- భారీగా దానాలు చేస్తున్న క్రిప్టో బిలియనీర్ శామ్
న్యూఢిల్లీ: ప్రపంచంలోనే అత్యంత సంపన్న క్రిప్టో బిలియనీర్లలో ఒకరైన శామ్ బ్యాంక్మన్ ఫ్రైడ్వయసు చిన్నదే కానీ మనసు మాత్రం చాలా పెద్దది. తన సంపద అంతా.. అంటే 20 బిలియన్ డాలర్లలో ఎక్కువ భాగాన్ని దానం చేయాలని ఈ 30 ఏళ్ల యువకుడు నిర్ణయించుకున్నాడు. ఈ సంపద సృష్టి ఒక రోజులో జరగలేదు. బిట్కాయిన్ ఊపు గమనించిన తర్వాత ఆయన 2019లో తిరిగి క్రిప్టోకరెన్సీ ఎక్స్ఛేంజ్ ఎఫ్టీఎక్స్ను మొదలు పెట్టి లాభాల పంట పండిచారు. ఇంత డబ్బు చేతిలో ఉన్నప్పటికీ తనకు దానిపై మోజు లేదని శామ్ అంటారు. ఇతరులకు వీలైనంత ఎక్కువ సాయపడటం ఆయన పద్ధతి. శామ్, తన సంపాదనలో కేవలం ఒక శాతాన్ని మాత్రమే ఉంచుకుంటాడని, అంటే సంవత్సరానికి కేవలం లక్ష డాలర్లు మాత్రమే తీసుకుంటారని బ్లూమ్బర్గ్ వార్తాసంస్థ పేర్కొంది. మిగిలిన డబ్బు అంతటినీ వదులుకుంటారు. ‘గివింగ్ వాట్ వి కెన్’ అనే స్వచ్ఛంద సంస్థలో ఆయన సభ్యుడు. మెజారిటీ సంపాదనను చారిటీ సంస్థలకు ఇస్తారు. రాజకీయ పార్టీలకు కూడా భారీగా విరాళాలు ఇస్తారు. స్టేడియాలకు పేరు పెట్టే హక్కుల కోసం లక్షలాది డాలర్లు ఖర్చు చేస్తారు. కమెడియన్ లారీ డేవిడ్తో కలిసి సూపర్ బౌల్ ప్రకటన కోసం 30 మిలియన్ డాలర్లు ఖర్చుచేశారు. తనకు యాట్ వంటి ఖరీదైన పడవలు, విలాసవంతమైన జీవితం అవసరం లేదని శామ్ తరచూ చెబుతారు. ఒక బీన్ బ్యాగ్పై పడుకుంటారు. లగ్జరీ కారుకు బదులు టొయోటా కారులో వెళ్తారు.
తక్కువ సొమ్మును ఖర్చు పెట్టడం ద్వారా ఎక్కువ మంది జీవితాలను బాగుచేయవచ్చని శామ్ చిన్ననాటి స్నేహితుడు మ్యాట్ నాస్ అన్నారు. ఈ బిలియనీర్ ఆఫీసు బహమాస్లో ఉంటుంది. వెయ్యి మంది ఉద్యోగులు పనిచేసేలా అక్కడి సము5ద్రం సమీపంలో భారీ క్యాంపస్ను నిర్మించబోతున్నారు. ప్రస్తుతం బహమాస్ ఎయిర్పోర్టు వద్ద ఒకే అంతస్తు గల భవనంలో ఎఫ్టీఎక్స్హెడ్ ఆఫీసు ఉంది. ఇక క్రిప్టో ఫ్యూచర్స్, స్వాప్స్, ఆప్షన్స్ సేవలను కూడా అందించాలని ఆయన భావిస్తున్నారు. ఇవన్నీ సక్సెస్ అయితే మెయిన్స్ట్రీమ్ ఫైనాన్స్ ఇండస్ట్రీవైపు కూడా వెళ్తానని శామ్ బ్యాంక్మన్ ఫ్రైడ్ చెబుతున్నారు.