ఇది డైనోసార్ తొడ ఎముక (ఫీమర్). ఫ్రాన్స్లో ఆర్కియాలజిస్టులు తవ్వకాలు జరుపుతుండగా ఈ ఎముక బయటపడింది. రెండు మీటర్ల పొడవున్న ఈ ఫీమర్ను యాంజియాక్ చారెంటీ సైట్ వద్ద వెలికి తీశారు. సారోపోడ్ జాతికి చెందిన డైనోసార్ ఎముకగా భావిస్తున్నారు. పూర్తి శాకాహారట ఇది. అంటే మాంసం ముట్టదట. కేవలం చెట్లు, చేమలు, ఆకులు, అలములు తిని బతికేదని అనుకుంటున్నారు. 14 కోట్ల ఏళ్ల వయసుంటుందని అంచనా వేస్తున్నారు. ఆ డైనోసార్ బరువు 40 నుంచి 50 టన్నులు వరకు ఉంటుందని చెబుతున్నారు. చెక్కుచెదరకుండా ఎముక ఎముకలాగే ఉండడం చూసి సైంటిస్టులు ఔరా అంటున్నారు. ఇది నిజంగానే ఆశ్చర్యపోవాల్సిన విషయమేనంటున్నారు. ఈ సైట్ వద్దే 2010 నుంచి దాదాపు 40 జాతులకు చెందిన 7,500 దాకా శిలాజాలను గుర్తించినట్టు చెబుతున్నారు.
