస్తున్నారు. కానీ రెండు, మూడు రోజులైనా రిపోర్ట్ రాకపోవడంతో పేషెంట్లు గందరగోళానికి గురవుతున్నారు. మళ్లీ ఎంజీఎంకు వెళ్లి అడిగితే అక్కడి స్టాఫ్ మాత్రం కేవలం శాంపిల్స్ పంపడం వరకే తమ బాధ్యతన్నట్టుగా వ్యవహరిస్తున్నారు. శాంపిల్ ఇచ్చిన పేషెంట్లకు పాజిటివ్, నెగె టివ్ ఏదో ఒకటి తేలేదాక ఫాలోఅప్ చేయాల్సిన ఎంజీఎం ఉన్నతాధికారులు కూడా చేతులు దులుపేసుకుంటున్నారు. దీంతో పేషెంట్లు నేరుగా కేఎంసీకి వెళ్లి రిపోర్టులు తెచ్చుకోవాల్సిన పరిస్థితి నెలకొంది. కరోనా సోకిన వ్యక్తులను ఇలా రిపోర్టుల కోసం తిప్పుకుంటుండటం కూడా వైరస్ వ్యాప్తి మరింత పెరగడానికి కారణమవుతోంది.
పాజిటివ్ వచ్చినొళ్లను అలర్ట్ చేస్తలేరు
ఎంజీఎంలో ఆర్టీపీసీఆర్ టెస్టులు చేయించుకున్న వారిని పట్టించుకునేవారు కరువయ్యారు. ఇక్కడ శాంపిల్స్ ఇచ్చిన తర్వాత కేఎంసీ నుంచి వచ్చే రిపోర్ట్ ఆధారంగా పేషెంట్లను అలర్ట్ చేయాల్సి ఉంటుంది. కానీ ఇక్కడి ఆఫీసర్లు అలాంటి చర్యలేమీ తీసుకోవడం లేదు. ఫలితంగా కరోనా పేషెంట్లకు ఎలాంటి సమాచారం అందకపోగా.. పాజిటివ్ వచ్చినవారికి ఐసోలేషన్ కిట్ కూడా అందడం లేదు. పేషెంట్లకు కలుగుతున్న ఇబ్బంది గురించి ఎంజీఎం సూపరింటెండెంట్ నాగార్జున రెడ్డిని వివరణ కోరగా.. ఎంజీఎంలో ఇన్ పేషెంట్లుగా చేరిన వాళ్లకు ట్రీట్మెంట్ ఇస్తున్నామని, ఓపీలో ఆర్టీపీసీఆర్ శాంపిల్స్ ఇచ్చిన వారి సమాచారం మళ్లీ తమకు రావడం లేదన్నారు. ఆ విషయం తమ పరిధి కాదని, ఆసుపత్రిలో ఆ విషయాన్ని పట్టించుకునే పరిస్థితి కూడా లేదని చెప్పారు. కేఎంసీ ప్రిన్సిపల్ సంధ్యారాణిని సంప్రదిస్తే పోర్టల్ లో సమస్య వల్ల పేషెంట్లకు మెసేజ్లు వెళ్లడం లేదన్నారు. ఆర్టీపీసీఆర్ రిజల్ట్స్ విషయంలో కాస్త ఇబ్బందులు ఎదురవుతున్నాయని, బాధితులకు మెడికల్ కిట్లు అందించేందుకు చర్యలు తీసుకుంటున్నామని డీఎంహెచ్వో లలితాదేవి చెప్పారు.