రణ్‌వీర్ సింగ్ 'ధురంధర్' మ్యూజిక్‌కు గ్రామీ షాక్.. 9 విభాగాల్లో పంపినా దక్కని చోటు!

రణ్‌వీర్ సింగ్ 'ధురంధర్' మ్యూజిక్‌కు గ్రామీ షాక్.. 9 విభాగాల్లో పంపినా దక్కని చోటు!

రణ్‌వీర్ సింగ్ హీరోగా, ఆదిత్య ధర్ దర్శకత్వంలో తెరకెక్కిన 'ధురంధర్' ఫ్రాంచైజీ బాక్సాఫీస్ వద్ద సంచలనం సృష్టించింది. ముఖ్యంగా రెండో భాగం 'ధురంధర్: ది రివెంజ్' పాటలు, నేపథ్య సంగీతం ప్రేక్షకులను విపరీతంగా ఆకట్టుకున్నాయి. థియేటర్లలో ఆడియన్స్‌తో విజిల్స్ వేయించి, చార్ట్‌బస్టర్లుగా నిలిచిన ఈ సినిమా పాటలు ప్రతిష్టాత్మక 'గ్రామీ' (Grammy) అవార్డుల రేసులో నిలుస్తాయని అభిమానులు ఎంతో ఆశగా ఎదురుచూశారు. కానీ, ఆ ఆశలన్నీ ఒక్కసారిగా ఆవిరయ్యాయి.

అక్టోబర్ నెలలో టీ-సిరీస్, బి62 స్టూడియోస్  సంయుక్తంగా 'ధురంధర్: ది రివెంజ్' ఆల్బమ్‌ను ఏకంగా 9 విభాగాల్లో గ్రామీ నామినేషన్ల కోసం పంపించాయి. ఇందులో 'ఫిర్ సే' (Phir Se) పాటను 'బెస్ట్ సాంగ్ రిటన్ ఫర్ విజువల్ మీడియా' విభాగానికి, ఊపు తెప్పించే 'ఆరి ఆరి' (Aari Aari) పాటను కొత్తగా ప్రవేశపెట్టిన 'బెస్ట్ ఏషియన్ పాప్ మ్యూజిక్ పెర్ఫార్మెన్స్' విభాగానికి, అలాగే 'కన్హయ్య' (Kanhaiyya), 'జాన్ సే గుజర్తే హై' (Jaan Se Guzarte Hain) పాటలను 'బెస్ట్ గ్లోబల్ మ్యూజిక్ పెర్ఫార్మెన్స్' విభాగానికి నామినేట్ చేశారు.

అయితే భారీ అంచనాల మధ్య నవంబర్ 16, 2026న ప్రకటించిన 69వ గ్రామీ నామినేషన్ల తుది జాబితాలో 'ధురంధర్'కు కనీసం ఒక్క చోటు కూడా దక్కలేదు. 9 విభాగాల్లో పోటీ పడినా, నిరాశే మిగలడంతో ఫ్యాన్స్ సోషల్ మీడియా వేదికగా తమ అసహనాన్ని వ్యక్తం చేస్తున్నారు. 

మరోవైపు, ఈ ఏడాది కొత్తగా తీసుకొచ్చిన ఐదు విభాగాల్లో ఒకటైన 'బెస్ట్ ఏషియన్ పాప్ మ్యూజిక్ పెర్ఫార్మెన్స్'పై అంతర్జాతీయ స్థాయిలో తీవ్ర విమర్శలు వెల్లువెత్తుతున్నాయి. ఏషియన్ కళాకారులను ప్రధాన విభాగాల నుండి పక్కన పెట్టేందుకే ఈ కేటగిరీని తెచ్చారనే నిరసనతో, ప్రపంచ ప్రఖ్యాత కే-పాప్ బ్యాండ్ బీటీఎస్ (BTS) ఈ ఏడాది అసలు గ్రామీ ఎంట్రీలనే బహిష్కరించడం సంచలనంగా మారింది.

ALSO READ : Varanasi Business: రాజమౌళి ‘వారణాసి’ బిజినెస్‌లో ఆల్‌టైమ్ రికార్డ్.. ఏపీ, తెలంగాణ రైట్స్ సొంతం చేసుకున్న మైత్రీ!

ఇక ఈసారి గ్రామీ నామినేషన్లలో బ్రిటిష్ సింగర్ రే (RAYE) 11 నామినేషన్లతో అగ్రస్థానంలో నిలవగా, రోసాలియా (Rosalia) 9, ఎల్లా లాంగ్లీ (Ella Langley) 7 నామినేషన్లతో తర్వాతి స్థానాల్లో నిలిచారు. లాస్ ఏంజిల్స్‌లోని క్రిప్టో.కామ్ ఎరీనా వేదికగా ఫిబ్రవరి 7, 2027న ఈ గ్రామీ వేడుకలు అట్టహాసంగా జరగనున్నాయి. చరిత్రలో మొదటిసారిగా ఈ వేడుకను ఏబీసీ, డిస్నీ+,  హులు (Hulu) ప్లాట్‌ఫామ్‌లలో ఏకకాలంలో ప్రత్యక్ష ప్రసారం చేయనున్నారు. బాక్సాఫీస్ వద్ద రికార్డులు కొల్లగొట్టినా.. అంతర్జాతీయ వేదికపై 'ధురంధర్' మ్యూజిక్‌కు దక్కిన ఈ నిరాశ ఇండస్ట్రీలో హాట్ టాపిక్‌గా మారింది...