‘రియల్’ దెబ్బకు మారిన దేవాదుల కాల్వల రూట్

సిద్దిపేట/చేర్యాల, వెలుగు :  జె.చొక్కారావు దేవాదుల ఎత్తిపోతల పథకం కింద చేర్యాల ప్రాంతంలో చేపడుతున్న కాల్వల అలైన్​మెంట్​ను రియల్ ​ఎస్టేట్ వ్యాపారుల కోసం మార్చేశారన్న ఆరోపణలు వినిపిస్తున్నాయి. రియల్ వ్యాపారులకు..అధికార పార్టీ  నేతల అండదండలు ఉండడంతో 15 ఏండ్ల క్రితం ఖరారైన దేవాదుల 8 ఆర్ కాల్వకు సంబంధించిన అలైన్​మెంట్​పనులు అర్ధంతరంగా నిలిచిపోయాయి. ఈ కాల్వను 200 మీటర్ల దూరం తవ్వగా , 4 ఆర్ కాల్వకు అలైన్​మెంట్​ఖరారు చేసి పనులు మాత్రం మొదలుపెట్టలేదు. ఏమైందో ఏమోగాని కారణం  చెప్పకుండానే రెండింటికి సంబంధించిన పాత అలైన్​మెంట్ ను మార్చి కొత్త అలైన్​మెంట్​ను ముందుకు తీసుకువచ్చారు. దీంతో రైతులు ఆందోళన చెందు తున్నారు. పాత అలైన్​మెంట్ ​ప్రకారం చేర్యాల నుంచి ముస్త్యాల వరకు 11 ఎకరాల భూసేకరణతో కాల్వ పనులు పూర్తయ్యే అవకాశం ఉండగా, కొత్త అలైన్​మెంట్ తో 40 మంది రైతులకు సంబంధించిన 22 ఎకరాలు పోతున్నాయి. ఇక ఆకునూరు నుంచి రాంపూర్ కు వెళ్లే 4 ఆర్ కాల్వ అలైన్​మెంట్ కూడా ​మార్చడంతో 80 మంది రైతులు 24 ఎకరాల ను కోల్పోయే పరిస్థితి తలెత్తింది. పాత అలైన్​మెంట్​తో కేవలం 12 ఎకరాలు మాత్రమే పోయేవి.  

రియల్​వ్యాపారుల భూములు పోతున్నాయనే...

2008లో చేర్యాల టౌన్​ నుంచి ముస్త్యాల వరకు 8 ఆర్, ఆకునూరు నుంచి రాంపూర్ వరకు 4 ఆర్ దేవాదుల కాల్వలకు సంబంధించిన అలైన్​మెంట్​ఖరారు చేశారు. ఆలస్యంగా పనులు ప్రారంభమైనా 8 ఆర్ కాల్వను రెండు వందల మీటర్ల మేర తవ్వి 2018లో ఆపేశారు. ఈ అలైన్​మెంట్ల ప్రకారం కొందరు రియల్ ఎస్టేట్ వ్యాపారులు తమ భూములు కోల్పోయే పరిస్థితి ఏర్పడడంతో అధికార పార్టీ నేతలు జోక్యం చేసుకుని పనులు నిలిచేలా చేశారన్న ఆరోపణలు వినిపిస్తున్నాయి. రియల్​ఎస్టేట్ వ్యాపారులకు లాభం చేకూర్చడానికే పాత అలైన్​మెంట్ ​మార్చి కొత్త అలైన్​మెంట్ ​ప్రతిపాదనను ముందుకు తెచ్చారని తెలుస్తోంది. రైతుల అంగీకారం లేకుండా కొత్త అలైన్​మెంట్​ఖరారు చేయడమే కాకుండా సర్వే నిర్వహించి భూసేకరణకు రంగం సిద్ధం చేశారు. దీంతో కొత్త అలైన్​మెంట్​ను వ్యతిరేకిస్తూ ముస్త్యాల, ఆకునూరు, రాంపూర్ గ్రామాలకు చెందిన దాదాపు వంద మందికి పైగా రైతులు అధికారులకు వినతిపత్రాలు ఇచ్చి ఆందోళనకు సిద్ధమవుతున్నారు.  

ప్రజాభిప్రాయ సేకరణలో నిరసన

దేవాదుల 8 ఆర్, 4 ఆర్ కాల్వల నిర్మాణానికి కొత్త అలైన్​మెంట్​ప్రకారం భూసేకరణ కోసం ఇటీవల నిర్వహించిన ప్రజాభిప్రాయ సేకరణలో రైతులు నిరసన వ్యక్తం చేశారు. పాత అలైన్​మెంట్​తో కాకుండా కొత్త అలైన్​మెంట్​ప్రకారం భూములు ఎవరి  ప్రయోజనం కోసం సేకరిస్తున్నారని ప్రశ్నించారు. రియల్ ఎస్టేట్ వ్యాపారులకు లబ్ధి చేకూర్చడానికే పేద రైతుల పొట్టకొడుతున్నారని మండిపడ్డారు. కొత్త అలైన్​మెంట్​పై అభ్యంతరాలు వ్యక్తం చేస్తూ తహసీల్దార్​కు,  జనగామ ఎమ్మెల్యే ముత్తిరెడ్డి యాదగిరి రెడ్డికి వేరు వేరుగా వినతిపత్రాలు ఇచ్చి న్యాయం చేయాలని కోరారు.

కొత్త అలైన్​మెంట్​తో పంటలు మునుగుతయ్​ 

దేవాదుల 8 ఆర్, 4 ఆర్ కాల్వల కొత్త అలైన్​మెంట్​ప్రకారం పనులు నిర్వహిస్తే కొత్త సమస్యలు వచ్చే అవకాశం ఉందని రైతులంటున్నారు. కొత్త అలైన్​మెంట్​ప్రతిపాదించిన ప్రాంతం లోతట్టులో ఉంటుందని, ఇక్కడ కాల్వ నిర్మిస్తే భవిష్యత్తులో కాల్వకు రెండు వైపులా నీరు నిలిచిపోతుందని చెబుతున్నారు. దీనివల్ల వందలాది రైతుల పంటలు మునిగిపోతాయంటున్నారు.  

రైతులకు  అన్యాయం చెయ్యెద్దు

కొత్త అలైన్​మెంట్​తో అనేక మంది పేద రైతులు నష్టపోతారు. 15 ఏండ్ల కింద ఖరారైన అలైన్​మెంట్​ను కేవలం రియల్ ఎస్టేట్ వ్యాపారుల ప్రయోజనం కోసం మార్చడం కరెక్ట్​ కాదు. ఈ విషయంలో అధికారులు జోక్యం చేసుకొని పాత అలైన్​మెంట్ ​ప్రకారమే దేవాదుల 8 ఆర్ కాల్వ నిర్మించాలి.   

– దాసరి అనిల్ కుమార్,  రైతు చేర్యాల

కాల్వ పనులు ఆగిపోయిన సంగతి తెలియదు 

చేర్యాల నుంచి ముస్త్యాల వరకు 8 ఆర్ , ఆకునూరు నుంచి రాంపూర్ వరకు 4 ఆర్ కాల్వల నిర్మాణం కోసం భూసేకరణ పై వచ్చిన అభ్యంతరాలను పరిశీలిస్తున్నాం. గతంలో కొత్త అలైన్​మెంట్ ​సర్వే నిర్వహించి దాదాపు 47  ఎకరాల భూ సేకరణ కోసం గ్రామసభ నిర్వహించాం. అప్పుడు రైతులు తమ అభ్యంతరాలను తెలిపారు. వీటిని ఉన్నతాధికారుల దృష్టికి తీసుకువెళ్లాం. వారి ఆదేశాల ప్రకారం చర్యలు తీసుకుంటాం. గతంలో రెండు కాల్వలకు అలైన్​మెంట్​లు ఖరారై కొంత మేర  కాల్వ పనులు కూడా జరిగి నిలిచిపోయాయంటున్నారు. ఆ విషయం నాకు తెలియదు.  

– షేక్ ఆరిఫా, తహసీల్దార్, చేర్యాల

ఈ ఫోటోలో ఉన్న రైతు పేరు కొంతం మల్లేశం. చేర్యాల నుంచి ముస్త్యాల వెళ్లే దారిలో 9 ఎకరాల వ్యవసాయ భూమి ఉంది. దేవాదుల 8 ఆర్ కాల్వ కొత్త అలైన్​మెంట్​ప్రకారం మల్లేశం మూడెకరాల భూమిని కోల్పోతున్నాడు. అంతేగాక మిగిలిన భూమి మధ్య నుంచే కాల్వ వెళ్తుండడంతో రెండు భాగాలుగా విడిపోతోంది. ఈ ప్రాంతంలో బహిరంగ మార్కెట్​లో ఎకరా భూమి రూ.60 లక్షలు పలుకుతుండటంతో మిగులు భూమి ముక్కలుగా మారి  ఎందుకూ పనికిరాకుండా పోతదని రైతు మల్లేశం ఆవేదన చెందుతున్నాడు. దేవాదుల 8 ఆర్ కాల్వ అలైన్​మెంట్​ మారడంతో ఈ ప్రాంతంలోని మరో 30 మంది పేద రైతులు సుమారు 20 ఎకరాల వరకు భూములను కోల్పోతున్నారు.  రైతుల భూముల నుంచి  న్యూ అలైన్​మెంట్​ 23  ఎకరాలతో పోయే దాన్ని  46 ఎకరాలకు పెంచారు.