గద్వాల, వెలుగు: చిన్నోనిపల్లి రిజర్వాయర్ లో వర్షపు నీరు నిల్వ ఉండకుండా యుద్ధ ప్రాతిపదికన చర్యలు తీసుకుంటామని ఆర్డీవో రాంచందర్, ఇరిగేషన్ ఈఈ రహిమోద్దీన్ తెలిపారు. బుధవారం గట్టు మండలం చిన్నోనిపల్లి రిజర్వాయర్, ఆర్అండ్ఆర్ సెంటర్ ను పరిశీలించారు. ఈ సందర్భంగా నిర్వాసితుల సమస్యలను అడిగి తెలుసుకున్నారు.
పరిహారం తక్కువగా వచ్చిందని, పనులు పెండింగ్లో ఉండడంతో ఇబ్బంది పడుతున్నామని నిర్వాసితులు ఆవేదన వ్యక్తం చేశారు. మల్లన్నసాగర్ నిర్వాసితులకు ఇచ్చిన పరిహారాన్నే తమకు ఇవ్వాలని కోరారు. స్పందించిన ఆఫీసర్లు రిజర్వాయర్లో నీరు నిల్వ ఉండకుండా వెంటనే కాలువ తవ్విస్తామని, నిర్వాసితుల సమస్యను ప్రభుత్వం దృష్టికి తీసుకెళ్తామని హామీ ఇచ్చారు.
