న్యూఢిల్లీ: కరోనా పేషెంట్ల ట్రీట్మెంట్లో కీలకం కానున్న డీఆర్డీవో ‘2డీజీ (2డీఆక్సీ డీగ్లూకోజ్)’ మందును సోమవారం ఢిల్లీలో రక్షణ శాఖ మంత్రి రాజ్నాథ్ సింగ్ రిలీజ్ చేయనున్నారు. ఢిల్లీలోని పలు దవాఖాన్లకు 10 వేల ప్యాకెట్ల(డోసుల)ను ఆయన పంపిణీ చేయనున్నారు. డిఫెన్స్ రీసెర్చ్ అండ్ డెవలప్మెంట్ ఆర్గనైజేషన్ (డీఆర్డీవో) అభివృద్ధి చేసిన ఈ మందును హైదరాబాద్కు చెందిన రెడ్డీస్ ల్యాబొరేటరీస్ ఉత్పత్తి చేస్తోంది. ఈ మందు ఎమర్జెన్సీ వాడకానికి డీసీజీఐ ఇదివరకే అనుమతి ఇచ్చింది. ఈ మందు ఫేజ్ 2, 3 క్లినికల్ ట్రయల్స్ లో మంచి ఫలితాలు వచ్చాయి. పొడి రూపంలో ఉండే ఈ మందును నీటిలో కలుపుకొని తాగవచ్చు. 2డీజీ మందుతో పేషెంట్లకు ఆక్సిజన్ అవసరం తగ్గుతుందని, హాస్పిటల్ లో ఉండాల్సిన రోజులూ తగ్గుతాయని చెప్తున్నారు. ఇది అన్ని వయసుల వారికి పని చేస్తుందని, డ్రగ్ తీసుకున్న పేషెంట్లలో రెండు మూడు రోజుల్లోనే తేడా కనిపించిందని సైంటిస్టులు చెప్తున్నారు.
