ప్రస్తుతానికి ట్విట్టర్, మెటాల మధ్య అలాంటి వార్ నడుస్తోంది. ఎలాన్ మస్క్ ట్విట్టర్కు పోటీగా జుకర్బర్గ్ మెటా నుంచి థ్రెడ్స్ అనే కొత్త మైక్రోబ్లాగింగ్ యాప్ తెచ్చిన విషయం తెలిసిందే. ఆ యాప్ రావడం ఆలస్యం ఇప్పటివరకు వచ్చిన యాప్లను మించి క్రేజ్ తెచ్చుకుంది. యాప్స్టోర్, ప్లేస్టోర్ల్లోకి విడుదలచేసిన కొద్ది గంటల్లోనే మిలియన్ల మంది యూజర్లు థ్రెడ్స్కి సబ్స్క్రయిబ్ అయ్యారు. ఇదంతా బాగానే ఉంది. కానీ ఎలాన్ మస్క్కి మాత్రం విపరీతమైన కోపం వచ్చేసింది. ‘‘నా కంపెనీలో ఉద్యోగులను మెటాలో ఉద్యోగంలోకి తీసుకుని ఈ థ్రెడ్స్ యాప్ తయారుచేయించారు. మా దగ్గర నుంచి వెళ్లిపోయిన ఉద్యోగులకు ట్విట్టర్కు సంబంధించి బోలెడు విషయాలు తెలుసు. ఇలా చేయడం ఇల్లీగల్” అని కేసు వేసేశాడు. ఆ వివరాలను పక్కనపెడితే. అసలు ట్విట్టర్, థ్రెడ్స్కి ఉన్న పోలికలు ఏంటి? ఈ కొట్టుకోవడం ఎందుకు? వంటి విషయాల గురించి చెప్పేదే ఈ స్టోరీ.
ఫేస్బుక్ ఓనర్ మెటా థ్రెడ్స్ అనే యాప్ను ఈ నెల 6వ తేదీన సోషల్ మీడియా మార్కెట్లోకి తెచ్చింది. దీని లోగో స్ట్రక్చర్ ట్విట్టర్లా ఉన్నా, ఇన్స్టాగ్రామ్లో ఉన్న ఫీచర్స్ థ్రెడ్స్లో నింపుకుంది. అయితే ఇది కొత్తదేం కాదు ట్విట్టర్కు క్లోన్లా ఉందంటున్నాడు ఎలాన్ మస్క్. మన చేతిలో స్మార్ట్ఫోన్ ఉంది కాబట్టి ఈ గొడవలో మనకు తెలియకుండానే భాగస్వాములం అయిపోయాం. ఎందుకంటే ఇదివరకటిలా మామూలు ఫోన్ చేతిలో ఉంటే కాల్స్ చేసుకుని, అవసరమైనప్పుడు మెసేజ్లు పెట్టి చప్పుడు చేయకుండా ఉండేవాళ్లం. కానీ ఇప్పడు అలా లేదు కదా!
నిజానికి ఎలాన్ మస్క్ ట్విట్టర్ను తీసుకున్నప్పటినుంచీ ఏవేవో మార్పులు చేస్తూనే ఉన్నాడు. ఆయన అనుకున్నట్టు అన్నీ సవ్యంగా జరిగితే త్వరలోనే ట్విట్టర్ డిజిటల్ పేమెంట్స్ ప్లాట్ఫాంగా మారిపోతుంది కూడా. కానీ మధ్యలో జుకర్ బర్గ్ వచ్చి ట్విట్టర్ పిట్టకు థ్రెడ్స్ అనే దారం వేసి వెనక్కి లాగినట్టు అయింది. దాంతో ఎలాన్ మస్క్(ట్విట్టర్, టెస్లా, స్పేస్ ఎక్స్, స్టార్లింక్ ) వర్సెస్ జుకర్బర్గ్ (ఫేస్బుక్, ఇన్స్టాగ్రామ్, వాట్సాప్)ల మధ్య పెద్ద యుద్ధమే మొదలైంది. కారణం వాళ్లు తయారుచేసి జనాల మీదకు వదిలిన సోషల్ ప్రొడక్ట్స్ను ప్రపంచవ్యాప్తంగా కొన్ని వందల మిలియన్ల మంది వాడుతుండటమే. అందుకే వాళ్లిద్దరి మధ్య యుద్ధం అల్లాటప్పాగా ఆగిపోయేలా లేదు.
థ్రెడ్స్ అంటే...
థ్రెడ్స్ అనేది మైక్రోబ్లాగింగ్ యాప్. మెటా (ఫేస్బుక్, ఇన్స్టాగ్రామ్ ) ఐఓఎస్ (యాప్ స్టోర్), ఆండ్రాయిడ్ (ప్లే స్టోర్) డివైజ్లకు అందుబాటులోకి తెచ్చింది. ఇన్స్టాగ్రామ్లో చేసినట్టే థ్రెడ్స్లో కూడా పోస్ట్ చేయొచ్చు. మీరు ఫాలో అవుతున్న అకౌంట్ల థ్రెడ్స్కు రెస్పాండ్ కావొచ్చు. నచ్చిన ప్రొఫైల్ను ఫాలో కావచ్చు. షార్ట్ టెక్స్ట్ మెసేజ్లు, లింక్స్, ఫొటోలు, వీడియోలు లేదా వీటిలో ఏ కాంబినేషన్ అయినా చేసుకోవచ్చు. అకౌంట్ ఫాలో అయ్యేవాళ్లు థ్రెడ్స్ చూడొచ్చు.... ఇలా సోషల్ మీడియాలో టెక్స్ట్ బేస్డ్ ఇంటరాక్షన్కు అవసరమైన ఆప్షన్స్ అన్నీ ఉన్నాయి.
ట్విట్టర్ కిల్లర్?
ఇందులో ట్విట్టర్కు పోటీ ఏముంది అంటున్నారా? ఎందుకంటే థ్రెడ్స్లో ఉన్న ఫీచర్లు, థ్రెడ్స్ లోగో స్ట్రక్చర్ ట్విట్టర్లా కనిపిస్తున్నాయి కాబట్టి. ఒక్క ముక్కలో చెప్పాలంటే ట్విట్టర్ను కండెన్స్ చేస్తే ఎలా ఉంటుందో అచ్చం అలానే ఉంది థ్రెడ్స్. అయితే ఇంతకుముందు కూడా ట్విట్టర్కి ప్రత్యామ్నాయంగా చాలానే యాప్స్ వచ్చాయి. అవి... క్లబ్ హౌస్(ఏప్రిల్ 2020. పది మిలియన్ల యూజర్లు), కౌంటర్సోషల్ (2017 నవంబర్, 62 మిలియన్ల యూజర్లు), డిస్కార్డ్ (2015 మే. 140 మిలియన్ల యూజర్లు), లింక్డిన్ (2003 మే. 930 మిలియన్ల యూజర్లు), మాస్టోడాన్ (2016, మార్చి. 2.6 మిలియన్ల యూజర్లు), రెడ్డిట్ (2005. 52 మిలియన్ల యూజర్లు), టంబ్లర్ (2007 ఫిబ్రవరి, 547 మిలియన్ల యూజర్లు), డబ్ల్యుటి.సోషల్(2019 డిసెంబర్. 508,980). ఇవన్నీ ఇండైరెక్ట్గా ట్విట్టర్తో పోటీ పడితే... మెటా సీఈఓ జుకర్ బర్గ్ తెచ్చిన థ్రెడ్స్ మాత్రం ట్విట్టర్తో నేరుగా ఢీ కొట్టింది. దాదాపు పదకొండేండ్ల తరువాత ఫేస్బుక్ బాస్... ఎలాన్మస్క్ మైక్రో బ్లాగింగ్ ట్విట్టర్కు గట్టి పోటీ ఇచ్చాడు అనుకుంటున్నారు కొందరు టెక్ ఎక్స్పర్ట్స్. ట్విట్టర్కు డిసెంబర్ 2022 వరకు నెలకు368 మిలియన్ల యూజర్లు ఉన్నారు.
థ్రెడ్స్ యూజర్స్ ఇవి చేయొచ్చు
థ్రెడ్స్ వాడేవాళ్లు పోస్ట్లకు లైక్, కామెంట్, షేర్ చేయొచ్చు. అలాగే ఇన్స్టాగ్రామ్లో ఉన్న ప్రొఫైల్ పేర్లనే ఇక్కడా వాడొచ్చు. థ్రెడ్స్ వాడేవాళ్లకు వాళ్ల ఇన్స్టాగ్రామ్ యూజర్పేరు, బయో, ఫాలోవర్స్ను లింక్ చేయడం ఈజీ. ఈ కొత్త యాప్కు బిగ్గెస్ట్ ప్లస్ పాయింట్ ఇది. ట్విట్టర్లో లాగా థ్రెడ్స్కి హ్యాష్ట్యాగ్స్ అవసరంలేదు. అయితే థ్రెడ్స్లో సైనప్ చేయాలంటే ఇప్పటికే ఇన్స్టాగ్రామ్ అకౌంట్ ఉండాలి. ఒకవేళ లేకపోతే ఇన్స్టాగ్రామ్ అకౌంట్ సైనప్ చేయాల్సిందే. ఈ ఒక్క విషయం చాలు సోషల్ బిజినెస్ గేమ్లో ఏం జరుగుతుందో అర్థం చేసుకునేందుకు. ‘‘ట్విట్టర్ నుంచి జనాల కళ్లు తమవైపు తిప్పుకునేందుకు చేసిన అతిపెద్ద స్టెప్ ఇది. ముందు ముందు థ్రెడ్స్ ట్విట్టర్కు గట్టిపోటీ ఇస్తుంది’’ అంటున్నారు టెక్ ఎక్స్పర్ట్స్. ట్విట్టర్ను మస్క్44 బిలియన్ డాలర్లు ఖర్చుపెట్టి సొంతం చేసుకున్నాడు. ఆ తరువాత దానిలో మార్పులు చేర్పులు చేసేందుకు చాలా కష్టపడ్డాడు ఈ బిలియనీర్. తను పగ్గాలు చేపట్టగానే ఉద్యోగులను తగ్గించాడు. పాలసీలు మార్చాడు. దానివల్ల ట్విట్టరకు లాయల్ యూజర్స్గా ఉన్న వాళ్లను కూడా కోల్పోయాడు.
ప్రెట్టియర్ ట్విట్టర్
ఇప్పటివరకు థ్రెడ్స్ యాప్ వాడిన వాళ్ల రెస్పాన్స్ బాగుందని ఆ కంపెనీ చెప్తోంది. ‘‘ఇది ప్రెట్టియర్(సొగసైన) ట్విట్టర్’’ అని కామెంట్ చేశాడు ఒక యూజర్. ‘‘ఇన్స్టాగ్రామ్తో ఇంటిగ్రేషన్ బాగుంది. కాకపోతే మరికొన్ని ఫీచర్స్ థ్రెడ్స్కు యాడ్ చేయాలి”అని మరో యూజర్ కామెంట్. ట్వీట్ డెక్ వంటి ట్విట్టర్ థర్డ్ పార్టీ అప్లికేషన్ థ్రెడ్స్లో లేదు. అవసరమైన అప్డేట్స్ మాత్రమే రిసీవ్ చేసుకునే అవకాశం కూడా లేదు.
ఆల్ రికార్డ్స్ బ్రేక్
థ్రెడ్స్.. సోషల్ మీడియాలో వచ్చిన కొత్త యాప్. నిజానికి ఇది పేరుకు మాత్రమే కొత్తది అని చెప్పాలేమో! ఎందుకంటే ఇది లాంచ్ అయిన కొన్ని గంటల్లోనే రికార్డ్ లెవల్లో డౌన్లోడ్స్ అయ్యాయి. సోషల్ మీడియా అకౌంట్స్ వాడుతున్న, ముఖ్యంగా ఇన్స్టాగ్రామ్ వాడుతున్న వాళ్లలో దాదాపు అందరూ థ్రెడ్స్ యూజర్లు అయిపోయారు. మిలియన్ల కొద్దీ డౌన్లోడ్లు అవ్వడమంటే నిజంగా రికార్డే. ఎందుకంటే... నెట్ఫ్లిక్స్ అనేది ఎంత పెద్ద ప్లాట్ఫామో తెలిసిందే. అలాంటిది దానికి ఒక మిలియన్ యూజర్స్ రావడానికి మూడున్నర ఏండ్లు పట్టింది. ట్విట్టర్కు రెండేండ్లు, ఫేస్బుక్కు పది నెలలు, ఇన్స్టాగ్రామ్కి రెండున్నర నెలలు టైం పట్టింది.
అయితే, వీటన్నింటికీ మించి కేవలం ఐదు రోజుల్లోనే చాట్జీపీటీ ఒక మిలియన్ యూజర్లను సంపాదించుకుంది. మరి ఇప్పుడు... దాన్ని తలదన్నేలా థ్రెడ్స్ యాప్ కేవలం ఒకే ఒక్క గంటలో ఒక మిలియన్ యూజర్లను సంపాదించి రికార్డ్ బ్రేక్ చేసింది. అంతేనా...18 గంటల్లో 3 కోట్లు, 24 గంటల్లో 4.4 కోట్ల మంది యూజర్లను సొంతం చేసుకుంది. దీనికి కారణం ఇన్స్టాగ్రామ్ అకౌంట్ ఉన్న వాళ్లంతా ఈజీగా థ్రెడ్స్ యాప్లోకి సైనప్ అవ్వచ్చు కాబట్టి. యూజర్ నేమ్ కూడా ఇన్స్టాదే ఉంటుంది. ఫాలోవర్స్ దీనికి కనెక్ట్ అయిపోతారు. ఇందులో బయోడేటాను మాత్రం ఎడిట్ చేసే వీలుంది.
ఇన్స్టాగ్రామ్ నుంచి డౌన్లోడ్
మామూలుగా ఒక యాప్ డౌన్లోడ్ చేసుకోవాలంటే గూగుల్ ప్లే స్టోర్కి వెళ్లి పేరు సెర్చ్ చేసి డౌన్లోడ్ చేస్తారు. కానీ, థ్రెడ్స్ని ఇన్స్టాగ్రామ్ అకౌంట్ ఉన్న వాళ్లు చాలా సింపుల్గా డౌన్లోడ్ చేసుకోవచ్చు. అదెలాగంటే... ఇన్స్టాగ్రామ్ ప్రొఫైల్కి వెళ్లి, కుడివైపు పైన ఉన్న మూడు గీతల్ని ట్యాప్ చేయాలి. అందులో థ్రెడ్స్ అనే ఆప్షన్ వస్తుంది. దాని మీద ట్యాప్ చేయగానే ఒక కార్డ్ రొటేట్ అవుతూ కనిపిస్తుంది. దాని మీద పేరు, క్యూఆర్ కోడ్, డేట్, టైం కనిపిస్తాయి. దాని కింద ‘గెట్ థ్రెడ్స్’ అనే ఆప్షన్ ఉంటుంది. దాని మీద నొక్కితే వెంటనే అది గూగుల్ ప్లే స్టోర్కి రీ–డైరెక్ట్ అవుతుంది. అక్కడ ఇన్స్టాల్ చేసుకుని, ఓపెన్ చేస్తే ‘లాగిన్ విత్ ఇన్స్టాగ్రామ్ ఐడీ’ అని కనిపిస్తుంది. ఫ్రొఫైల్లో నేమ్, బయో డేటాతో పాటు లింక్స్ అనే ఆప్షన్స్ ఉంటాయి. అదికాకుండా ఇంపోర్ట్ ఫ్రమ్ ఇన్స్టాగ్రామ్ అనే ఆప్షన్ కనిపిస్తుంది. దానిమీద ట్యాప్ చేస్తే ఇన్స్టాగ్రామ్లో ఉన్న ఫీడ్ మొత్తం థ్రెడ్స్లోకి వచ్చేస్తుంది. దాంతోపాటు ఇందులో పబ్లిక్, ప్రైవసీ ప్రొఫైల్ ఆప్షన్స్ కూడా ఉన్నాయి. దాని తర్వాత ఫాలో ఆల్ ఆప్షన్ చూపిస్తుంది. తర్వాత ‘జాయిన్ థ్రెడ్స్’ మీద ట్యాప్ చేయాలి. వెంటనే ఫోన్కి ఓటీపీ వస్తుంది. అందులో ‘అప్రూవ్’ అనే ఆప్షన్ సెలక్ట్ చేస్తే లాగిన్ అయిపోతుంది.
టాప్ లిస్ట్లో ఉన్న యాప్స్ ఇవే
సోషల్ నెట్వర్కింగ్ ప్లాట్ఫామ్స్లో ఫస్ట్ ప్లేస్ కోసం పోటీ అనేది ఎప్పుడూ ఉంటుంది. ఎప్పటికప్పుడు కొత్త యాప్స్ రావడం, యూజర్ల సంఖ్య పెరగడం లేదా తగ్గడం వల్ల లీడర్ బోర్డ్లో ప్లేస్లు మారుతూ ఉంటాయి. అలాగే కొన్ని బ్రాండ్స్ ప్రమోట్ చేసుకోవడానికి వాళ్లకు సెలక్టివ్ సోషల్ మీడియా ప్లాట్ఫామ్స్ని మాత్రమే వాడతారు. దానివల్ల కూడా కొంత ఎఫెక్ట్ పడుతుంది. అయితే ఏ ప్లాట్ఫామ్ ఏ పొజిషన్లో ఉంది? అనేది తెలుసుకోవడానికి కొన్ని అంశాలను చూస్తారు. అవి... యాక్టివ్ యూజర్స్ సంఖ్య, ప్రస్తుతం ఎంతమంది యునిక్ యూజర్స్ ఆ ప్లాట్ఫామ్లో రిజిస్టర్ అయ్యారు? వంటివి. వీటివల్ల టెక్ ఇండస్ట్రీ పాపులారిటీ, ఎంగేజ్మెంట్, గ్రోత్ వంటివి తెలుస్తాయి.
ఫేస్ బుక్
ప్రస్తుతం టాప్లో ఉన్న సోషల్ మీడియా ప్లాట్ ఫామ్ ఫేస్బుక్. ఇందులో 2.74 బిలియన్ యాక్టివ్ యూజర్స్ ఉన్నారు. ఈ యాప్ మొదలుపెట్టినప్పుడు ఇంటర్నెట్ కనెక్షన్ కూడా చాలా ప్రాంతాల్లో అందుబాటులో ఉండేది కాదు. స్మార్ట్ ఫోన్ వాడేవాళ్లు కూడా తక్కువే. పబ్లిక్ ఇంటరాక్షన్ మీద దెబ్బకొడుతుందనే వాదనలు బాగా వినిపించాయి కూడా. ఇలా రకరకాల సవాళ్లను ఎదుర్కొంది ఫేస్బుక్. కానీ, దాని ఎదుగుదలను మాత్రం ఎవరూ ఆపలేకపోయారు. ఆ రోజుల్లోనే కేవలం పది నెలల్లో ఒక మిలియన్ సబ్స్క్రయిబర్స్ని సంపాదించుకుంది. అంతేకాదు.. రోజుకి దాదాపు ఐదు లక్షల మంది కొత్త యూజర్స్ వాడుతున్నారు. 2004లో లాంచ్ అయిన ఈ యాప్ ఈ ఏడాది మార్చి నాటికి 2.74 బిలియన్ యాక్టివ్ యూజర్స్తో ఇప్పటికీ నెంబర్ వన్ పొజిషన్లో కంటిన్యూ అవుతూనే ఉంది. ఫేస్బుక్ వాడేవాళ్లలో 12 నుంచి 34 ఏండ్ల వయసువాళ్లే ఎక్కువ అని అమెరికాకు చెందిన ఒక రిపోర్ట్ చెప్తోంది. ‘సోషల్ మీడియా ప్లాట్ఫామ్స్లో ఫేవరెట్ ఏది?’ అని అడిగితే.. 2015లో 58 శాతం మంది ఫేస్బుక్కి ఓటేశారు. కానీ, 2020 నాటికి అది 32 శాతానికి తగ్గింది. అందుకు కారణం ‘ఇన్స్టాగ్రామ్’. యాక్టివ్ ఫేస్బుక్ యూజర్స్ ఉన్న దేశాల్లో 290 మిలియన్స్తో ఇండియా మొదటి ప్లేస్లో ఉంది. తర్వాత అమెరికా190 మిలియన్, ఇండోనేసియా140 మిలియన్ యాక్టివ్ యూజర్స్ని కలిగి ఉంది.
ఇన్స్టాగ్రామ్
ప్రపంచంలోనే పాపులర్ ఫొటో, వీడియో షేరింగ్ యాప్ ఇన్స్టాగ్రామ్. గ్లోబల్గా1.22 బిలియన్ యాక్టివ్ యూజర్లతో సోషల్ మీడియా ప్లాట్ఫామ్స్లో ఐదో స్థానంలో ఉంది. మొదట్లో దీని గ్రోత్ ఎలా ఉందంటే... 2012లో 35 మిలియన్ ఉంటే... 2016 నాటికి 500 మిలియన్ యూజర్లకు చేరింది. ఇన్స్టాగ్రామ్ అనేది ఎక్కువగా ఇన్ఫ్లుయెన్సర్స్ని క్రియేట్ చేయడం ద్వారా వరల్డ్ డిజిటల్ మార్కెటింగ్కి కంట్రిబ్యూట్ చేస్తుంది. అయితే, యాక్టివ్గా యూజర్ల విషయంలో ఇన్స్టాగ్రామ్కి గట్టి పోటీ ఇచ్చేది మాత్రం ఫేస్బుక్. అలాగే ఇండియా, అమెరికాలో140 మిలియన్ల యూజర్లు ఇన్స్టా వాడుతున్నట్లు ఆ రెండు దేశాల నేషనల్ డెమోగ్రాఫిక్స్ చెప్తున్నాయి.
ట్విట్టర్
బిజినెస్ మార్కెటింగ్కి ఉపయోగపడే ప్లాట్ఫామ్ ట్విట్టర్. రీసెంట్గా చూస్తే 230 మిలియన్ యూజర్లు ప్రతి రోజు యాక్టివ్గా ఉంటున్నట్లు స్టాటిస్టిక్స్ చెప్తున్నాయి. ఇందులో బ్రాండ్స్ ప్రమోట్ చేయడానికి మైక్రోబ్లాగింగ్ పద్ధతి వాడుతున్నారు. దానివల్ల బ్రాండ్స్ ప్రమోషన్స్ పబ్లిక్కి బాగా రీచ్ అవుతున్నాయి.
ఈ మధ్య చేసిన సర్వే ప్రకారం ట్విట్టర్ యూజర్స్ అమెరికాలోనే ఎక్కువ ఉన్నారు. అక్కడ 64.6 మిలియన్ల యూజర్లు వాడుతున్నారు. అమెరికాలో చాలా ఫాస్ట్గా ఎదిగిన సోషల్ మీడియా ప్లాట్ఫామ్స్లో ఒకటి ట్విట్టర్. ఆ తర్వాత జపాన్లో 51.8 మిలియన్ యూజర్లు ఉన్నారు. ఈ రెండు దేశాల్లో కలిపి115 మిలియన్ల యాక్టివ్ యూజర్లు ఉన్నారు ట్విట్టర్కు. అయితే, ట్విట్టర్ని వాడే వాళ్లలో మనదేశం15 మిలియన్ల యూజర్లతో ఐదో స్థానంలో ఉంది.
ఈ లెక్కలన్నీ చూసుకుంటే... ఇప్పటికే ఇన్స్టాగ్రామ్ టాప్లో ఉంది. కాబట్టి థ్రెడ్స్ కూడా అదే రేంజ్లో ఉండే అవకాశం ఉంది. ఒకరకంగా చెప్పాలంటే ట్విట్టర్కు థ్రెడ్స్ పోటీనే కాదు. అంతేకాదు.. థ్రెడ్స్లో డెవలప్ చేయాల్సింది చాలా ఉంది. కాబట్టి పూర్తిగా డెవలప్ అయ్యాక అది ఎంతమందికి నచ్చుతుందో చెప్పలేం. నచ్చకపోతే డీ–యాక్టివేట్ చేసే అవకాశం లేకపోలేదు. ఒకవేళ ట్విట్టర్ రూల్స్లో మస్క్ ఏవైనా మార్పులు చేస్తే, అవి యూజర్లకు నచ్చితే ట్విట్టర్కు యూజర్స్ పెరిగే అవకాశం ఉంది. పైగా థ్రెడ్స్ డౌన్లోడ్ చేసుకున్నంత ఈజీగా డిలీట్ చేయలేరు. ఎందుకంటే థ్రెడ్స్
తేడాలేంటి?
మెటా కుటుంబం నుంచి రావడం వల్లే థ్రెడ్స్కి ఇంత హైప్ వచ్చినా.. దాంట్లో ఉన్న ఫీచర్స్ డౌన్లోడ్స్ పెరిగేలా చేసింది.16 ఏళ్ల ప్రస్తానం ఉన్న ట్విట్టర్కి ప్రత్యర్థిగా సోషల్ మీడియాలోకి అడుగుపెట్టింది థ్రెడ్స్. అసలు ట్విట్టర్, థ్రెడ్స్ల మధ్య తేడాలేంటి? ఈ రెండు ఒకేలా పనిచేస్తాయా? అంటే...
అవైలబిలిటీ
ట్విట్టర్ సుమారు 16 సంవత్సరాల క్రితం మొదలైనప్పుడు అది కేవలం ఒక వెబ్సైట్ మాత్రమే. చాలా ప్రజాదరణను పొందింది. తర్వాత స్మార్ట్ఫోన్ల వాడకం పెరగడంతో చివరికి ఆండ్రాయిడ్, ఐఓఎస్ యాప్ని తీసుకొచ్చింది. ఇది కూడా చాలా స్పీడ్గా పాపులర్ అయ్యింది. కానీ.. థ్రెడ్స్ అలా కాదు.. యాప్ -మాత్రమే ఉంది. వెబ్లో వాడుకోవడానికి అవకాశం లేదు. ఇన్స్టాగ్రామ్ సక్సెస్తో ఈ యాప్ని తీసుకొచ్చింది మెటా. కానీ థ్రెడ్స్ వెబ్సైట్ తీసుకురాకపోవచ్చు.
అకౌంట్ సింక్
ట్విట్టర్ ఇండిపెండెంట్ యాప్. ఇ–మెయిల్, ఫోన్ నెంబర్ లాంటి డిటెయిల్స్ ఇచ్చి లాగిన్ కావొచ్చు. మరే ఇతర యాప్తో సంబంధం లేకుండా పనిచేస్తుంది. కేవలం లాగ్ సమాచారాన్ని మాత్రమే తీసుకుంటుంది. కానీ థ్రెడ్స్ ఇన్స్టాగ్రామ్తో సింక్ అవుతుంది. ఇన్స్టాగ్రామ్ అకౌంట్ లేకుండా థ్రెడ్స్లోకి లాగిన్ అవడం కుదరదు.
వెరిఫికేషన్
ట్విట్టర్ని మస్క్ కొన్న తర్వాత అనేక మార్పులు చేశాడు. ముఖ్యంగా వెరిఫికేషన్ సబ్స్క్రిప్షన్ ప్రోగ్రామ్ తీసుకొచ్చాడు. వాస్తవానికి దీంతో చాలా ప్రయోజనాలు ఉన్నాయి. కానీ.. ఇది ఊరికే రాదు. డబ్బులు కట్టి సబ్స్క్రిప్షన్ తీసుకోవాలి. తర్వాత ఇన్స్టాగ్రామ్ కూడా దాన్నే ఫాలో అయ్యింది. వెరిఫికేషన్కు కొంత డబ్బు ఛార్జ్ చేసింది. కానీ.. థ్రెడ్స్లో ప్రత్యేకంగా వెరిఫికేషన్ టిక్ కోసం ఖర్చు చేయాల్సిన అవసరం లేదు. ఇన్స్టాగ్రామ్లో టిక్ మార్క్ ఉంటే థ్రెడ్స్లో కూడా వస్తుంది.
మల్టీమీడియా పోస్ట్లు
రెండు ప్లాట్ఫామ్స్లో వెబ్సైట్ లింక్లు, వీడియోలు, ఫొటోలను పోస్ట్ చేసే వీలుంది. రెండింటిలోనూ జిఫ్ ఫైల్ని కూడా పోస్ట్ చేయొచ్చు. కానీ థ్రెడ్స్లో పోస్ట్ చేయడానికి ముందుగా కెమెరా రోల్లో జిఫ్ని సేవ్ చేయాలి. ట్విట్టర్లో ఒక్కో ట్వీట్కు నాలుగు ఫొటోలు మాత్రమే ఎటాచ్ చేయొచ్చు. థ్రెడ్స్లో ఒకేసారి పది షేర్ చేయొచ్చు.
సోషల్ మీడియా ప్లాట్ఫామ్స్లో పోస్ట్చేసే కంటెంట్, వీడియోలకు లైక్స్, సబ్స్క్రయిబర్స్ పెరుగుతుంటే చెప్పలేనంత ఆనందంగా ఉంటుంది కదా! అలాగే మన పోస్ట్లు షేర్ అయ్యి ...వైరల్ అవుతుంటే ‘మేఘాలలో తేలిపొమ్మన్నది’ అంటూ మనసు తెగ పాటలు పాడేసుకుంటుంది. పాపులారిటీ పెరిగిపోయి మానిటైజేషన్ మొదలైందంటే.... ఎవరి జీవితానికి వాళ్లే మహారాజు/మహారాణి. కొందరైతే ఒకటికి మించి అకౌంట్లు మేనేజ్ చేస్తుంటారు కూడా. ఇదంతా సోషల్ మీడియా ప్లాట్ ఫామ్స్కి ఇవతల ఉండి వాడుతున్న వాళ్ల పరిస్థితి. కానీ... ఆ ప్లాట్ఫామ్స్ను మనకి అందిస్తున్న కంపెనీలు మాత్రం వీటి విషయంలో క్షణక్షణానికి పోటీపడుతుంటాయి. ‘నువ్వు ఆ ఫీచర్ ఇచ్చావా? చూస్కో నేను ఈ ఫీచర్ యాడ్ చేశా’ అనుకుంటూ యాప్స్ను డెవలప్ చేస్తుంటాయి.
థ్రెడ్స్ వాడుతున్నసెలబ్రిటీలు
సెలబ్రిటీలు, న్యూస్ ఆర్గనైజేషన్స్, కార్పొరేషన్స్ కొన్ని థ్రెడ్స్ వచ్చిన వెంటనే వాడడం మొదలుపెట్టాయి. వాళ్లలో జెన్నిఫర్ లోపెజ్, షకీరా, గోర్డన్ రామ్సే, టామ్ బ్రాడీ, కోల్డ్ప్లే, కిమ్ కర్దాషియన్, ఓప్రా, కైలీ జెన్నర్ వంటి సెలబ్రిటీలు ఉన్నారు. మిస్టర్ బీస్ట్ – పేరున్న యూట్యూబర్. థ్రెడ్స్లోకి వచ్చిన వెంటనే 7,40,000 సబ్స్క్రయిబర్లను తెచ్చుకున్నాడు. ఇంకా సబ్స్క్రయిబర్స్ యాడ్ అవుతూనే ఉన్నారు. నెట్ఫ్లిక్స్, , మెక్ డోనాల్డ్స్, స్పోటిఫై, యాపిల్ వంటి కంపెనీలు, ది న్యూయార్క్ టైమ్స్, బీబీసీ వంటివి థ్రెడ్స్లో చేరాయి. డెయిలీ మెయిల్ అయితే న్యూస్ స్టోరీలను పోస్ట్ చేయడం మొదలుపెట్టేసింది.
థ్రెడ్స్, ట్విట్టర్ మధ్య తేడాలు
- థ్రెడ్స్లో హ్యాష్ట్యాగ్స్ లేవు
- అవసరమైన టెక్స్ట్ లేదా ఫ్రేజెస్ వెతికే ఆప్షన్ లేదు.
- ఒక సింగిల్ పోస్ట్లో పది ఫోటోలు షేర్ చేయొచ్చు. ఇన్స్టాగ్రామ్లో కూడా సేమ్ లిమిట్ ఉంది. ట్విట్టర్లో అయితే నాలుగు ఫొటోలు మాత్రమే పోస్ట్ చేయొచ్చు.
- థ్రెడ్స్లో 500 క్యారెక్టర్ల లిమిట్ ఉంది. అదే ట్విట్టర్లో అయితే మ్యాగ్జిమమ్ 280 క్యారెక్టర్లు మాత్రమే పోస్ట్ చేయొచ్చు.
- థ్రెడ్స్లో ఐదు నిమిషాలుకు మించని వీడియోలు పోస్ట్ చేయొచ్చు.
- ఒకవేళ థ్రెడ్స్ అకౌంట్ వద్దనుకుంటే డీ యాక్టివేట్ చేయొచ్చు. కానీ మీ డాటా మాత్రం డిలీట్ కాదు. ఒకవేళ థ్రెడ్స్ అకౌంట్ పూర్తిగా డిలీట్ చేయాలనుకుంటే మాత్రం దానికి లింక్ అయి ఉన్న ఇన్స్టాగ్రామ్ ఖాతా కూడా మూసేయాల్సిందే.
గెలుపు ఎవరిది?
ఇప్పటివరకు డామినెంట్ పొజిషన్లో ఉన్న ట్విట్టర్ను థ్రెడ్స్ రీప్లేస్ చేస్తుందా అంటే ముందు ముందు చూడాల్సిందే. ఇది ఒక్క రోజులో ఒక్క మాటలో తేల్చే విషయం కాదు. ఒకరకంగా చెప్పాలంటే చాలా పెద్ద యుద్ధం. ఏదెలా ఉన్నా ఇన్ఫ్లుయెన్స్, ఆనర్, పవర్, ప్లెజర్, మనీ(డాలర్లు) వంటివే ముఖ్యం. వాటి ముందు వాటి యూజర్స్ మనమంతా వెనకే ఉంటాం.
ఎలాన్ మస్క్ v/s జుకర్బర్గ్
ట్విట్టర్కి పోటీగా ఇన్స్టాగ్రామ్ తెచ్చిన థ్రెడ్స్ యాప్ ఒక వారం రోజుల్లోనే వంద మిలియన్ల యూజర్లను సొంతం చేసుకుంది. ఇప్పటివరకు ఇంత స్పీడ్గా ఎదిగిన యాప్ లేదు. ఓపెన్ ఎఐ చాట్జీపీటీ ఇంతకు ముందు వంద మిలియన్ల యాక్టివ్ యూజర్లను తెచ్చుకుని రికార్డుకి ఎక్కింది. అంతమంది యూజర్లు వచ్చేందుకు దానికి రెండు నెలలు పట్టింది. కానీ థ్రెడ్స్ యాప్ మాత్రం లాంచ్ చేసిన మొదటి 24 గంటల్లో 30 మిలియన్లకు పైగా యూజర్లను సొంతం చేసుకుంది.
ఇండియాలో ఎక్కువ
ట్విట్టర్కి పోటీగా ఇప్పటివరకు ఎన్ని యాప్స్ వచ్చినా అంత సక్సెస్ కాలేదు. కానీ.. ఇప్పుడు వచ్చిన థ్రెడ్స్ని మాత్రం ప్రపంచమంతా యాక్సెప్ట్ చేస్తోంది. దీన్ని మెటా తీసుకురావడం వల్లే ఇంత క్రేజ్ వచ్చింది. పైగా మన దేశం నుంచే ఎక్కువ డౌన్లోడ్స్ అయ్యాయి. మొదటి రోజున వచ్చిన మొత్తం డౌన్లోడ్స్లో ఇండియా నుంచి దాదాపు 22శాతం ఉన్నాయి. తర్వాత స్థానంలో బ్రెజిల్, అమెరికాలు 16, 14శాతాలతో ఉన్నాయి. ప్రపంచవ్యాప్తంగా ఈ యాప్ని ఎక్కువగా ఆండ్రాయిడ్ యూజర్స్ డౌన్లోడ్ చేసుకున్నారు. ఆండ్రాయిడ్ వాటా దాదాపు 75 శాతం ఉండగా ఐఓఎస్ వాటా 25 శాతం.
ట్విట్టర్కు ఎందుకు దెబ్బ?
ఎలాన్ మస్క్ 44 బిలియన్ డాలర్లు పెట్టి ట్విట్టర్ను కొన్నాడు. ఆ తర్వాత అందులో చేసిన మార్పులు, అడ్వర్టైజ్మెంట్స్ ఇచ్చేవాళ్లను ఇబ్బంది పెట్టాయి. అలాగే యూజర్ చూసే ట్వీట్ల సంఖ్యకు లిమిట్ పెట్టడం, బ్లూ టిక్ కోసం డబ్బులు కట్టమనడం వంటివి చేయడం వల్ల ట్విట్టర్కు బదులు వేరే యాప్లకు వెళ్లిపోయారు యూజర్లు. అలా రోజురోజుకి ట్విట్టర్ చూసేవాళ్ల సంఖ్య తగ్గుతూ వచ్చింది. ఇదే అదనుగా చూసిన జుకర్బర్గ్, కరెక్ట్ టైంలో థ్రెడ్స్ను లాంచ్ చేశాడు. అంతేకాదు... అలా వచ్చిందో లేదో ఇన్స్టాగ్రామ్ యూజర్లంతా థ్రెడ్స్లోకి సైనప్ అయ్యారు. నిజానికి ట్విట్టర్కు నెలకు 22.9 కోట్ల మంది యాక్టివ్ యూజర్లు ఉన్నట్టు గతంలో మస్క్ చెప్పాడు. అయితే, మెటాకు చెందిన ఇన్స్టాగ్రామ్కు ఏకంగా నెలకు 200 కోట్ల మంది యాక్టివ్ యూజర్లు ఉన్నారు. ఇప్పుడు వాళ్లంతా థ్రెడ్స్లోకి రావడంతో రాబోయే రోజుల్లో ట్విట్టర్ను థ్రెడ్స్ దాటేయడం ఖాయంగా కనిపిస్తుంది.
కాకపోతే... ప్రస్తుతానికి థ్రెడ్స్కి కూడా కొన్ని లిమిటేషన్స్ ఉన్నాయి. ఆండ్రాయిడ్, ఐఓఎస్ యూజర్లకు మాత్రమే ఈ యాప్ అందుబాటులో ఉంది. వెబ్, డెస్క్ టాప్లోకి ఇంకా రాలేదు. వందకు పైగా దేశాల్లో మాత్రమే ఇది వాడకంలో ఉంది. యూరప్ సహా మరికొన్ని దేశాల్లో ఇంకా అందుబాటులోకి రావాల్సి ఉంది. ఈ యూప్లో హ్యాష్ ట్యాగ్స్, కీవర్డ్ సెర్చ్ వంటి ఫంక్షన్స్ ఇప్పటికైతే లేవు. డైరెక్ట్గా మెసేజ్ పంపే ఆప్షన్ కూడా లేదు. కాబట్టి వీటన్నింటినీ తీసుకొస్తేనే ట్విట్టర్ని రీప్లేస్ చేసే అవకాశం ఉంటుంది.