- యాదగిరిగుట్టలో 28.1 శాతమే!
- ఆశ్చర్యపరచిన పోలింగ్ శాతం
యాదాద్రి, వెలుగు: యాదాద్రి జిల్లాలోని మాజీ సీఎం కేసీఆర్ దత్తత గ్రామం వాసాలమర్రిలో బీఆర్ఎస్కు సగం మంది కూడా ఓట్లేయలేదు. ఊరును దత్తత తీసుకొని మూడేండ్లు గడిచినా ఎలాంటి అభివృద్ధి చేయకపోవడంతో తమ ఆగ్రహాన్ని ఓట్ల రూపంలో వ్యక్తం చేసినట్లు భావిస్తున్నారు. ఇక రూ. 1200 కోట్లతో యాదగిరిగుట్ట టెంపుల్ను పునర్నిర్మించిన్పటికీ యాదగిరిగుట్టలో బీఆర్ఎస్కు పడిన ఓట్లు కేవలం 28.1 శాతం మాత్రమే! రోడ్ల పేరిట ఇండ్లు కూల్చి, స్థానికులను ఇబ్బందుల పాల్జేయడం, గుట్టపైకి బస్సులు పెట్టి ఆటో డ్రైవర్ల పొట్టకొట్టడం లాంటి అంశాలు ఇందుకు కారణమని భావిస్తున్నారు. మొత్తం మీద ఈ జిల్లాలోని ఆలేరు, భువనగిరి నియోజకవర్గాల్లో బీఆర్ఎస్ సిట్టింగులు గొంగిడి సునీత, ఫైళ్ల శేఖర్రెడ్డి ఇద్దరూ ఓడిపోగా, రెండుచోట్లా కాంగ్రెస్ అభ్యర్థులు గెలుపొందారు.
బీఆర్ఎస్ను ఆదరించని వాసాలమర్రి
ఆలేరు నియోజకవర్గం తుర్కపల్లి మండలంలోని వాసాలమర్రిని మాజీ ముఖ్యమంత్రి కేసీఆర్ మూడేండ్ల కింద దత్తత తీసుకున్నారు. ఊరంతా పునర్నిర్మిస్తామని, పాత ఇండ్లు, ఆఫీసులు, బడి, గుడి స్థానంలో కొత్తవి కట్టిస్తామని, యువతకు ఉపాధి చూపుతామని హామీ ఇచ్చారు. దళిత
కుటుంబాలన్నింటికీ దళితబంధు కూడాప్రకటించారు. ఈ లెక్కన ఏ ఎన్నిక జరిగినా ఆ గ్రామంలో బీఆర్ఎస్కు వంద శాతం ఓట్లు రావాల్సిందే. కానీ, తాజాగా జరిగిన అసెంబ్లీ ఎన్నికల్లో 41.73 శాతం గ్రామస్తులే బీఆర్ఎస్కు ఓటేశారు. వాసాలమర్రిని కేసీఆర్ దత్తత తీసుకోగానే అధికారుల హడావిడి చూసి ఏడాది తిరిగే సరికి ఊరు దశ మారుతుందని అంతా ఆశించారు. కానీ, కేసీఆర్ ఫాంహౌస్కు వెళ్లే రోడ్డు తప్ప ఊరిలో ఇసుమంత మార్పు కూడా రాలేదు. ఈ మధ్యనే హెల్త్ సెంటర్, అంగన్వాడీ సెంటర్లు, హైస్కూల్ బిల్డింగ్ల పని మొదలు పెట్టారు. ఏ ఒక్కరికీ ఇల్లు కట్టివ్వలేదు. ఇతరత్రా డెవలప్మెంట్ ఏమీ జరగలేదు. దీంతో ఈ నెల 30న జరిగిన ఎన్నికల్లో బీఆర్ఎస్పై వ్యతిరేకత వెలిబుచ్చారు. గ్రామంలో1376 ఓట్లకుగాను 1258 పోలయ్యాయి. వీటిలో బీఆర్ఎస్ కు 525 మంది (41.73 శాతం) ఓటేయగా, కాంగ్రెస్ అభ్యర్థి బీర్ల అయిలయ్యకు 448 మంది (35.61 శాతం), బీజేపీ అభ్యర్థి పడాల శ్రీనివాస్కు 219 (17.40 శాతం)మంది ఓటేశారు.
యాదగిరిగుట్టలో 28.1 శాతమే
సీఎం కేసీఆర్.. రూ. 1200 కోట్లతో యాదగిరిగుట్ట టెంపుల్ను పునర్నిర్మించిన సంగతి తెలిసిందే. టెంపుల్ నిర్మాణంతో యాదాద్రి మరో తిరుమల అవుతుందని, స్థానికుల దశ తిరుగుతుందని ఎన్నో ఆశలు కల్పించినా ఉత్తదే అయ్యింది. గుట్ట టౌన్లో రోడ్ల విస్తరణ పేరుతో స్థానికులు తీవ్రంగా నష్టపోయారు. పరిహారం కోసం కొట్లాడినా పట్టించుకునే నాథుడు లేకుండా పోయాడు. గుట్టపైకి వెళ్లే ఆటోలను నిషేధించడం వల్ల అనేకమంది డ్రైవర్లు ఉపాధి కోల్పోయారు. ఈ కోపంతో గుట్ట మున్సిపాలిటీలోని ఓటర్లు బీఆర్ఎస్కు వ్యతిరేకంగా ఓట్లు వేశారు. గుట్టలో 13,465 ఓటర్లు ఉండగా, తాజాగా జరిగిన అసెంబ్లీ ఎన్నికల్లో 11,222 మంది ఓటేశారు. కేవలం 3012 (26.84 శాతం) ఓట్లు మాత్రమే బీఆర్ఎస్కు పడగా, కాంగ్రెస్ అభ్యర్థి బీర్ల అయిలయ్యకు 7394 (65.88 శాతం) ఓట్లు, బీజేపీ అభ్యర్థి పడాల శ్రీనివాస్ కు 524 (4.66 శాతం) ఓట్లు పోలయ్యాయి.
వాసాల మర్రి
లైన ఓట్లు బీఆర్ఎస్ కాంగ్రెస్ బీజేపీ
1258 525 448 219
యాదాద్రి
పోలైన ఓట్లు బీఆర్ఎస్ కాంగ్రెస్ బీజేపీ
11,222 3,012 7,394 524
