- రోడ్డుపై ఆందోళనకు దిగిన స్థానిక రైతులు
- ములుగు జిల్లా అబ్బాయిగూడెం రీచ్ వద్ద ఘటన
వెంకటాపురం వెలుగు: ఇసుక లారీలతో పంటలు నాశనమవుతున్నాయని రైతులు ఆందోళనకు దిగారు. మిర్చి తోటల్లో పనులు చేసుకోలేకపోతున్నామని ఆగ్రహం వ్యక్తం చేస్తూ రోడ్డుపై బైఠాయించిన ఘటన ములుగు జిల్లా వెంకటాపురం మండలం అబ్బాయిగూడెం వద్ద జరిగింది. వివరాల్లోకి వెళ్తే.. శుక్రవారం ఉదయం తమ మిర్చి చేనులో పనులు చేయడానికి వెళ్లిన మహిళా రైతు మానేటి జయలక్ష్మితో వివాదం తలెత్తడంతో సొసైటీ నిర్వాహకులు, ఇసుక రిచ్ కాంట్రాక్టర్ సిబ్బంది దాడి చేసి రాళ్లతో కొట్టారు.
గాయపడిన జయలక్ష్మిని వెంకటాపురం ఆస్పత్రికి తరలించగా చికిత్స పొందుతోంది. కాగా.. దాడి ఘటన తెలిసిన వెంటనే రైతులు రోడ్డుపై కూర్చొని నిరసనకు దిగారు. ఇసుక లారీల కారణంగా పంటలు పాడైపోతున్నాయని, దుబ్బ, ఇసుక, పొగతో మొక్కలకు కంకర తెగులు సోకుతుంందని పలువురు రైతులు ఆవేదన వ్యక్తం చేశారు. రూ. వేలల్లో పెట్టుబడులు పెట్టామని, పంటకు రక్షణ కల్పించండి, లేదంటే పురుగు మందు తాగి చనిపోతామంటూ వెంకటాపురం– భద్రాచలం రోడ్డుపై కూర్చున్నారు.
పంటలను చూసేందుకు వెళ్తే దాడులకు పాల్పడుతున్నారని ఆరోపించారు. పంటకాలం ముగిసేదాకా ఇసుక రీచ్ ఎత్తివేయాలని కోరారు. అబ్బాయి గూడెం ఇసుక రీచ్ రోడ్డుకు ఇరువైపులా సుమారు 80 ఎకరాల్లో స్థానిక రైతులు మిర్చి పంట వేశారు. అయితే.. ఇసుక రీచ్ నిర్వహణ సమయంలో ఎలాంటి అభ్యంతరం చెప్పని రైతులు ఇప్పుడు ఎందుకు గొడవలు చేస్తున్నారని నిర్వాహకులు అంటున్నారు.
మూడేండ్లుగా రైతులు, ఇసుక రీచ్ నిర్వాహ కులకు మధ్య రోడ్డు విషయమై గొడవలు ఉన్నాయి. ఇరువర్గాలు కోర్టును ఆశ్రయించాయి. కాగా.. అబ్బాయి గూడెంలో ఇటీవల కొత్త ఇసుక రీచ్ మంజూరైంది. దీంతో సదరు కాంట్రాక్టర్ గోదావరి నది నుంచి ఇసుక రవాణా పనులు నిర్వహిస్తున్నారు.
సమస్య ముగిసే దాకా రీచ్ ఆపి వేస్తున్నాం
ఇరువర్గాల మధ్య నెలకొన్న వివాదాస్పద పరిస్థితులు సద్దుమణిగే దాకా ఇసుక రీచ్ ను నిలిపివేస్తున్నట్టు టీజీఎండీసీపీఓ విష్ణువర్ధన్ తెలిపారు. రైతుల ఆందోళన చేస్తున్నారని తెలియడంతో తహసీల్దార్ వేణుగోపాల్, సీఐ ముత్యం రమేశ్, ఎస్ఐ తిరుపతితో కలిసి వెళ్లి మాట్లాడారు. ఆందోళన విరమించాలని కోరారు.
హామీ ఇస్తేనే ఆందోళన విరమిస్తామని రైతులు తేల్చిచెప్పారు. దీంతో పీఓ విష్ణువర్ధన్ ర్యాంపు తాత్కాలికంగా నిలుపుదల చేస్తున్నామని హామీ ఇచ్చారు. పరిస్థితి సద్దుమరిగిన తర్వాత ఇసుక రవాణా చేపట్టాలని నిర్వాహకులకు సూచించారు.
