హనుమకొండ, వెలుగు : ఆదివారం రాత్రి కురిసిన ఈదురుగాలుల వర్షాలకు టీఎస్ఎన్పీడీసీఎల్ పరిధి హనుమకొండ సర్కిల్ లో 33కేవీ, 11 కేవీ ఫీడర్ పరిధిలోని 9 స్తంభాలు, 8 ట్రాన్స్ ఫార్మర్లు నేల కొరగగా, 11 ఇన్సులేటర్లు దెబ్బతిన్నాయి. దీంతో కరెంట్ సరఫరాకు అంతరాయం కలిగింది. ఈ సమస్యపై టీఎస్ఎన్పీడీసీఎల్ ఆఫీసర్లు అలర్ట్ అయ్యారు. ఈ మేరకు సీఎండీ వరుణ్ రెడ్డి రాయపర్తి , వర్ధన్నపేట సహా పలు సబ్ స్టేషన్లను విజిట్ చేశారు.
అనంతరం విద్యుత్తు భవన్ నుంచి టీఎస్ఎన్పీడీసీఎల్ పరిధిలోని ఎస్ఈలు, డీఈలతో మాట్లాడి ఎన్నికలకు ఇబ్బందులు కలగకుండా చర్యలు చేపట్టాల్సిందిగా ఆదేశించారు. ఈ మేరకు ఎస్ఈ కే.వెంకటరమరణ యుద్ధప్రాతిపదికన చర్యలు చేపట్టారు. సబ్ స్టేషన్ల లోడ్, విద్యుత్ సరఫరా మానిటరింగ్ స్థితిగతులను తెలుసుకొని సిబ్బందికి దిశానిర్దేశం చేశారు.
ఎన్నికలకు ఇబ్బందులు తలెత్తకుండా చర్యలు చేపట్టినట్లు ఆయన తెలిపారు. అందుబాటులో ఉండి సేవలందించిన సిబ్బందిని అభినందించారు. విద్యుత్సమస్యలు, ఫిర్యాదులకు టోల్ ఫ్రీ నెంబరు 1800 425 0028 కు లేదా 1912 కు తెలియజేయాలని సూచించారు.
