ఖమ్మం సీటు ఇవ్వాలంటున్న సీపీఐ
నల్గొండ సీటును అడుగుతున్న సీపీఎం
పొత్తు కాకుండా మద్దతు కూడ గట్టుకునే యోచనలో కాంగ్రెస్
హైదరాబాద్, వెలుగు: లోక్సభ ఎన్నికలకు టైమ్ దగ్గరపడుతున్నది. కమ్యూనిస్టులతో పొత్తుల విషయంలో కాంగ్రెస్ ఎటూ తేల్చుకోలేకపోతున్నది. ఖమ్మం లోక్సభ సీటు ఇవ్వాలని సీపీఐ కోరుతున్నది. సీపీఎం మాత్రం ఖమ్మంతో పాటు నల్గొండ సీటు కేటాయించాలని కాంగ్రెస్ను అడుగుతున్నది. పొత్తులపై జాతీయ పార్టీల మధ్య చర్చలు జరగాల్సి ఉండగా.. ఇప్పటి వరకు ఆ దిశగా ఎలాంటి భేటీలు జరగలేవు.
ఇటీవల జరిగిన అసెంబ్లీ ఎన్నికల్లో సీపీఐతో కాంగ్రెస్ పొత్తు పెట్టుకోగా.. సీపీఎం మాత్రం ఒంటరిగానే పోటీ చేసింది. కాంగ్రెస్ ఓకే అంటే.. ఆ పార్టీతో పొత్తు పెట్టుకునేందుకు సీపీఎం ఆసక్తి చూపిస్తున్నది. ఇండియా కూటమిలో కాంగ్రెస్తో పాటు సీపీఐ, సీపీఎం పార్టీలు భాగస్వాములుగా ఉన్నాయి. జాతీయ స్థాయిలో మోదీకి చెక్ పెట్టేందుకు రాష్ట్రంలో కాంగ్రెస్ పార్టీతో పొత్తుకు ప్రయత్నాలు సాగిస్తున్నట్టు ప్రచారం జరుగుతున్నది. పొత్తుల అంశం వెంటనే తేల్చాలని సీపీఐ జాతీయ నేత నారాయణ ఇప్పటికే కాంగ్రెస్ను కోరారు.
మెజార్టీ సీట్లపైనే కాంగ్రెస్ గురి
కాంగ్రెస్ మాత్రం రాష్ట్రంలో మెజార్టీ సీట్లు గెలవాలని లక్ష్యంగా పెట్టుకున్నది. సీపీఐ, సీపీఎంలకు ఎంపీ సీట్లు ఇవ్వకుండానే వారి మద్దతు పొందే ప్రయత్నంలో ఉంది. దీనికి ఆ రెండు పార్టీలు సానుకూలంగా స్పందిస్తే.. రాష్ట్ర స్థాయిలో వారికి తగిన ప్రాధాన్యత ఇచ్చే ఉద్దేశంలో కాంగ్రెస్ ఉంది. పైగా సీపీఐ, సీపీఎం అడుగుతున్న నల్గొండ, ఖమ్మం స్థానాలు సునాయసంగా కాంగ్రెస్ ఖాతాలో పడే చాన్స్ ఉంది. దీంతో ఆ పార్టీ ఎట్టి పరిస్థితుల్లో ఆ సీట్లను వామపక్షాలకు కేటాయించే అవకాశం లేదని అధికార పార్టీ నేత ఒకరు అభిప్రాయపడ్డారు. మొత్తానికి ఎంపీ ఎన్నికలు సమీపిస్తున్న వేళ.. సీపీఐ, సీపీఎంతో కాంగ్రెస్ పొత్తు ఉంటుందా.. లేదా.. ఆ రెండు పార్టీలకు ఒకటో, రెండో సీట్లు ఇస్తారా.. లేదా.. అనే చర్చ ఇప్పుడు రాష్ట్ర రాజకీయాల్లో జోరుగా సాగుతున్నది.
