పోలెండ్కు గ్యాస్ సప్లై కట్
బల్గేరియాకు కూడా ఆపేసిన రష్యా
రూబుల్లో చెల్లింపులపై పేచీతో నిర్ణయం
కీవ్ : యూరోపియన్ దేశాలు పోలెండ్, బల్గేరియాలకు గ్యాస్ సరఫరాను రష్యా కట్ చేసింది. ఈ నెలకు సంబంధించి చెల్లింపులు ఇంకా అందకపోవడంతో బుధవారం సరఫరా ఆపేసింది. వెస్ట్రన్ దేశాల ఆంక్షల నేపథ్యంలో రష్యాకు డాలర్లలో ఎలాంటి లావాదేవీలు జరిపే వీల్లేకుండా పోయింది. దీంతో తమ సొంత కరెన్సీ రూబుల్లోనే వ్యాపారం చేస్తామని, రూబుల్లో చెల్లింపులు జరిపిన వాళ్లకే నేచురల్ గ్యాస్ అందజేస్తామని గతంలోనే ప్రకటించింది. తాజాగా ప్రెసిడెంట్ పుతిన్ నిర్ణయాన్ని ప్రభుత్వ సంస్థ గాజ్ప్రోమ్ బుధవారం అమలుచేసింది. ఇకముందు కూడా రూబుల్లో చెల్లింపులు జరిపితేనే గ్యాస్ సరఫరా చేస్తామని తేల్చిచెప్పింది. రష్యా నిర్ణయంతో యురోపియన్ దేశాల్లో గ్యాస్ ధరలు ఒక్కసారిగా దాదాపు 20% పెరిగాయి. రష్యా నిర్ణయంతో పోలెండ్, బల్గేరియా దేశాలకు వెంటనే ఇబ్బంది లేకపోయినా.. కొంతకాలం తర్వాత ఇబ్బంది తప్పదని నిపుణులు చెప్తున్నారు. గ్యాస్ సరఫరా ఆపేస్తుందనే విషయం ఊహించిందేనని అంటున్నారు. ఇప్పటికే ఉన్న నిల్వలు ఇంకొంత కాలం వస్తాయని, ఎండాకాలం కావడంతో ఇండ్లల్లో గ్యాస్ వాడకం ఎక్కువగా ఉండదని చెప్పారు. కాగా, 27 దేశాలు ఉన్న యూరోపియన్ యూనియన్లో అర్జెంటుగా ఓ స్పెషల్ గ్రూపు ఏర్పాటైంది. రష్యా గ్యాస్ సరఫరా ఆపేయడం వల్ల ఈయూ దేశాలపై పడే ప్రభావాన్ని సాధ్యమైనంత తక్కువ చేయడానికి ఇది పనిచేస్తుంది. రష్యా నిర్ణయాన్ని వెస్ట్రన్ దేశాలు తప్పుబడుతున్నాయి. బ్లాక్మెయిలింగ్కు ఇదేమీ తీసిపోదని బల్గేరియా ప్రధాని కిరిల్ విమర్శించారు.
