శామీర్ పేట, వెలుగు: సిటీ శివారులోని గ్రామాల్లో పుట్టగొడుగుల్లా ఫాంహౌస్లు వెలుస్తున్నాయి. హైదరాబాద్ నుంచి 30 – 40 కిలోమీటర్ల పరిధిలో మరీ ఎక్కువయ్యాయి. గ్రామ పంచాయతీల నుంచి ఎలాంటి పర్మిషన్లు తీసుకోకుండా నిర్మిస్తున్నా అధికారులు పట్టించుకోవడం లేదు. కేవలం నోటీసులు ఇచ్చి చేతులు దులుపుకుంటున్నారు. ముఖ్యంగా సీఎం కేసీఆర్ దత్తత మండలమైన మూడు చింతలపల్లిలోని లింగాపూర్, ఉద్దేమర్రి గ్రామాల్లో ఎటుచూసినా ఈ తరహా నిర్మాణాలే కనిపిస్తున్నాయి.
ఈ గ్రామాలైతే భవిష్యత్తులో మరింత అభివృద్ధి చెందుతాయనే ఆలోచనతో గుంటలు, ఎకరాల చొప్పున భూములు కొంటున్నారు. వాటిలో ఫాంహౌస్ లు కట్టి వీకెండ్పార్టీలకు, ఫంక్షన్లకు అద్దెకు ఇస్తున్నారు. మరికొందరు ఒక్కో ఫాంహౌస్ను రూ.75లక్షలకు అమ్మేస్తున్నారు. కాగా ఫాంహౌస్లలో అసాంఘిక కార్యక్రమాలు జరుగుతున్నాయని స్థానికులు అధికారులకు ఫిర్యాదు చేస్తే నోటీసులు ఇచ్చి సరిపెడుతున్నారు. పంచాయతీ నుంచి ఎలాంటి అనుమతులు పొందకుండా నిర్మిస్తున్నా, ఇంటి నంబర్లు ఇచ్చి అక్రమాలను ప్రోత్సహిస్తున్నారు. ఈ విషమయమై డీపీఓ రమణమూర్తిని వివరణ కోరగా అక్రమ నిర్మాణాలను గుర్తించి, చర్యలు తీసుకుంటామని తెలిపారు.
