- రూ.99,999 కొట్టేసిన వైనం
చెన్నై: డీఎంకే ఎంపీ దయానిధి మారన్ బ్యాంక్ ఖాతా నుంచి సైబర్ నేరగాళ్లు డబ్బులు కాజేశారు. నెట్ బ్యాంకింగ్ ద్వారా తన సేవింగ్స్ అకౌంట్లోంచి రూ.99,999 క్యాష్ దోచేశారని ఆయన మంగళవారం చెన్నై పోలీస్ కమిషనర్కు పిర్యాదు చేశారు. తన ఫోన్కు ఎలాంటి ఓటీపీ కూడా రాలేదని, ఒకే ట్రాన్సాక్షన్లో డబ్బు ఖాళీ చేశారని పేర్కొన్నారు. అయితే, ఈ ఘటనకు ముందు తన భార్యకు 2 వేర్వేరు నంబర్ల నుంచి 3 కాల్స్ వచ్చాయని చెప్పారు. తన భార్యతో గోపాలపురం బ్యాంక్లో జాయింట్ అకౌంట్ ఉన్నప్పటికీ ఆమె ఫొన్ నంబర్ మాత్రం ఖాతాకు అటాచ్ చేసి లేదని వివరించారు. ఆమె కాల్స్ మాట్లాడి పెట్టేసిన కొద్దిసేపట్లోనే అకౌంట్లోంచి డబ్బులు డెబిట్ అయినట్లు మెసేజ్ వచ్చిందని ఫిర్యాదులో పేర్కొన్నారు. ఇలాంటి మోసాలకు పాల్పడేవాళ్లపై చర్యలు తీసుకోవాలని దయానిధి మారన్ కోరారు.
