ప్రతి ఏడాది అక్టోబర్ 31న ప్రపంచవ్యాప్తంగా హాలోవీన్ వేడుకలు జరుగుతాయి. ఈ పండుగ సందర్భంగా ప్రజలు దెయ్యాలు, అస్థిపంజరాలు, భయానక వేషాలు వేసుకుంటారు. ఇళ్లను గుమ్మడికాయలు, సాలీడు వలలు, అస్థిపంజరాలతో అలంకరిస్తారు. పిల్లలు ఇంటింటికీ వెళ్లి చాక్లెట్లు, మిఠాయిలు అడుగుతారు. పెద్దలు హాలోవీన్ పార్టీల్లో సందడి చేస్తారు. పాశ్చాత్య దేశాల్లో ఎంతో ప్రసిద్ధి చెందిన ఈ పండుగ ఇప్పుడు భారతదేశంలోనూ ఆదరణ పొందుతోంది. హైదరాబాద్, ముంబై, బెంగళూరు వంటి నగరాల్లో కూడా హాలోవీన్ వేడుకలు నిర్వహిస్తున్నారు.
అయితే, అసలు హాలోవీన్‌ను ఎందుకు జరుపుకుంటారు ? అక్టోబర్ 31 రాత్రి దెయ్యాలు భూమిపైకి వస్తాయని ప్రజలు ఎందుకు నమ్మేవారు ? గుమ్మడికాయలపై భయానక ముఖాలను ఎందుకు చెక్కుతారు? ఈ సంప్రదాయాల వెనుక దాదాపు 2,000 ఏళ్ల నాటి ఆసక్తికరమైన చరిత్ర ఉంది. అదేంటో తెలుసుకుందాం....
సామ్హైన్ పండుగతో హాలోవీన్ ప్రారంభం
హాలోవీన్ పండుగ మూలాలు ప్రాచీన సెల్టిక్ నాగరికతలో ఉన్నాయని చరిత్రకారులు భావిస్తున్నారు. ఐర్లాండ్, యునైటెడ్ కింగ్‌డమ్, ఉత్తర ఫ్రాన్స్ ప్రాంతాల్లో నివసించిన సెల్టిక్ ప్రజలు ఈ పండుగను జరుపుకునేవారు. వీరు నవంబర్ 1వ తేదీని కొత్త సంవత్సరంగా భావించేవారు. ఈ రోజు వేసవి కాలం ముగిసి, చలికాలం ప్రారంభమవుతుందని నమ్మేవారు. చలికాలాన్ని చీకటి, మరణంతో ముడిపెట్టేవారు.
అక్టోబర్ 31 రాత్రి జీవించి ఉన్నవారికి, మరణించినవారికి మధ్య ఉన్న అడ్డుగోడ తొలగిపోతుందని సెల్టిక్ ప్రజలు విశ్వసించేవారు. ఆ రాత్రి చనిపోయినవారి ఆత్మలు, దుష్టశక్తులు భూమిపైకి తిరిగి వస్తాయని నమ్మేవారు. ఈ పండుగను 'సామ్హైన్' (Samhain) అని పిలిచేవారు. కాలక్రమేణా ఈ సంప్రదాయాలు హాలోవీన్ వేడుకల్లో భాగమయ్యాయి.
భయానక దుస్తులు ఎందుకు వేసుకుంటారు?
హాలోవీన్ రోజున ప్రజలు దెయ్యాలు, అస్థిపంజరాలు, భయానక వేషాలు వేసుకోవడం వెనుక కూడా ఒక నమ్మకం ఉంది. సెల్టిక్ ప్రజల విశ్వాసం ప్రకారం.. అక్టోబర్ 31 రాత్రి భూమిపైకి వచ్చే ఆత్మలు పంటలను నాశనం చేసి, ప్రజలకు హాని కలిగిస్తాయని భావించేవారు. వాటి నుంచి తప్పించుకోవడానికి ప్రజలు జంతువుల చర్మాలు, భయానక ముసుగులు ధరించేవారు. దీంతో ఆత్మలు వారిని కూడా దుష్టశక్తులుగా భావించి, హాని చేయకుండా వదిలేస్తాయని నమ్మేవారు.
అంతేకాదు.. ఈ రాత్రి ప్రజలంతా ఒకచోట చేరి పెద్ద మంటలు వెలిగించేవారు. ఆ మంటల్లో పంటలను, జంతువులను బలి ఇచ్చేవారు. ఇలా చేయడం వల్ల దేవతలు ప్రసన్నమై, చలికాలంలో తమను కాపాడుతారని విశ్వసించేవారు.
హాలోవీన్ అనే పేరు ఎలా వచ్చింది?
హాలోవీన్ పండుగకు క్రైస్తవ మతం ప్రభావం కూడా ఉంది. సుమారు 8వ శతాబ్దంలో క్రైస్తవ మతం వ్యాప్తి చెందుతున్న సమయంలో, కాథలిక్ చర్చి నవంబర్ 1వ తేదీని 'ఆల్ సెయింట్స్ డే'గా జరుపుకోవడం ప్రారంభించింది. ఈ రోజున క్రైస్తవ మతంలోని పుణ్యాత్ములను, సాధువులను గౌరవిస్తారు. దీనిని 'ఆల్ హాలోస్ డే' అని కూడా పిలిచేవారు. ఈ పండుగకు ముందు రోజు సాయంత్రం, అంటే అక్టోబర్ 31ను 'ఆల్ హాలోస్ ఈవ్' అని పిలిచేవారు.
►ALSO READ | బరువు తగ్గాలనుకుంటున్నారా ? ఈ 4 అలవాట్లు మార్చుకుంటే చాలు.. అసలు సీక్రెట్ ఇదే!
కాలక్రమేణా ఈ పేరు మారుతూ 'హాలోవీన్'గా రూపాంతరం చెందింది. ఇలా ప్రాచీన సెల్టిక్ సంప్రదాయాలు, క్రైస్తవ మత ఆచారాలు కలిసిపోయి నేటి హాలోవీన్ పండుగగా రూపుదిద్దుకున్నాయి.
గుమ్మడికాయలపై భయానక ముఖాలు ఎందుకు చెక్కుతారు?
హాలోవీన్ వేడుకల్లో గుమ్మడికాయలకు ప్రత్యేక స్థానం ఉంది. గుమ్మడికాయలపై భయానక ముఖాలను చెక్కి, వాటి లోపల కొవ్వొత్తులు వెలిగించడం ఈ పండుగలో అత్యంత ప్రసిద్ధమైన సంప్రదాయం. వీటిని 'జాక్-ఓ'-లాంతర్న్స్' (Jack-o'-lanterns) అని పిలుస్తారు. ఈ సంప్రదాయం వెనుక ఒక ఐరిష్ జానపద కథ ఉంది. ఐర్లాండ్‌లోని ప్రజలు దుష్టశక్తులను తరిమికొట్టేందుకు టర్నిప్‌లు, బంగాళాదుంపలపై భయానక ముఖాలను చెక్కి, వాటి లోపల కొవ్వొత్తులు వెలిగించేవారు.
19వ శతాబ్దంలో ఐరిష్ ప్రజలు అమెరికాకు వలస వెళ్లినప్పుడు, అక్కడ గుమ్మడికాయలు విడిగా లభించేవి. టర్నిప్‌లతో పోలిస్తే గుమ్మడికాయలు పెద్దవిగా ఉండటంతో వాటిపై ముఖాలను చెక్కడం సులభమైంది.
దీంతో గుమ్మడికాయలపై భయానక ముఖాలను చెక్కి, వాటి లోపల కొవ్వొత్తులు వెలిగించే సంప్రదాయం మొదలైంది. కాలక్రమేణా ఇది హాలోవీన్ వేడుకల్లో ముఖ్యమైన భాగంగా మారింది.
ఇంటింటికీ వెళ్లి మిఠాయిలు అడగడం ఎందుకు?
హాలోవీన్ రోజున పిల్లలు భయానక దుస్తులు వేసుకుని ఇంటింటికీ వెళ్లి 'ట్రిక్ ఆర్ ట్రీట్' (Trick or Treat) అంటూ మిఠాయిలు అడుగుతారు. ఈ సంప్రదాయం కూడా పాతకాలపు ఆచారాల నుంచి వచ్చింది. గతంలో పేద ప్రజలు, పిల్లలు ఇంటింటికీ వెళ్లి ఆహారం అడిగేవారు. ఆహారం ఇచ్చిన వారికి ప్రార్థనలు చేసేవారు. కాలక్రమేణా ఈ ఆచారం మారుతూ పిల్లలు మిఠాయిలు అడిగే సంప్రదాయంగా మారింది. ఇప్పుడు హాలోవీన్ సందర్భంగా పిల్లలు చాక్లెట్లు, మిఠాయిలు సేకరించడం, పెద్దలు పార్టీల్లో పాల్గొనడం సాధారణంగా మారింది.
హాలోవీన్ వేడుకలు ఇప్పుడు ప్రపంచవ్యాప్తంగా!
ప్రాచీన సెల్టిక్ ప్రజల నమ్మకాలతో ప్రారంభమైన హాలోవీన్ పండుగ.. ఇప్పుడు ప్రపంచవ్యాప్తంగా ప్రసిద్ధి చెందింది. అమెరికా, కెనడా, ఐర్లాండ్, బ్రిటన్ వంటి దేశాల్లో ఈ వేడుకలను ఎంతో ఘనంగా నిర్వహిస్తారు.
భారతదేశంలోనూ యువత ఈ పండుగపై ఆసక్తి చూపిస్తోంది. ముఖ్యంగా హైదరాబాద్, బెంగళూరు, ముంబై, ఢిల్లీ వంటి నగరాల్లో హాలోవీన్ పార్టీలకు మంచి ఆదరణ లభిస్తోంది.
దెయ్యాల వేషాలు, గుమ్మడికాయల అలంకరణలు, మిఠాయిలు, ప్రత్యేక పార్టీలు.. ఇలా ఎన్నో సంప్రదాయాలతో హాలోవీన్ వేడుకలు కొనసాగుతున్నాయి. అయితే, ఈ పండుగ వెనుక ఉన్న 2,000 ఏళ్ల నాటి చరిత్ర, నమ్మకాలు మాత్రం ఇప్పటికీ ఎంతో ఆసక్తికరంగా ఉన్నాయి.
