న్యూఢిల్లీ: ఇండియన్ ప్రీమియర్ లీగ్ (IPL) 2026 ఎడిషన్ వేలానికి ముందు సౌతాఫ్రికా స్టార్ ప్లేయర్ ఫాఫ్ డుప్లెసిస్ కీలక నిర్ణయం తీసుకున్నాడు. IPL-2026 సీజన్కు దూరంగా ఉండాలని నిర్ణయించుకున్నాడు. ఇందులో భాగంగా వచ్చే ఐపీఎల్ సీజన్ కోసం జరగనున్న ఆక్షన్లో పాల్గొనని ప్రకటించాడు. పాకిస్తాన్ సూపర్ లీగ్ (PSL)లో కొత్త సవాలును స్వీకరించడానికి ఐపీఎల్2026 వేలం నుంచి వైదొలుగుతున్నట్లు స్పష్టం చేశాడు. ఈ మేరకు సోషల్ మీడియా వేదికగా శనివారం (నవంబర్ 29) డుప్లెసిస్ ఒక పోస్ట్ పెట్టాడు.
"ఐపీఎల్‌లో 14 సీజన్ల తర్వాత రాబోయే వేలంలో నా పేరు పెట్టకూడదని నిర్ణయించుకున్నాను. ఇది ఒక పెద్ద నిర్ణయం. ఈ లీగ్ నా ప్రయాణంలో ఒక పెద్ద భాగం. ప్రపంచ స్థాయి ఆటగాళ్లు, అద్భుతమైన ఫ్రాంచైజీల తరుఫున ఆడటం నా అదృష్టం. భారతదేశానికి నా హృదయంలో ప్రత్యేక స్థానం ఉంటుంది. నా ప్రయాణంలో అండగా నిలిచిన ప్రతీ కోచ్, సహచర ఆటగాళ్లు, సపోర్ట్ స్టాఫ్, ఫ్యాన్స్కు ధన్యవాదాలు’’ అని పేర్కొన్నాడు. అయితే.. ఇది వీడ్కోలు కాదని.. ఐపీఎల్‌లో మీరు మళ్ళీ నన్ను చూస్తారని అభిమానులకు క్లారిటీ ఇచ్చాడు. పాకిస్తాన్ సూపర్ లీగ్ (PSL)లో కొత్త సవాల్ స్వీకరించడంలో భాగంగా వచ్చే ఐపీఎల్ సీజన్కు దూరంగా ఉంటున్నట్లు వివరణ ఇచ్చాడు.
ఐపీఎల్ కెరీయర్‌లో డుప్లెసిస్ చెన్నై సూపర్ కింగ్స్, పూణే, ఆర్సీబీ, ఢిల్లీ జట్ల తరుఫున ఆడాడు.154 మ్యాచుల్లో 4,773 పరుగులు చేశాడు. ఐపీఎల్‌లో మోస్ట్ పాపులర్ టీమ్ ఆర్సీబీకి కెప్టెన్గా కూడా ఈ సౌతాఫ్రికా ఆటగాడు పని చేశాడు. ఐపీఎల్ 2025 సీజన్లో ఢిల్లీ క్యాపిటల్స్ తరుఫున బరిలోకి దిగిన డుప్లెసిస్ అంచనాల మేర రాణంచలేదు. తొమ్మిది మ్యాచ్‌ల్లో 22.44 సగటుతో 202 పరుగులే చేశాడు. దీంతో డుప్లెసిస్ ను డీసీ రిటైన్ చేసుకోకుండా వేలానికి వదిలేసింది. ఈ క్రమంలో వచ్చే సీజన్ కు దూరంగా ఉండాలని డుప్లెసిస్ నిర్ణయించుకున్నాడు.
