అచ్చంపేట, వెలుగు : నామినేషన్ల సందర్భంగా నాగర్ కర్నూల్ జిల్లా అచ్చంపేటలో కాంగ్రెస్, బీఆర్ఎస్ పార్టీల మధ్య ఉద్రిక్తత నెలకొంది. బీఆర్ఎస్ అభ్యర్థి గువ్వల బాలరాజ్, కాంగ్రెస్ అభ్యర్థి డాక్టర్ వంశీకృష్ణ నామినేషన్ వేసేందుకు బుధవారం అచ్చంపేట ఆర్డీవో ఆఫీసుకు వచ్చారు. ఈ సందర్భంగా బయట ఉన్న ఇరు పార్టీల కార్యకర్తలు ఒకరిని ఒకరు కేకలు వేసుకుంటూ, ఒకరిపై ఒకరు దూసుకువెళ్లేందుకు ప్రయత్నించారు.
పోటా పోటీగా నినాదాలు చేసుకోవడంతో స్వల్ప ఉద్రిక్తత చోటు చేసుకుంది. బీఆర్ఎస్అభ్యర్థి బాలరాజు వెంట నలుగురు వ్యక్తులతో పాటు గన్ మెన్లు కూడా లోపలికి వెళ్తుండగా కాంగ్రెస్లీడర్లు అభ్యంతరం తెలిపారు. ఈ విషయమై వారు ఎస్ఐ గోవర్ధన్తో వాగ్వాదానికి దిగారు. దీంతో డీఎస్పీ కృష్ణకిషోర్, సీఐ అనుదీప్ వచ్చి కాంగ్రెస్ నేతలకు సర్దిచెప్పారు. గన్మెన్లను బయటకు పంపించడంతో వారు శాంతించారు.
