సీఎం కాళ్లు మొక్కైనా.. అభివృద్ధి చేస్తా..భైంసాలో బీజేపీ, ఎంఐఎం మత రాజకీయాలు చేస్తున్నయ్

• డీసీసీ అధ్యక్షుడు, ఎమ్మెల్యే     వెడ్మ బొజ్జు కామెంట్స్​

భైంసా, వెలుగు : భైంసా మున్సిపాలిటీలో కాంగ్రెస్​ను గెలిపిస్తే, సీఎం కాళ్లు మొక్కైనా అభివృద్ధి చేయించే బాధ్యత తీసుకుంటానని ఖానాపూర్​ఎమ్మెల్యే, నిర్మల్ ​డీసీసీ అధ్యక్షుడు వెడ్మ బొజ్జు అన్నారు. దేశంలోనే భైంసాను మోడల్ మున్సిపాలిటీగా తీర్చిదిద్దుతానన్నారు. బుధవారం నిర్మల్​జిల్లా భైంసాలోని  ఫంక్షన్​హాల్​లో పార్టీ ముఖ్య కార్యకర్తలతో నిర్వహించిన మున్సిపల్​ఎన్నికల సమావేశంలో ఆయన మాట్లాడారు. 

బీజేపీ, ఎంఐఎం మత రాజకీయాలు చేస్తున్నాయని, హిందూ, ముస్లింల మధ్య కొట్లాట పెట్టేలా వ్యవహరిస్తున్నా యని  మండిపడ్డారు. కాంగ్రెస్​ అన్నివర్గాలను కలుపుకుపోయే పార్టీ అన్నారు. భైంసాలో కాంగ్రెస్​ప్రభుత్వం ఇందిరమ్మ ఇండ్లను మంజూరు చేయిస్తే ఎంఐఎం కోర్టులో కేసు వేసి మరీ అడ్డుపడిందని గుర్తు చేశారు. బీజేపీ, ఎంఐఎం గుండాయిజం చేస్తే ఊరుకునే ప్రసక్తే లేదన్నారు. మత రాజకీయాలు చేసే పార్టీలు మున్సిపల్​ఎన్నికల్లో కోట్లాటలు పెడితే తొక్కేస్తామన్నారు. తాను చూస్తే చిన్నోడిలా ఉంటానని, అణుబాంబుతో సమానమన్నారు. 

పేద, బడుగు, బలహీన వర్గాల సంక్షేమానికి పాటు పడుతున్నది కాంగ్రెస్​ సర్కారు అని పేర్కొన్నారు. భైంసాలో 26వ వార్డుల్లో కాంగ్రెస్​20 వార్డులు గెలిచి తీరుతామన్నారు.  ఈ సమావేశంలో మాజీ కేంద్ర మంత్రి వేణుగోపాలచారి, మాజీ ఎమ్మెల్యేలు నారాయణరావు పటేల్, విఠల్​రెడ్డి, మార్కెట్​ కమిటీ చైర్మన్​ఆనంద్​రావు పటేల్, పలువురు నేతలు, కార్యకర్తలు పాల్గొన్నారు.