హైదరాబాద్ మార్కెట్లు నిత్యం కళలాడిపోతాయి. షాపింగ్ జరుగుతున్న రోజుల్లో కళకళలాడినహైదరాబాద్ నగరం, పండుగరోజు మాత్రం ఖాళీ రోడ్లతోనే కనిపిస్తుంది. జనాలు సంబరాల కోసం పట్నం నుంచి పల్లు బాట పడతారు. మరి దసరా అంటే తెలంగాణలో పెద్ద పండుగ కదా..!
సాధారణంగా దసరా రోజున దుర్గ అమ్మవారికి, శ్రీరాముడికి, ఆంజనేయస్వామికి పూజలు చేస్తారు. కొన్నిచోట్ల ఉదయం, కొన్నిచోట్ల సాయంత్రం పూజలు చేస్తారు. సాయంత్రానికి గుడికెళ్లే అలవాటున్న ఇళ్లలో పిల్లలు పొద్దున్నుంచే కొత్త బట్టలు వేసుకోవాలని చేసే అల్లరి మామూలుగా ఉండదు. సిటీలు, పట్టణాల్లో అయితే దగ్గరలోని గుళ్లకే వెళ్తుంటారు. పల్లెల్లో మాత్రం దసరా రోజు అందరూ కలిసి ఊరవతల ఉండే ఆంజనేయస్వామి గుడికో... రాముడి గుడికో వెళ్తుంటారు. అక్కడ పాలపిట్టను చూడటం. జమ్మి చెట్టుకి మొక్కడం సంప్రదాయంగా ఏ నాటి నుంచో ఉంది.
ఎక్కువ ఊళ్లలో మాత్రం దసరా పండుగంటే సాయంత్రం జరిగే పూజలే. పొద్దున ఇష్టమైన వంటలన్నీ చేసుకొని తిని, సాయంత్రానికి చక్కగా తయారై గుళ్లకు వెళ్తుంటారు పెద్దలు, పిల్లలు. మధ్యాహ్నం ఇంట్లో చికెన్, మటన్.. లాంటి నాన్ వెజ్ వంటలే వండుకున్నా కూడా సాయంత్రానికి గుడికి వెళ్తుంటారు .
నాన్ వెజ్.. స్వీట్స్..
దసరా అంటే ఇష్టమైన వంటలు చేసుకునే పండుగ కూడా. పండుగకి రెండు రోజుల ముందు నుంచే పిల్లల కోసం ఇళ్లలో పిండి వంటలు చేస్తారు. ఆరిసెలు, అప్పాలు, సకినాలు, లడ్డూలు.. ఇలా రకరకాల పిండి వంటలు కూడా పిల్లలకు ఈ పండుగను ఎక్కువ సంతోషంగా ఉంచేదే. అలాగే దసరా పండుగంటే నాన్ వెజ్ స్పెషల్స్ కు కేరాఫ్, పండుగ రోజు ఏ ఇంటికి వెళ్లినా కోడి కూరనో, మేక కూరనో స్పెషల్. తెలంగాణలో ఈ పండుగ వచ్చిందంటే బగారన్నం, దానికి నాన్ వెజ్ కలపడం అన్నది ఎవర్ గ్రీన్ఫుడ్ ఐటమ్. .ఈ ఒక్కరోజు మాత్రం ఇలాంటి వాటిల్లో దేవుడు ''మాఫ్' చేస్తాడనే మాట చాలామంది చెప్తారు.
ఎన్నెన్నో పురాణ కథలు
ఏ యుగంలోనైనా చెడుకి, మంచికి ఎప్పుడూ పోరాటం జరుగుతూనే ఉంటుంది. అందులో చెడుపై మంచి గెలుస్తూనే ఉంటుంది. ఆ గెలుపును ఒక వేడుకలా జరుపుకోవడమనే ఫిలాసఫీ దసరా పండుగలో ఉంది. దసరా పండుగ వెనుక ఎన్నో పురాణ కథలు ఉన్నాయి. మహిషాసురుడనే రాక్షసుడిని దుర్గాదేవి చంపిన ఆనందంలో దసరా పండుగ చేసుకుంటారన్నది మనకు ప్రధానంగా వినిపించే కథ. ఇది కాకుండా రామాయణ మహాభారతాల్లోనూ దసరా పండుగ ఎందుకుచేసుకుంటామనే దానికి కథలున్నాయి.
ఈ అన్ని కథల్లోనూ.. చెడుపై విజయమే ప్రధానమైన అంశం. అన్ని కథల్లోనూ చెడుపై మంచికి విజయం 'దశమి' రోజునే దక్కింది. అందుకే 'విజయ దశమి' అయ్యింది . వీటిల్లో ఏ కథను లెక్కలోకి తీసుకున్నా, అది విజయదశమే. మనందరం వైభవంగా చేసుకుంటున్న పెద్ద పండుగే..
భక్తి ఒక్కటే కాదు...
చెడుపై మంచి సాధించే విజయమే ఈ పండుగని చెప్పుకున్నాం కదా! ఇది మానవుడికి మరింకెన్నో రూపాల్లో కూడా గొప్ప పండుగ ఎందుకంటే చీకటి నుంచి వెలుగు వైపునకు చేసే ప్రయాణం ఈ పండుగ. అలాగే అజ్ఞానం నుంచి జ్ఞానం వైపునకు అడుగులు వేయడం కూడా ఈ పండుగలో ఉన్న ఫిలాసఫీనే. అందుకే ఈ పండుగలో దేవుడిని పూజించడం అన్న ఆలోచన, భక్తి ఒక్కటే ఉండదు.
బంధువులు, స్నేహితులను కలుసుకొని 'అలయ్ ఐలయ్' ఇచ్చుకోవడం, అందరూ బాగుండాలని కోరుకోవడం, అందరితో కలిసి రావణదహనంలో పాల్గొనడం దసరా రోజు కనిపిస్తుంది. ఇది చెడుపై పోరాటానికి అందరూ ఏకం కావాలన్న ఆలోచనను గుర్తు చేస్తుంది. ఏ పండుగ అయినా ఎక్కడెక్కడో వాళ్ల వాళ్ల ఉద్యోగాల కోసం వెళ్లిపోయిన మనుషులందరినీ ఒక్కటి చేస్తుంది.
బస్ టికెట్ రేట్లు పెరిగినా, రైళ్లలో నిలబడటానికి చోటు కూడా లేకున్నా సొంత ఊళ్లకు అందరూ పండుగ వస్తున్నదంటే 'క్యూ' కడుతున్నారంటే, ఆ పండుగ చిన్న పండుగ కాదు.. ఈ దసరా అందరికీ విజయాన్ని కోరుకుందాం. .
