- డీఆర్డీవో చైర్మన్ డాక్టర్ సమీర్ వి.కామత్‌ పిలుపు
- ఘనంగా వరంగల్‌ నిట్ 23వ కాన్వొకేషన్‌
హనుమకొండ, వెలుగు : ఎన్ఐటీ స్టూడెంట్లు దేశ నిర్మాణంలో భాగస్వాములు కావాలని డీఆర్డీవో చైర్మన్ సమీర్ వి.కామత్‌ సూచించారు. డీఆర్డీవోలో సేవలు అందిస్తున్న డైరెక్టర్ జనరల్స్‌‌‌‌‌‌‌‌లో ఇద్దరు వరంగల్‌ ఎన్ఐటీ పూర్వ విద్యార్థులు ఉన్నారని, ప్రస్తుత స్టూడెంట్లుకూడా ప్లేస్‌‌‌‌‌‌‌‌మెంట్స్‌‌‌‌‌‌‌‌లో డీఆర్డీవోను ఎంపిక చేసుకోవాలని సూచించారు. ఎన్ఐటీ 23వ కాన్వొకేషన్‌‌‌‌‌‌‌‌ను శుక్రవారం స్థానిక అంబేద్కర్‌ లర్నింగ్‌ సెంటర్‌‌‌‌‌‌‌‌లో డైరెక్టర్ బిద్యాధర్ సుబుధి ఆధ్వర్యంలో నిర్వహించారు.
ఈ కార్యక్రమానికి డీఆర్డీవో చైర్మన్ సమీర్ వి.కామత్‌‌‌‌‌‌‌‌తో పాటు మైక్రాన్‌ ఇండియా వ్యవస్థాపక ఎండీ ఆనంద్‌ రామమూర్తి హాజరయ్యారు. ఈ సందర్భంగా డీఆర్డీవో చైర్మన్ మాట్లాడుతూ... ఆపరేషన్‌ సిందూర్‌ కోసం డీఆర్డీవో ఎంతగానో సహాయపడిందన్నారు. మైక్రాన్‌ ఇండియా వ్యవస్థాపక ఎండీ ఆనంద్‌ రామమూర్తి మాట్లాడుతూ విద్యార్థులు అనిశ్చితిలోనే ముందుకు సాగడం నేర్చుకోవాలని సూచించారు. దయ, వినయం, న్యాయం వంటి విలువలే నిజమైన మేధస్సు, వాటితోనే ముందుకు సాగాలన్నారు.
నిట్ డైరెక్టర్ బిద్యాధర్ సుబుధి మాట్లాడుతూ ఈ ఏడాది రికార్డు స్థాయిలో ప్లేస్‌‌‌‌‌‌‌‌మెంట్లు సాధించినట్లు చెప్పారు. అనంతరం 1,913 మంది స్టూడెంట్లకు పట్టాలు, వివిధ డిపార్ట్‌‌‌‌‌‌‌‌మెంట్లకు చెందిన 16 మందికి గోల్డ్‌‌‌‌‌‌‌‌మెడల్స్‌ అందజేశారు. కాగా, వరంగల్‌ నిట్ ఆధ్వర్యంలో మొదటిసారిగా గౌరవ డిగ్రీలు అందజేశారు. దేశీయ రక్షణ సాంకేతికత అభివృద్ధికి కృషి చేస్తున్నందుకు డీఆర్డీవో చైర్మన్ సమీర్ వి.కామత్‌‌‌‌‌‌‌‌కు డాక్టర్ ఆఫ్ సైన్స్‌, భారత సుస్థిర ఇంధన రంగానికి చేసిన సేవలకు గుర్తింపుగా హిటాచీ ఎనర్జీ ఎండీ, సీఈవో ఎన్.వేణుకు డాక్టర్ ఆఫ్ ఫిలాసఫీ డిగ్రీలు అందజేశారు. కార్యక్రమంలో ఎన్ఐటీ పాలకమండలి సభ్యులు, సెనెట్‌ మెంబర్స్‌ పాల్గొన్నారు.
