చేర్యాల, వెలుగు : మా భూమి మాకివ్వాలని డిమాండ్ చేస్తూ దళితులు జీపీ ఎదుట ధర్నా చేసిన ఘటన మంగళవారం సిద్దిపేట జిల్లా మద్దూరు మండలంలోని నర్సాయపల్లి గ్రామంలో జరిగింది. ఈ సందర్భంగా వారు మాట్లాడుతూ..ఇందిరమ్మ హయాంలో ఇచ్చిన భూమిని సర్పంచ్ఆక్రమించి పల్లె ప్రకృతి వనం ఏర్పాటు చేశారని, తమకు మరోచోట భూమిని కేటాయిస్తామని హామీ ఇచ్చి మూడు సంవత్సరాలైనా ఇవ్వడంలేదని ఆరోపించారు.
ఎన్నిసార్లు సర్పంచ్, జీపీ కార్యదర్శి, ఎంపీపీని కోరినప్పటికీ పట్టించుకోవడం లేదని వాపోయారు. తమ భూమి తమకు ఇచ్చే వరకు పోరాటం ఆపేది లేదని హెచ్చరించారు. ఈ క్రమంలో దళితులంతా మాజీ ఎమ్మెల్యే కొమ్మూరి ప్రతాపరెడ్డిని ఆశ్రయించగా..కాంగ్రెస్ అండగా ఉంటుందని భరోసా ఇచ్చారు.
