- ఇంటింటికి పాదయాత్రలో వివేక్ వెంకటస్వామి
మంచిర్యాల, వెలుగు: మంచిర్యాల నియోజకవర్గం అభివృద్ధి కావాలంటే, గొడవలు లేకుండా ప్రశాంతంగా ఉండాలంటే విద్యావంతుడైన వెరబెల్లి రఘునాథ్రావును గెలిపించాలని బీజేపీ జాతీయ కార్యవర్గ సభ్యుడు, ఎలక్షన్ మేనిఫెస్టో కమిటీ చైర్మన్డాక్టర్ జి.వివేక్వెంకటస్వామి కోరారు. పార్టీ జిల్లా అధ్యక్షుడు రఘునాథ్రావుతో కలిసి ఆదివారం జిల్లా కేంద్రంలోని గొల్లవాడ, అంబేద్కర్, సుభాష్నగర్లో ఇంటింటికి పాదయాత్ర నిర్వహించారు. కాలనీ ప్రజలు వారికి ఘన స్వాగతం పలికారు. ఈ సందర్భంగా వివేక్ మాట్లాడుతూ.. ప్రధానమంత్రి నరేంద్ర మోదీ సారథ్యంలో భారత్అభివృద్ధిలో అగ్రరాజ్యాలతో పోటీపడుతోందన్నారు.
సీఎం కేసీఆర్ఎన్నికల సందర్భంగా అనేక హామీలిచ్చి అధికారంలోకి రాగానే అన్ని వర్గాల ప్రజలను మోసం చేశారని విమర్శించారు. తెలంగాణలో బీజేపీ ప్రభుత్వం వస్తుందని, మంచిర్యాలలో రఘునాథ్రావును గెలిపించాలని ఆయన కోరారు. రఘునాథ్రావు మాట్లాడుతూ బీఆర్ఎస్పై మండిపడ్డారు. ఏసీసీ ప్రాంతంలో గతంలో సిమెంట్, పైపుల కంపెనీలు ఉండేవని, ఏసీసీలో మేనేజర్ను హత్య చేసి కంపెనీ మూసివేతకు కారణమైన వాళ్లు ఇప్పుడు ఏ పార్టీలో ఉన్నారో ప్రజలకు తెలుసన్నారు.
ఈ ప్రాంతంలోని కంపెనీలు మూతపడడంతో వాటిపై ఆధారపడ్డవారు ఉపాధి కోల్పోయారని వాపోయారు. బీజేపీని గెలిపిస్తే కొత్త పరిశ్రమలను తీసుకొచ్చి నిరుద్యోగులకు ఉద్యోగావకాశాలు కల్పిస్తామని హామీ ఇచ్చారు. నాయకులు మునిమంద రమేశ్, అందుగుల శ్రీనివాస్, వంగపల్లి వెంకటేశ్వర్రావు, రజినీష్ జైన్, డాక్టర్ రఘునందన్, బోయిని హరికృష్ణ తదితరులు పాల్గొన్నారు.
