హవానా: ప్రధాన ఆయిల్ స్టోరేజీపై పిడుగుపాటు.. దాని తర్వాత దేశవ్యాప్తంగా విద్యుత్ సరఫరాకు ఆటంకం..మరోవైపు అమెరికా ఆంక్షలు కలిసి మొత్తంగా క్యూబా తీవ్ర సంక్షోభ పరిస్థితుల్లోకి నెట్టేస్తున్నాయి. శుక్రవారం క్యూబా రాజధాని హవానాకు 65 కిలోమీటర్ల దూరంలో ఉన్న మతంజాస్లోని ఆయిల్ స్టోరేజీ సెంటర్పై పిడుగుపడింది. దాని ప్రభావంతో చెలరేగిన మంటలు చుట్టుపక్కల ఉన్న ఇతర ఆయిల్ స్టోరేజీ యూనిట్లకు పాకాయి. దీని వల్ల ఆ దేశ చమురు నిల్వల్లో 40% అగ్నికి ఆహుతయ్యాయి. మతంజాస్ పోర్టులోని 4 ట్యాంకులు మాడిమసైపోయాయి. మంటలను అదుపు చేసేందుకు మెక్సికో, వెనిజులా నుంచి ఫైర్ సిబ్బందిని, హెలికాప్టర్లు, ఫైర్ బోట్లను రప్పించారు. మంగళవారం నాటికి పరిస్థితులు కాస్త చక్కబడినా.. ఇప్పటికే వేల క్యూబిక్ అడుగుల చమురు మంటలకు ఆహుతైపోయింది. ఇప్పటి వరకు ఒకరు చనిపోగా.. 125 మంది తీవ్రంగా గాయపడ్డారు.
అమెరికా ఆంక్షలకు తోడు..
అమెరికా ఆంక్షల కారణంగా క్యూబా ఆర్థిక వ్యవస్థ ఇప్పటికే దివాలా అంచులకు చేరుకుంది. దీనికి తోడు తాజాగా పిడుగుపాటు ఆ దేశాన్ని మరింత ఇబ్బందుల్లోకి నెట్టేసింది. క్యూబా ఎనర్జీ ఇన్ఫ్రాస్ట్రక్చర్ను దెబ్బతీసింది. కోలుకోవడానికి ఆ దేశానికి కొన్నేండ్లు పట్టొచ్చని నిపుణుల అంచనా. ఇప్పటికే దేశవ్యాప్తంగా విద్యుత్ సరఫరాకు అంతరాయం ఏర్పాడుతోంది. ఇది మరిన్ని రోజులు కొనసాగే పరిస్థితులు కనిపిస్తున్నాయి. 63 ఏండ్ల క్రితం క్యూబా రివల్యూషన్ నాటి పరిస్థితులు ఇప్పుడు ఆ దేశ ప్రజలు ఎదుర్కొంటున్నారు.
