కూసుమంచి, వెలుగు : ఎన్నికల్లో గెలుపోటములు సహజమని, ప్రజల తీర్పును గౌరవిస్తామని సీపీఎం రాష్ట్ర కార్యదర్శి తమ్మినేని వీరభద్రం అన్నారు. శుక్రవారం ఖమ్మం జిల్లా కూసుమంచిలోని పద్మా రెడ్డి భవనంలో జరిగిన సీపీఎం మండల స్థాయి జనరల్ బాడీ సమావేశానికి చీఫ్ గెస్ట్గా హాజరై మాట్లాడారు. సీపీఎం ఓడినా గెలిచినా ప్రజల పక్షానే ఉంటుందన్నారు. తొమ్మిదేండ్లలో బీఆర్ఎస్అప్రజాస్వామికంగా వ్యవహరించిందని, అందుకే ప్రజలు ఓడగొట్టారన్నారు.
పాలేరులో ఒక్కొక్క ఓటుకు రూ.3 నుంచి రూ.4 వేలు పంచారని, ఈ ధన ప్రవాహం ప్రజాస్వామ్యానికి హానికరమన్నారు. అక్కడక్కడ పార్టీకి ద్రోహం చేసిన వ్యక్తులను క్షమించేది లేదన్నారు. మల్లెల సన్మతరావు అధ్యక్షతన జరిగిన సమావేశంలో సీపీఎం పాలేరు డివిజన్ ఇన్చార్జి బండి రమేశ్, మండల ఇన్చార్జి బుగ్గవీటి సరళ, మండల కార్యదర్శి యడవల్లి రమణారెడ్డి, తోటకూరి రాజు, మాజీ జడ్పీటీసీ ఎర్రబోయిన భారతి పాల్గొన్నారు.
