అది ఒక కాలేజ్. అమ్మాయిలు, అబ్బాయిలంతా ఒకచోట చేరారు. ఆ తర్వాత అమ్మాయిలతో అబ్బాయిలు డేటింగ్ మొదలుపెట్టేశారు. నాలుగు గంటల పాటు డేటింగ్లో మునిగిపోయారు. అదేంటి కాలేజ్లో డేటింగా? అన్న డౌట్ వచ్చిందా. అవును, అచ్చంగా డేటింగే. కానీ, అది ఆ కాలేజ్ పెట్టిన కోర్సు అది. ‘జెండర్ అండ్ కల్చర్’ అనే కోర్సులో భాగంగా డేటింగ్, లవ్, శృంగారంపై క్లాసులు చెబుతోంది ఆ కాలేజ్. దక్షిణ కొరియాలోని సెజాంగ్ యూనివర్సిటీ ఈ స్పెషల్ డేటింగ్ కోర్సును ప్రవేశపెట్టింది.
డేటింగ్ అయిపోగానే దానిపై స్టూడెంట్లు అసైన్మెంట్లు రాసి ఇవ్వాల్సి ఉంటుంది. చాలా మంది స్టూడెంట్లు డేటింగ్ క్లాసులపై ఆసక్తి చూపిస్తున్నారని బే జియాంగ్ వ్యూన్ అనే లెక్చరర్ చెప్పారు. ఇంతకుముందు డేటింగ్ చేయని విద్యార్థులు తమకంటూ ఓ భాగస్వామిని సెట్ చేసుకోవాలని చూస్తున్నారన్నారు. కొరియా ఇనిస్టిట్యూట్ ఫర్ హెల్త్ అడ్ సోషల్ అఫైర్స్ ప్రకారం దక్షిణ కొరియాలో 20 నుంచి 44 ఏళ్ల మధ్య వయసున్నోళ్లు ఎక్కువ మంది ఒంటరిగానే ఉంటున్నారట.
26 శాతం మంది పెళ్లికాని మగవాళ్లు, 32 శాతం మంది పెళ్లికాని ఆడవాళ్లు మాత్రమే రిలేషన్లో ఉన్నారట. 51 శాతం మంది పురుషులు, 64 శాతం మంది మహిళలు ఒంటరి జీవితాన్ని గడుపుతున్నారట. దానికీ ఓ కారణముంది. నిరుద్యోగం. 17 ఏళ్లలో అక్కడ నిరుద్యోగం దారుణంగా పెరిగిపోయింది. పదిలో ఒక్కరికి మాత్రమే ఉద్యోగం వస్తోంది.
దీంతో ఉన్న టైం ఉద్యోగం వెతుక్కోవడానికే సరిపోతోందని, పైసల్లేక కష్టమవుతోందని, అట్లాంటి పరిస్థితుల్లో డేటింగ్ కొయ్యను మెడకు ఎలా తగిలించుకోవాలని యూత్ అంటున్నారు. ఉద్యోగం ఉన్నవాళ్లలోనూ 30 శాతం మందే డేటింగ్లో బిజీ అయిపోతున్నారట. జాబ్ మార్కెట్లో పోటీ పెరిగిపోవడంతో కొందరు ఫ్రీ టైంలో ప్రొఫెషనల్ నైపుణ్యాలు పెంచుకునేందుకు సర్టిఫికెట్ కోర్సులు కూడా చేస్తున్నారు.
భద్రం కాదేమో...
చాలా మంది డేటింగ్ అంత భద్రం కాదేమోనని భయపడుతున్నారు. లింగ వివక్ష, సెక్స్ నేరాలు, రేప్ల వంటి వాటిని ఎత్తి చూపుతున్నారు. అంతేకాదు, డేటింగ్లో ఉన్నోళ్లు తమ భాగస్వాములపై పాల్పడిన నేరాలనూ గుర్తు చేస్తున్నారు. తన స్నేహితురాలిపై ఆమె బాయ్ఫ్రెండ్ దాడి చేయడంతో తాను డేటింగ్కు దూరంగా ఉంటున్నానని ఓ స్టూడెంట్ చెప్పింది.
అంతేకాదు, కొందరు డేటింగ్ పేరుతో అసభ్యకరంగా ప్రవర్తించే వాళ్లూ ఉంటారని, తమను సీక్రెట్గా అశ్లీలంగా ఫొటోలు, వీడియోలు తీసే ప్రమాదముందని అంటున్నారు. దీంతో వాటన్నింటిపైనా అవగాహన కల్పిస్తూ డేటింగ్ క్లాసులు చెబుతున్నారు. సెక్స్ ఎడ్యుకేషన్నూ అందులో భాగం చేశారు. స్టూడెంట్లు పోర్న్ వైపు వెళ్లకుండా ఇలాంటి క్లాసులు ఉపయోగపడతాయని యూనివర్సిటీ లెక్చరర్లు చెబుతున్నారు.
