ఫోన్ల నుంచి టీవీలు, వాచీల వరకు అంతా స్మార్ట్ ట్రెండ్ నడుస్తోంది ఇప్పుడు. వర్చువల్ రియాలిటీ డివైజ్ల వాడకం పెరుగుతోంది. అందుకు తగ్గట్టే టెక్ కంపెనీలు కూడా ప్రొడక్ట్స్ తయారుచేస్తున్నాయి. స్నాప్చాట్ డ్రోన్ కెమెరా, గూగుల్ ప్లే సర్వీసెస్ ‘సెల్ఫ్ షేర్’ ఫీచర్, డయాబెటిస్ నుంచి కాపాడే అల్ట్రాహ్యూమన్ చిప్... ఇవన్నీ కొత్తగా వచ్చినవే. ఇవేకాకుండా ఈవారం మరిన్ని టెక్నాలజీ అప్డేట్స్ గురించి తెలుసుకోవాలి అనుకుంటున్నారా? అయితే.. ఇది చదివేయండి.
‘అల్ట్రాహ్యూమన్’ అనే ఫిట్నెస్ టెక్ స్టార్టప్ ఈమధ్య కొత్త చిప్ తీసుకొచ్చింది. ఈ చిప్ పేరు ‘అల్ట్రాహ్యూమన్ సైబోర్గ్’. ఇది మెటబాలిజం తీరును గమనించి, డయాబెటిస్ బారిన పడకుండా కాపాడుతుంది. అదెలాగంటే... ఇందులో బయోసెన్సర్ ఉంటుంది. ఈ చిప్ని మోచేతిపైన పెట్టుకోవాలి. ఇందులోని సెన్సర్ ఎప్పటికప్పుడు రక్తంలో చక్కెర ఎంత ఉంది? అనేది చెప్తుంది. ఇదే సమాచారాన్ని ఐఫోన్లోని అల్ట్రాహ్యూమన్ యాప్కి పంపిస్తుంది. దాంతో, తగిన జాగ్రత్తలు తీసుకుంటూ డయాబెటిస్ బారిన పడకుండా చూసుకోవచ్చు.
