హైదరాబాద్, వెలుగు: రాష్ట్రంలోని అన్ని సర్కారు జూనియర్ కాలేజీల్లో రాబోయే రోజుల్లో ఫేస్ రికగ్నిషన్ సిస్టమ్ ను పూర్తిస్థాయిలో అమలు చేయనున్నట్లు ఇంటర్విద్యాశాఖ స్పష్టం చేసింది. కాలేజీల్లోని లెక్చరర్లు, సిబ్బందితో పాటు విద్యార్థులందరికీ ఎఫ్ఆర్ఎస్ విధానం ఉంటుందని చెప్పింది. గురువారం ‘వీ6 వెలుగు’లో ‘ఇంటర్లో అటకెక్కిన ఫేషియల్ అటెండెన్స్’ హెడ్డింగ్ తో వార్త ప్రచురితమైంది. విద్యాసంవత్సరం ప్రారంభమై మూడు నెలలు అయినా.. ఇంకా కాలేజీల్లో ఫేషియల్ అటెండెన్స్ అమలు కావడం లేదని ప్రస్తావించింది.
దీనిపై ఇంటర్ఎడ్యుకేషన్ డిపార్ట్ మెంట్ స్పందించింది. గత విద్యాసంవత్సరం నుంచే జూనియర్ కాలేజీల్లో ఎఫ్ఆర్ఎస్ సిస్టమ్ కొనసాగుతోందని వెల్లడించింది. వ్యవస్థను మరింత బలోపేతం చేసేందుకు, అదనపు ఫీచర్లు జోడించేందుకు ఎండ్ టూ -ఎండ్ ఎఫ్ఆర్ఎస్ సొల్యూషన్ బాధ్యతను ‘సెంటర్ ఫర్ గుడ్ గవర్నెన్స్’ కి అప్పగించినట్లు తెలిపింది. సీజీజీ ఆధ్వర్యంలో రూపొందించిన ఎఫ్ఆర్ఎస్ టెక్నాలజీని 5 సర్కారు కాలేజీల్లో పైలట్ ప్రాజెక్ట్గా రన్ చేసి పరీక్షించామని, రిజల్ట్ బాగా వచ్చిందని తెలిపింది. ప్రస్తుతం కాలేజీల ప్రిన్సిపాల్స్, జూనియర్ లెక్చరర్లు, అడ్మినిస్ట్రేటర్లకు ట్రైనింగ్ ఇస్తామని వివరించింది..
