- ఒకరి డెడ్ బాడీ లభ్యం
ఖమ్మం రూరల్, వెలుగు : రిమాండ్ ఖైదీని చూసేందుకు వెళ్లిన నలుగురు వ్యక్తులు సాగర్ కెనాల్లో గల్లంతవగా.. ఒకరు మృతి చెందిన ఘటన ఖమ్మం సిటీలో జరిగింది. పోలీసుల కథనం ప్రకారం.. భద్రాద్రి జిల్లా మణుగూరు టౌన్ కు చెందిన రాము అనే వ్యక్తి ఓ కేసులో ఖమ్మం జిల్లా జైలులో రిమాండ్ ఖైదీగా ఉన్నాడు. రాముకు తెలిసిన మణుగూరు చెందిన రొండ వెంకటేశ్వర్లు(33), చల్లా రమేశ్(38), ప్రసాద్(27), బండారు భరత్(30) సోమవారం మధ్యాహ్నం ఆటోలో ములాఖత్ అయ్యేందుకు జిల్లా జైలు వెళ్లారు. రామును చూసిన అనంతరం ప్రకాశ్నగర్లోని వెంకటేశ్వర్లు మామ పిట్టల శ్రీనివాస్ ఇంటికి వెళ్లి అందరూ మద్యం తాగారు. అనంతరం అర్ధరాత్రి రమేశ్అన్న కొడుకు శ్రీహరి ఇంటికి దానవాయిగూడెం వెళ్లి అక్కడ కూడా మద్యం తాగారు.
ఇక ఇంటికి వెళ్తున్నామని చెప్పి అక్కడి నుంచి బయలుదేరి దానవాయిగూడెం ఎన్ఎస్పీ కెనాల్వద్దకు వెళ్లి ఆటోను ఆపారు. వెంకటేశ్వర్లు ఆటోలో నిద్రిపోగా.. రమేశ్, ప్రసాద్, భరత్ స్నానం చేసేందుకు కాల్వలోకి దిగారు. మద్యంమత్తులో ముగ్గురు కొట్టుకు పోయారు. మంగళవారం ఉదయం నిద్రలేచిన వెంకటేశ్వర్లుకు ముగ్గురూ కనిపించలేదు. దీంతో కెనాల్ వద్ద వెతకగా ముగ్గురి దుస్తులు కనిపించాయి. వెంటనే బంధువులకు, పోలీసులకు సమాచారం అందించాడు. ఖమ్మం టౌన్ సీఐ రమణమూర్తి ఆధ్వర్యంలో గజ ఈతగాళ్లతో కాల్వలో గాలింపు చేపట్టగా భరత్ మృతదేహం దొరికింది. వెంకటేశ్వర్లు ఫిర్యాదుతో పోలీసులు కేసు నమోదు చేసి దర్యాప్తు చేపట్టారు.
మిడ్ మానేరు వరద కాల్వలో వ్యక్తి ..
బోయినిపల్లి : -మిడ్ మానేరు వరద కాల్వలో మునిగి వ్యక్తి గల్లంతైన ఘటన రాజన్న సిరిసిల్ల జిల్లాలో జరిగింది. స్థానికులు, పోలీసులు తెలిపిన ప్రకారం.. బోయినిపల్లి మండలం కొదురుపాకకు చెందిన నాగుల కిషన్ (35) ఏడాది కింద వరదవెల్లి శివారులోని -మిడ్ మానేరు వరద కాల్వ పక్కన భూమిని కొని వ్యవసాయం చేస్తున్నాడు. మంగళవారం పొలానికి నీరు పెట్టేందుకు ఫ్రెండ్స్ కనకయ్య, శేఖర్ తో కలిసి వెళ్లాడు. పొలం వద్ద పైపు పగిలిపోవడంతో మరమ్మతు చేసేందుకు వరదకాల్వ నీటిలోకి దిగాడు. మోటారు ఆన్లో ఉండడంతో ఒక్కసారిగా అతనికి కరెంట్షాక్కొట్టింది.
దీంతో కిషన్ నీటిలో మునిగి గల్లంతు అయ్యాడు. అతని ఫ్రెండ్స్ కుటుంబసభ్యులకు, గ్రామస్తులకు సమాచారం అందించారు. వేములవాడ రూరల్ సీఐ శ్రీనివాస్, ఎస్ఐ పృథ్వీధర్గౌడ్ వెళ్లి కిషన్ కోసం గాలింపు చేపట్టారు. కరీంనగర్ నుంచి గజ ఈతగాళ్లను రప్పించి గాలించినా ఫలితం లేదు. అప్పటికే చీకటి పడడంతో గాలింపు చర్యలను నిలిపివేశారు. కిషన్కు భార్య రేఖ, 40 రోజుల కూతురు ఉన్నారు. పెండ్లైన12 ఏండ్లకు కూతురు పుట్టడంతో మురిసిపోయిన ఆ కుటుంబంలో తీవ్ర విషాదం నెలకొంది.
