అనూప్ గఢ్: ప్రధాని మోదీ ఓడరేవుల నుంచి విమానాశ్రయాల వరకు అన్నింటినీ "నియంత్రిస్తున్నారని" కాంగ్రెస్ అధ్యక్షుడు మల్లికార్జున ఖర్గే ఆరోపించారు. ప్రజలను "బానిసలు"గా మార్చడానికి ఆయన ప్రయత్నాలు చేస్తున్నారని ఫైర్ అయ్యారు. రాజస్థాన్‌‌లోని శ్రీ గంగానగర్ జిల్లా అనూప్‌‌గఢ్‌‌లో సోమవారం నిర్వహించిన ఎన్నికల ప్రచార సభలో ఖర్గే మాట్లాడారు. ప్రజల సమస్యలను పరిష్కరించేందుకు, వారికి ఇచ్చిన హామీలను నెరవేర్చడానికి కాంగ్రెస్ పని చేస్తుందని చెప్పారు.
"బహుశా ప్రధాని కూడా ఈ ప్రాంతంలోనే పర్యటిస్తున్నారు. కానీ, మనం ఎక్కడికి వెళ్లాలనుకుంటున్నామో అక్కడ విమానాలు నడిపేందుకు అనుమతి లభించదు. అంటే అన్నీ ఆయన ఆధీనంలోనే ఉన్నాయి. గాలి, భూమి, ఓడరేవులు, విమానాశ్రయాలు అన్నీ ఆయన కంట్రోల్లోనే ఉన్నాయి..వీటన్నింటినీ ప్రధాని కంట్రోల్ చేస్తున్నారు” అని ఖర్గే విమర్శించారు. ‘‘మమ్మల్ని భయపెట్టేందుకు ప్రయత్నించవచ్చు.. కానీ మేం భయపడబోం.. పేదల కోసం పోరాడి వారి కష్టాలు తొలగిస్తాం” అని ఆయన అన్నారు. కాగా, రాజస్థాన్‌‌లోని మొత్తం 200 అసెంబ్లీ నియోజకవర్గాలకు ఈ నెల 25న పోలింగ్, డిసెంబర్ 3న ఓట్ల లెక్కింపు జరగనుంది.
