మంచిర్యాల, వెలుగు: దేశంలో బీజేపీని, రాష్ట్రంలో బీఆర్ఎస్ ను ప్రజలు నమ్మే పరిస్థితిలో లేరని సీపీఐ జాతీయ కార్యవర్గ సభ్యుడు చాడ వెంకట్రెడ్డి అన్నారు. శనివారం మంచిర్యాలలోని ఎం కన్వెన్షన్ హాల్లో నిర్వహించిన పార్టీ జిల్లా స్థాయి సమీక్ష సమావేశానికి ఆయన చీఫ్ గెస్ట్గా హాజరయ్యారు. ఈ సందర్భంగా మీడియాతో మాట్లడుతూ.. మునుగోడు బై ఎలక్షన్లో వామపక్షాల మద్దతుతో గెలిచిన కేసీఆర్ఆ తర్వాత పొత్తులంటూ హడావుడిగా అభ్యర్థులను ప్రకటించి తమను మోసం చేశారన్నారు.
రాష్ట్రంలో సంక్షేమ పథకాల పేరుతో ప్రజాధనాన్ని దుర్వినియోగం చేస్తున్నారని విమర్శించారు. పోటీ పరీక్షలను వాయిదా వేస్తూ నిరుద్యోగుల జీవితాలతో ఆడుకుంటూ కేసీఆర్ రాక్షసానందం పొందుతున్నాడని దుయ్యబట్టారు. ఈ ఎన్నికల్లో బెల్లంపల్లి, హుస్నాబాద్, మునుగోడు, కొత్తగూడెం, వైరా అసెంబ్లీ సీట్లను సీపీఐకి ఇచ్చే విధంగా కాంగ్రెస్తో చర్చలు జరుపుతున్నామని తెలిపారు. సీపీఐ రాష్ర్ట కార్యదర్శివర్గ సభ్యుడు కలవేన శంకర్, జిల్లా కార్యదర్శి రామడుగు లక్ష్మణ్, జిల్లా కార్యవర్గ సభ్యుడు మేకల దాసు పాల్గొన్నారు.
