దేశంలో మధుమేహ బాధితుల సంఖ్య రోజురోజుకూ ఆందోళన కలిగిస్తోంది. ప్రస్తుతం దేశంలో 101 మిలియన్లు అంటే 10 కోట్లకు పైగా మంది షుగర్ పేషంట్లు ఉన్నట్టు ఐసీఎంఆర్ (ICMR) తాజా అధ్యయనంలో వెల్లడించింది. 2019లో ఈ సంఖ్య 70 మిలియన్లు ఉండగా.. నాలుగేళ్లలో 100 మిలియన్లు దాటడం ప్రమాద ఘంటికలు మోగిస్తోంది. ఈ అధ్యయన ఫలితాలను లాన్సెట్ (Lancet) మెడికల్ జర్నల్‌ ప్రచురించింది. కొన్ని అభివృద్ధి చెందిన రాష్ట్రాల్లో ఈ బాధితుల సంఖ్య స్థిరంగా ఉన్నప్పటికీ అనేక రాష్ట్రాల్లో భారీ రేటుతో పెరుగుతుండటం తక్షణమే ప్రభుత్వాలు జోక్యం చేసుకోవాల్సిన ఆవశ్యకతను గుర్తు చేస్తున్నాయి.
‘గోవా, కేరళ, తమిళనాడు, చండీగఢ్‌లలో మధుమేహ కేసులతో పోలిస్తే ప్రీ-డయాబెటిస్ కేసులు తక్కువగా ఉన్నాయి. పుదుచ్చేరి, ఢిల్లీలలో ఒకే రకమైన పెరుగుదలను కలిగి ఉన్నాయి. మధుమేహం తక్కువగా ఉన్న రాష్ట్రాల్లో ప్రీ-డయాబెటిస్ బాధితులు ఎక్కువ సంఖ్యలో ఉన్నారని మద్రాస్ డయాబెటిస్ రిసెర్చ్ ఫౌండేషన్ అధ్యక్షురాలు డాక్టర్ రంజిత్ మోహన్ అంజన అన్నారు.
ప్రీ-డయాబెటిక్ అంటే..
రక్తంలో చక్కెర స్థాయి సాధారణం కంటే ఎక్కువగా ఉండడమే ప్రీ డయాబెటిక్ అంటే. అయితే మనకు తెలిసిన టైప్-2 డయాబెటిస్‌గా పరిగణించబడేంత ఎక్కువగా ఉండదు. జీవనశైలిలో మార్పులు లేకుండా ప్రీ-డయాబెటిస్ ఉన్న పెద్దలు, పిల్లలకు మధుమేహం దీని వల్ల ముప్పు ఉంది. ప్రీ-డయాబెటిస్ ఎలా మధుమేహంగా మారతాయో చెప్పలేని చోట వైద్యులు థర్డ్స్ రూల్‌ను పాటిస్తున్నారు. ‘ప్రీ-డయాబెటిస్ ఉన్నవారిలో మూడింట ఒక వంతు మందికి కొన్ని సంవత్సరాలలో మధుమేహం వస్తుంది.. మరో మూడింట ఒక వంతు మంది ప్రీ-డయాబెటిక్ ఉండవచ్చు.. ఆరోగ్యకరమైన ఆహారం, జీవనశైలి, వ్యాయామంతో సహా వివిధ కారణాల వల్ల మిగతవారు పరిస్థితిని తిప్పికొట్టవచ్చు’ అని సీనియర్ డయాబెటాలజిస్ట్ డాక్టర్ వి మోహన్ అన్నారు.
తాజాగా వెల్లడైన ఈ అధ్యయనంలో 2008 అక్టోబర్ 18 నుంచి 2020 డిసెంబరు 17 మధ్య గ్రామీణ, పట్టణ ప్రాంతాలకు చెందిన లక్ష మందికి పైగా ప్రజలను పరీక్షించారు. 2019 నాటి సర్వేలో 74 మిలియన్ల మంది మధుమేహంతో బాధపడుతున్నారని ఈ పరిశోధనలో తేలింది. రెండేళ్ల తర్వాత తక్కువ-ప్రాబల్యం ఉన్న ఈశాన్య రాష్ట్రాల పరిస్థితులను కలిపితే 72 మిలియన్లకు పడిపోయింది. ఈసారి మాత్రం తాము 31 రాష్ట్రాలు, కేంద్రపాలిత ప్రాంతాల్లో అధ్యయనం చేపట్టామని, ఫలితాలను క్షేత్రస్థాయిలో వాస్తవాన్ని ప్రతిబింబిస్తున్నాయని డాక్టర్ మోహన్ చెప్పారు.
