ఇల్లెందు, వెలుగు : ఇల్లెందులోని కోర్టు వివాదంలో ఉన్న భూమిలో మాజీ నక్సలైట్ అంత్యక్రియలు నిర్వహించేందుకు కుటుంబ సభ్యులు యత్నించగా పోలీసులు అడ్డుకున్నారు. వివరాల్లోకి వెళ్తే.. టౌన్కు చెందిన కొడెం సమ్మయ్య(55) గతంలో మావోయిస్టులతో కలిసి పనిచేశాడు. 2008 తర్వాత జనజీవన స్రవంతిలో కలిశాడు. అందుకు గాను ప్రభుత్వం సమ్మయ్యకు సర్వే నంబర్603/1లో 1.20 ఎకరాల భూమి ఇచ్చింది. అయితే సదరు భూమిని మున్సిపల్ వైస్ చైర్మన్ జానీ కబ్జా చేశాడంటూ కొద్ది రోజులుగా సమ్మయ్య తహసీల్దార్, ఆర్డీఓ, జిల్లా కలెక్టర్ ఆఫీసుల చుట్టూ తిరుగుతున్నాడు.
ALSO READ:చంద్రబాబును సమర్థించే వాళ్లు ఈ 12 ప్రశ్నలకు సమాధానం చెప్పాలి: వర్మ
తనకు న్యాయం చేయడం లేదంటూ ఇల్లెందు తహసీల్దార్ఆఫీస్ముందు ఆత్మహత్యయత్నం కూడా చేశాడు. చివరికి కోర్టును ఆశ్రయించాడు. సానుకూల స్పందన లేకపోవడంతో మనస్థాపం చెందాడు. గురువారం రాత్రి కాకతీయ నగర్లోని అద్దె ఇంట్లో చనిపోయాడు. కుటుంబ సభ్యులు సమ్మయ్య మృతదేహానికి శుక్రవారం వివాదాస్పద భూమిలో అంత్యక్రియలు నిర్వహించేందుకు ప్రయత్నించగా పోలీసులు అడ్డుకున్నారు.
ఈ క్రమంలో పోలీసులకు, సమ్మయ్య కుటుంబ సభ్యుల మధ్య వాగ్వివాదం చోటుచేసుకుంది. మృతదేహాన్ని సదరు స్థలంలో విడిచిపెట్టి వెళ్తుండగా, పోలీసులు సర్దిచెప్పారు. చేసేదేంలేక కుటుంబ సభ్యులు మృతదేహానికి స్థానిక శ్మశానవాటికలో అంత్యక్రియలు నిర్వహించారు.
