- ఫార్వర్డ్ బ్లాక్లో చేరిన మరో సీనియర్ సీఆర్ జగదీశ్వర్ రావు
- పార్టీలు మారినవారికి టికెట్ ఇచ్చి తమను గడ్డిపోచల కిందజమకట్టారని సీఆర్ ఫైర్
- నాగర్కర్నూల్, కొల్లాపూర్లో నిలువునా చీలుతున్న కాంగ్రెస్ క్యాడర్
నాగర్ కర్నూల్, వెలుగు: నాగర్కర్నూల్ నుంచి కాంగ్రెస్ టికెట్ ఆశించి రాకపోవడంతో పార్టీపై తిరుగుబావుటా ఎగరేసిన ఆ పార్టీ సీనియర్ లీడర్, మాజీ మంత్రి నాగం జనార్దన్ రెడ్డి దారి ఎటు అనే చర్చ జరుగుతోంది. కొల్లాపూర్ టికెట్ దక్కని మరో సీనియర్ నేత సీఆర్ జగదీశ్వర్రావు శుక్రవారం ఫార్వర్డ్ బ్లాక్ పార్టీలో చేరగా, పార్టీ మార్పుపై నాగం ఆచితూచి అడుగులు వేస్తున్నారు.
కాంగ్రెస్ రాష్ట్ర వ్యవహారాల ఇన్చార్జి మాణిక్ రావుఠాక్రే, కాంగ్రెస్ చేరికల కమిటీ కన్వీనర్ జానా రెడ్డి, ఏఐసీసీ కార్యదర్శి చిన్నారెడ్డి తదితరులు ఇప్పటికే నాగంతో మాట్లాడారు. కాంగ్రెస్ అధికారంలోకి వస్తే కీలక బాధ్యతలు అప్పగిస్తామని ఆఫర్ చేసినా ఆయన వెనక్కి తగ్గడం లేదు. ఎట్టి పరిస్థితుల్లో అయినా నాగర్ కర్నూల్ నుంచి బరిలో దిగి కాంగ్రెస్ హైకమాండ్కు బుద్ధి చెప్పాలని నాగం అనుచరులు కోరుతుండడంతో ఆయన ఎలాంటి నిర్ణయం తీసుకుంటారో అనే ఆసక్తి రేపుతోంది. మరోవైపు ఇటు నాగర్కర్నూల్, అటు కొల్లాపూర్ నియోజకవర్గాల్లో కాంగ్రెస్ క్యాడర్ రెండుగా చీలిపోయింది.
షాకిచ్చిన కాంగ్రెస్ హైకమాండ్
నాగర్కర్నూల్లో నాగం జనార్దన్ రెడ్డి, కొల్లాపూర్ నియోజకవర్గం నుంచి సీఆర్ జగదీశ్వర్ రావు ఇద్దరూ టికెట్లు ఆశించారు. పార్టీ హైకమాండ్ మాత్రం బీఆర్ఎస్ నుంచి కాంగ్రెస్లో చేరిన మాజీ మంత్రి జూపల్లి కృష్ణారావుకు కొల్లాపూర్ టికెట్, ఎమ్మెల్సీ కూచుకుళ్ల దామోదర్ రెడ్డి కొడుకు రాజేశ్ రెడ్డికి నాగర్కర్నూల్ టికెట్ ఇచ్చింది. టికెట్లు ప్రకటించగానే రెండు చోట్లా అసమ్మతి భగ్గుమంది. నాగం, జగదీశ్వర్రావు తమ అనుచరులతో మీటింగ్ పెట్టి తమ తడాఖా ఏంటో హైకమాండ్కు చూపిస్తామని సవాల్ విసిరారు.
మాజీ మంత్రి జూపల్లి కృష్ణారావుకు పార్టీ టికెట్ ఇవ్వడాన్ని తీవ్రంగా వ్యతిరేకించిన కొల్లాపూర్ కాంగ్రెస్ ఇన్ చార్జి సీఆర్ జగదీశ్వర్ రావు శుక్రవారం ఆల్ ఇండియా ఫార్వర్డ్ బ్లాక్ పార్టీలో చేరారు. సింహం గుర్తుపై పోటీ చేస్తానని ఆయన ప్రకటించారు. తాను గెలిచి తీరుతానంటూ ప్రకటించిన సీఆర్.. పార్టీలో పదవులు అనుభవించి పార్టీ మారిన వారికి పిలిచి టికెట్ ఇచ్చి తమను గడ్డిపోచల కింద జమకట్టారని మండిపడ్డారు. కొల్లాపూర్లో తన తడాఖా ఏంటో చూపుతానని సవాలు చేశారు. అలాగే కల్వకుర్తి నుంచి కాంగ్రెస్ టికెట్ ఆశించిన సుంకిరెడ్డి రాఘవేందర్ రెడ్డి, ఏఐసీసీ కార్యదర్శి వంశీచంద్ రెడ్డి మధ్య విభేదాలతో చివరి నిమిషంలో కాంగ్రెస్ పార్టీలో చేరిన బీఆర్ఎస్ ఎమ్మెల్సీ కసిరెడ్డి నారాయణ రెడ్డికి టికెట్ఇచ్చారు.
కల్వకుర్తి నుంచి తాను పోటీ చేయనని మాజీ ఎమ్మెల్యే వంశీచంద్ రెడ్డి ముందుగానే ప్రకటించారు. తనను సంప్రదించకుండా పార్టీలో చేరిన రాఘవేందర్ రెడ్డికి.. బీఆర్ఎస్ ఎమ్మెల్సీ కసిరెడ్డిని పార్టీలోకి తీసుకురావడం ద్వారా వంశీచంద్ రెడ్డి చెక్ పెట్టారు. అలాగే మాజీ మంత్రి జూపల్లి కృష్ణా రెడ్డి తెరవెనక మంత్రాంగం నడిపించి కసిరెడ్డికి టికెట్ దక్కడంలో తన వంతు పాత్ర పోషించారు.
నాగం, సుంకిరెడ్డికి బీఆర్ఎస్ వల?
మాజీ మంత్రి డాక్టర్ నాగం జనార్దన్ రెడ్డిని తమ పార్టీలోకి చేర్చుకోవడానికి బీఆర్ఎస్ టాప్ లీడర్లు సంప్రదింపులు ప్రారంభించారని సమాచారం. కాంగ్రెస్ పార్టీ నుంచి అత్యంత అవమానకరంగా నాగంను వెళ్లగొట్టేందుకు కొందరు కుట్ర చేశారని ఆయన అనుచరులు ఆరోపిస్తున్నారు. పాపులారిటీ, సర్వేల పేరుతో టికెట్లను డైరెక్ట్గా బేరంపెట్టి నాగంను బయటకు పంపించే ప్రయత్నం చేశారని కాంగ్రెస్ నేతలు, కార్యకర్తలు బహిరంగంగానే ఆరోపణలు చేస్తున్నారు.
నాగంను తమ పార్టీలోకి ఆహ్వానించేందుకు బీఆర్ఎస్ వర్కింగ్ ప్రెసిడెంట్, మంత్రి కేటీఆర్ రెండు మూడు రోజుల్లో ఆయన ఇంటికి వెళ్తారని సమాచారం. అయితే, ఏం జరుగుతుందో తెలియకుండా దీనిపై తానేం మాట్లాడనని నాగం చెప్పారు. మరోవైపు ఐక్యతా ఫౌండేషన్ చైర్మన్ సుంకిరెడ్డి రాఘవేందర్ రెడ్డిని బీఆర్ఎస్లోకి చేర్చుకునేందుకు మంత్రులు హరీశ్ రావు, కేటీఆర్ టీంలు ఆయనకు పలు ఆఫర్లు ఇచ్చినట్లు ప్రచారం జరుగుతోంది. నాగర్ కర్నూల్, కల్వకుర్తి నియోజకవర్గాల్లో పరిస్థితిని చక్కదిద్దకపోతే ఈ రెండు నియోజకవర్గాల ప్రభావం పక్కనున్న జడ్చర్ల, అచ్చంపేట, వనపర్తిపై పడుతుందని కాంగ్రెస్ నేతలు టెన్షన్ పడుతున్నారు.
